ಬರಹ

ಬರಹ



ಈ ಲೇಖನಿಗೇನು ಗೊತ್ತು

ಸುಮ್ಮನೇ ಎರಡು ಗೆರೆಗಳ ನಡುವೆ ತುಯ್ಯುತ್ತದೆ

ಅವೇ ರಸ್ತೆಗಳ ತಟ್ಟಿ ಬರುವ ಗೂರ್ಖನಂತೆ

ಅದದೇ ಅಡ್ಡ ಉದ್ದ ಗೆರೆ ಸೊನ್ನೆ ಸುಳಿ

ಗಳಲ್ಲಿ ತಿರುಗುತ್ತದೆ- ದಿನವೂ

ಅದೇ ರುಜು ಮಾಡುವ ನೌಕರನಂತೆ

ಹೆಚ್ಚೆಂದರೆ ಕಾಗುಣಿತ ಬದಲುತ್ತದೆ

ಅಥವಾ ಶಾಯಿಯ ಬಣ್ಣ

ಉದ್ದನೆಯ ಟೋಪಿಯಲ್ಲಿ ತಲೆ

ಹುದುಗಿಸಿ ಬೆಚ್ಚಗೆ ಮಲಗುತ್ತದೆ

ಎರಡು ಗೆರೆಗಳೇ ದಡಗಳಾಗಿ ನಡುವೆ

ಎಂಥೆಂಥ ನದಿಗಳು ಹರಿದಿದ್ದವು

ತಡಸಲಲ್ಲಿ ಧುಮ್ಮಿಕ್ಕಿ ಮೊರೆದಿತ್ತು

ಭರಪೂರ ಮಳೆ ನೀರು

ಎಲ್ಲಿ ಇಂಗಿದವೀಗ- ಯಾರಿಗೆ ಗೊತ್ತು

ಸಹಿ ಮಾಡುತ್ತ ಮಾಡುತ್ತ ಪುಟದಂಚಿಗೆ

ಸರಿದ ನೌಕರ ದಫ್ತರಗಳ ತಿರುವುತ್ತ

ಮಗುಚುತ್ತ ಸರಿದು ಹೋಗುತ್ತಾನೆ

ಕೈ ಸೇರಿದ ಹಾರ ತುರಾಯಿಗಳ

ಹೊತ್ತು ಪೇಲವ ನಗೆ ಹೊತ್ತು

ಯಾರೋ ಸೀಟಿ ಊದಿ ಕೂಗುತ್ತಾರೆ

ಆಟ ಮುಗಿದಿದೆ

ಹೌದು ಹೊತ್ತು ಕಂತಿ ಪುಟ ಮುಗಿಯುತ್ತದೆ

ಗೆರೆಗುಂಟ ಒಂಟಿ ನಡೆದೆವೆ ನಾವು

ಇವಳೇ, ಒಮ್ಮೆ ಕೈಚಾಚಿಬಿಡು

ಗೆರೆಗಳು ಕಳೆದ ಪುಟಕ್ಕೆ ಸರಿಯುವ ಮೊದಲು

ಒಮ್ಮೆ ಕೈ ಕೈ ಹಿಡಿದು ಕೂಡಿಬಿಡೋಣ

ಈಗ ಲೇಖನಿಯ ಷರಾ ಏನಿದೆಯೋ

ಯಾರಿಗೆ ಗೊತ್ತು

ಡಾ.ಗೋವಿಂದ ಹೆಗಡೆ