* ರಂಜನಾ
ಅವನು ದಿನಪೂರ್ತಿ ಯಾರದ್ದೋ ಜತೆ ಚಾಟ್‌ ಮಾಡ್ತಾನೆ. ಅವನ ಇನ್‌ಬಾಕ್ಸ್‌ ಇಣುಕಿದ ಪತ್ನಿಯ ಕಣ್ಣು ಕೆಂಪಾಗುತ್ತೆ. ಪತ್ನಿ ಅಪರಾತ್ರಿಯಲ್ಲಿ ಚಾಟ್‌ ಮಾಡುತ್ತಾಳೆ ಎಂದಾಗ ಅವನಿಗೂ ಮುನಿಸು.
ಕಾಲ ಮುಂದುವರಿದಿದೆ. ನಾವು ಎಲ್ಲವನ್ನು ಸುಲಭವಾಗಿ ತೆಗೆದುಕೊಳ್ಳುತ್ತೇವೆ ಅಂತೆಲ್ಲ ಹೇಳಬಹುದು. ಆದ್ರೂ ಸಂಬಂಧದ ವಿಷಯದಲ್ಲಿ ನಾಲ್ಕು ಗೋಡೆಯ ಚೌಕಟ್ಟು ಮೀರುವುದು ಸುಲಭವಲ್ಲ. ಆದ್ರೆ ಸ್ಮಾರ್ಟ್‌ ಫೋನ್‌ನಲ್ಲೇ ಸಲೀಸಾಗಿ ಮಾಡಬಹುದಾದ ಸೆಕ್ಸ್‌ ಇದೀಗ ಕದ ತೆರೆದ ಬಾಗಿಲಿನಾಚೆ ಹಬ್ಬಿದೆ.
ಏನಿದು?
ಕೆಲವರು ದಿನದ 24 ಗಂಟೆಯೂ ಮೊಬೈಲ್‌ನಲ್ಲಿ ಚಾಟ್‌ ಮಾಡುತ್ತಿರುತ್ತಾರೆ. ಫೇಸ್‌ಬುಕ್‌, ಮೆಸೆಂಜರ್‌, ವಾಟ್ಸಪ್‌ಗಳು ಚಾಟಿಂಗ್‌ಗೆ ಮತ್ತಷ್ಟು ಸುಲಭ ಮಾಡಿ ಕೊಟ್ಟಿವೆ. ಒಂದು ಮಿಸ್ಡ್‌ ಕಾಲ್‌, ಮತ್ತೊಂದು ಪರಿಚಯದ ಮಾತು ಮುಗಿಯುವುದೇ ಇಲ್ಲ. ಅದು ಸಲುಗೆಯವರೆಗೆ ಹೋಗಿ ಕೇವಲ ಸಂದೇಶದಲ್ಲೇ ದೇಹಗಳ ಆಕರ್ಷಣೆ ಶುರುವಾಗಿ ಸೆಕ್ಸ್‌ ತನಕವೂ ಹೋಗಿ ನಿಲ್ಲುತ್ತದೆ. ಲೈಂಗಿಕ ಸಂಗತಿಗೆ ಸಂಬಂಧಿಸಿದ ಸಂದೇಶಗಳನ್ನು ರವಾನಿಸುವುದಕ್ಕೆ ಸೆಕ್ಸ್‌ಟಿಂಗ್‌ ಎನ್ನುತ್ತೇವೆ.
ಸೆಕ್ಸಿಟಿಂಗ್‌ ಅಂದ್ರೆ ಸೆಕ್ಸ್‌ ಕುರಿತು ಸಂದೇಶಗಳಲ್ಲಿ ಚರ್ಚೆ ನಡೆಸುವುದು. ಜನರಲ್‌ ಆಗಿ ಮತ್ತು ವೈಯಕ್ತಿಕವಾಗಿ ಸೆಕ್ಸ್‌ ಸಂಬಂಧಿತ ಅನಿಸಿಕೆ, ಅನುಭವ ಹಂಚಿಕೊಳ್ಳುವಿಕೆ. ಸೆಕ್ಸ್‌ಟಿಂಗ್‌ನಲ್ಲಿ ಚಾಟಿಂಗ್‌ನ ಉದ್ದೇಶವೇ ಸೆಕ್ಸ್‌. ಲೈಂಗಿಕತೆ ಕುರಿತು ಮುಕ್ತವಾಗಿ ಚರ್ಚಿಸುವುದು.
3ನೇ ವ್ಯಕ್ತಿಗಳ ಜೊತೆ ಚಾಟ್‌
ಸಂಗಾತಿ ಜತೆಗಿನ ಸೆಕ್ಸ್‌ ಕುರಿತು ಚಾಟಿಂಗ್‌ ಅಚ್ಚರಿಯಲ್ಲ. ತೀರ ಪರಿಚಿತರು, ಪರಸ್ಪರರ ನಡುವೆ ಸೆಕ್ಸ್‌ ಚಾಟ್‌ ಟ್ರೆಂಡ್‌ ಹೆಚ್ಚಾಗಿದೆ ಎನ್ನುತ್ತದೆ ಇತ್ತೀಚಿನ ಸಮೀಕ್ಷೆ. ಶೇ.8ರಷ್ಟು ಮಂದಿ ವೈಯಕ್ತಿಕ ಬದುಕಿನಲ್ಲಿ ಸಂಬಂಧವೇ ಇಲ್ಲದ 3ನೇ ವ ಕ್ತಿಗಳ ಜೊತೆ ಸೆಕ್ಸ್‌ ಚಾಟ್‌ ಮಾಡುತ್ತಾರಂತೆ. ಅಂದಹಾಗೆ ಈ ರೀತಿ ಸೆಕ್ಸ್‌ ಕುರಿತಾಗಿ ಮುಕ್ತ ಮಾತುಕತೆ ಇನ್ನೊಂದು ಹಂತ ಮುಂದಕ್ಕೆ ತೆಗೆದುಕೊಂಡು ಹೋಗುವ ಅಪಾಯವು ಇದೆ. ಕೆಲವರು ಭೇಟಿಯಾಗಿ ದೈಹಿಕ ಸಂಪರ್ಕ ಬೆಳೆಸಿಕೊಂಡಿದ್ದು ಇದೆ. ಚಾಟ್‌ನಲ್ಲಿ ಇದ್ದಕ್ಕಿಂದ್ದಂತೆ ಅಶ್ಲೀಲ ಫೋಟೊ ಕಳುಹಿಸುವುದು, ತಮ್ಮ ನಗ್ನ ಚಿತ್ರವನ್ನು ಇನ್ನೊಬ್ಬರೊಂದಿಗೆ ಹಂಚಿಕೊಂಡು ಖುಷಿಪಡುವ ಪ್ರಕರಣಗಳು ನಡೆಯುತ್ತವೆ.
ವಿಚ್ಛೇದನಕ್ಕೆ ಹಾದಿ
ಅಂದಹಾಗೆ 3ನೇ ವ್ಯಕ್ತಿಗಳ ಜೊತೆ ಸೆಕ್ಸ್‌ ಕುರಿತು ಚರ್ಚಿಸುವ, ಅದರ ಬಗ್ಗೆ ಮಾಹಿತಿ ಹಂಚಿಕೊಳ್ಳುವ ಟ್ರೆಂಡ್‌ ವಿವಾಹಿತರಲ್ಲೇ ಹೆಚ್ಚು ಎನ್ನುತ್ತಾರೆ ಆಪ್ತ ಸಲಹೆಗಾರರು. ಅನೇಕರು ತಮ್ಮ ಮೊಬೈಲ್‌ನ್ನು ಬದುಕಿನ ಅತ್ಯಂತ ಗೌಪ್ಯವಾದ ವಸ್ತು ಎಂಬಂತೆ ಕಾಪಾಡಿಕೊಳ್ಳುವುದಕ್ಕ್ಕೂ ಇದೊಂದು ಕಾರಣವಂತೆ. ನಗರ ಪ್ರದೇಶದಲ್ಲಿ ದುಡಿಯುವ ವರ್ಗದ ವಿಚ್ಛೇದನಕ್ಕೆ ಈ ರೀತಿ ಸೆಕ್ಸ್‌ಟಿಂಗ್‌ ನಡೆಸುವುದು ಪ್ರಮುಖ ಕಾರಣ ಎನ್ನುತ್ತಾರೆ ತಜ್ಞರು. ಕೌಟಂಬಿಕ ಸಲಹೆಗಾರ್ತಿ ಅನಿತಾ ಪ್ರಕಾರ, ಕೆಲವು ದಂಪತಿ ಈ ರೀತಿ ಚಾಟಿಂಗ್‌ನ್ನು ಹಾನಿಯಿಲ್ಲದ ಮನರಂಜನೆಯಾಗಿ ಕಾಣುತ್ತಾರೆ. ಆದರೆ ಸಾಕಷ್ಟು ಗಂಡ-ಹೆಂಡತಿಯ ನಡುವೆ ಸಂಬಂಧ ಬಿರುಕು ಬಿಡುವುದೇ ಅವರ ಇನ್‌ಬಾಕ್ಸ್‌ನಲ್ಲಿ 3ನೇ ವ್ಯಕ್ತಿ ಸೆಕ್ಸ್‌ ಕುರಿತು ಚರ್ಚಿಸಿದ್ದು ಕಂಡಾಗ. 'ಇದು ಸಂಬಂಧಕ್ಕೆ ತುಂಬಾ ಹರ್ಟ್‌ ಮಾಡುತ್ತದೆ. ಇಲ್ಲಿ ಗಂಡ-ಹೆಂಡತಿ ಸಂಬಂಧ, ಸೆಕ್ಸ್‌ ಎಂಬುದು ನಾಲ್ಕು ಗೋಡೆಯ ಆಚೆ ದಾಟಲು ಯಾರೂ ಬಯಸುವುದಿಲ್ಲ. ಇದೇ ವಿಷಯಕ್ಕೆ ಬೆಂಗಳೂರಿನಲ್ಲಿ ಕೊಲೆಯಾದ ಪ್ರಕರಣಗಳು ಇವೆ. ಹೀಗಾಗಿ ಮದುವೆಯಾದವರು ಈ ತರಹ ಚಾಟಿಂಗ್‌ನಲ್ಲಿ ಮಿತಿಯನ್ನು ದಾಟದಿರುವುದು ಒಳಿತು ಎನ್ನುತ್ತಾರೆ.
ಕೆಲವಷ್ಟು ವಿಷಯಗಳಿರುತ್ತವೆ. ನಾಲ್ಕು ಗೋಡೆಯ ನಡುವೆಯೇ ನಡೆದು ಹೋಗುವ, ನಡೆಯಲೇಬೇಕಾದ ವಿಷಯಗಳವು. ಅದು ಗೋಡೆಯಾಚೆ ಬಂದರೆ ಅಪಾಯ ಕಟ್ಟಿಟ್ಟ ಬುತ್ತಿ.
-----
ಚಾಟ್‌ ಮಾಡುವುದು ತಪ್ಪಲ್ಲ. ಆದರೆ ಅದಕ್ಕೊಂದು ಮಿತಿ ಇದೆ. ಗಂಡ-ಹೆಂಡತಿಯ ನಡುವಿನ ಸಂಬಂಧದಲ್ಲಿ ಬಿರುಕು ಮೂಡಲು ಅವರ ಇನ್‌ಬಾಕ್ಸ್‌ನಲ್ಲಿ ಇನ್ನೊಬ್ಬರ ಸೆಕ್ಸ್‌ ಸಂಬಂಧಿ ಸಂದೇಶವೂ ಕಾರಣ. ಇದು ದಾಂಪತ್ಯವನ್ನಷ್ಟೆ ಮುರಿಯುವುದಿಲ್ಲ. ಕೊಲೆಯಲ್ಲಿ ಕೂಡ ಅಂತ್ಯವಾಗಬಹುದು.
* ಅನಿತಾ, ಕೌಟಂಬಿಕ ಸಲಹೆಗಾರ್ತಿ
* ಚಾಟ್‌ ಮಾಡುತ್ತಾ ಸೆಕ್ಸ್‌ ಬಗ್ಗೆ ಮಾತನಾಡುವವರು ಶೇ.60ರಷ್ಟು ಜನ.
* ಈ ಬಗ್ಗೆ ಮಾತನಾಡುವುದು ತಪ್ಪಲ್ಲ. ಇದ್ರಿಂದ ವೈಯಕ್ತಿಕ ಸಂಬಂಧಗಳಿಗೆ ಏನು ಆಗುವುದಿಲ್ಲ ಎಂದವರು ಶೇ.35ರಷ್ಟು ಮಂದಿ.
* ಸೆಕ್ಸ್‌ ಚಾಟ್‌ ಅನ್ನು ಮನರಂಜನೆಯಾಗಿ ನೋಡುವವರು 10 ರಲ್ಲಿ ಒಬ್ಬರು.
* ಸೆಕ್ಸ್‌ ಚಾಟಿಂಗ್‌ನಲ್ಲಿ ನಗ್ನ ಅಥವಾ ಅಶ್ಲೀಲ ಫೋಟೊ ಕಳುಹಿಸುವುದು ಸಲ್ಲ ಎಂದವರು ಶೇ.62ರಷ್ಟು ಮಂದಿ.