ಹೊಸ ಪುಸ್ತಕ, ಪುಸ್ತಕ, ಸಾಹಿತ್ಯ

ಪ್ರೇಮದ ಕೊಳದಲಿ ಮೀಯಲು...



ಸವಿಯದ ಮಾತುಗಳಿಗಿಂತ

ನುಡಿಯದ ಮುತ್ತಿನಹಾರದ

ಸೇತುವೆಯದ್ದೇ ಮೇಲುಗೈ

ನಮ್ಮಿಬ್ಬರ ನಡುವೆ,

ಒಮ್ಮೆಯಾದರೂ ತುಂಡರಿಸಿ

ನೋಡಬೇಕಿತ್ತು,

ಅನುರಾಗ ಚಿಮ್ಮುತ್ತಿತ್ತೇನೋ!?

ಬಿಸಿಯಪ್ಪುಗೆ, ಚುಂಬನ...

ನಾಲ್ಕುಗೋಡೆಯೊಳಗೇ ಸೀಮಿತ

ಎಲ್ಲೆ ದಾಟಿದ ಮೇಲೆ

ನೀ ಯಾರೋ ನಾ ಯಾರೋ,

ಬೆರಳೆಣಿಕೆಯನೂ ಮೀರಿ

ವಸಂತಗಳು ಬಂದು ಹೋದವು

ಇಳೆ ತಬ್ಬಿದ ಮಳೆಯಲಿ

ಕೌತುಕ, ಆಡಂಬರ, ಸಡಗರ...

ಒಂಟಿತನ, ನೋವು, ವಿರಹದ್ದೇ

ಕಾರುಬಾರು ನನ್ನಲಿ

ನಾಳೆಗಳ ನೆಪವೊಡ್ಡಿ

ಗಳಿಕೆಯನೇ ಗಮ್ಯವಾಗಿಸಿ

ಮರೀಚಿಕೆಯ ಬೆನ್ನಹತ್ತಿದೆ,

ಜಾರಿ ಬಿದ್ದಿದ್ಯಾವಾಗ

ಪ್ರೇಮದ ಹೆಗಲ ಚೀಲ ?

ಕತ್ತರಿ ಬಿದ್ದದ್ಯಾವಾಗ

ಸವಿ ಸನಿಹದ ಕಿಸೆಗೆ ?

ಮುಟ್ಟಿ ನೋಡಿಕೊಳ್ಳಲೂ

ಪುರುಸೊತ್ತಿಲ್ಲ ನಿನಗೆ

ಒಬ್ಬಳೇ ಏರಿ ಇಳಿದಾಗಿದೆ

ವೇದನೆಯ ಶಿಖರವ

ನಿಟ್ಟುಸಿರು, ನಿರಾಸೆಗಳೇ

ಕಣಿವೆಯುದ್ದಕೂ,

ಬದುಕೇ ಭ್ರಮನಿರಸ

ವಿರಕ್ತಯಾಗ,

ನಿಲ್ಲದ ನಿವೇದನೆ ನನ್ನದು

ಪ್ರೇಮದ ಪನ್ನೀರಿನ ಕೊಳದಲಿ

ನಿತ್ಯ ಮೀಯಲು...

ಧಿಧಿಧಿಧಿಧಿಧಿಧಿಧಿ

- ಜಮುನಾ ರಾಣಿ ಹೆಚ್‌.ಎಸ್‌.