ಬರಲಿದೆ ಪಿರಿಯಡ್ಸ್‌ ಇಮೋಜಿ

ಮಾರ್ಚ್‌ ತಿಂಗಳಿನಿಂದ ಇಮೋಜಿ ಲಿಸ್ಟ್‌ನಲ್ಲಿ ಇದೇ ಮೊದಲ ಬಾರಿಗೆ ಪಿರಿಯಡ್ಸ್‌ ಇಮೋಜಿಯೊಂದು ಕಾಣಿಸಿಕೊಳ್ಳಲಿದೆ. ಕೆಂಪು ರಕ್ತದ ಹನಿಯಂತಿರುವ ಈ ಇಮೋಜಿ ಮೂಲಕ ಮಹಿಳೆಯರು ಯಾವುದೇ ಸಂಕೋಚವಿಲ್ಲದೆ ನನಗಿಂದು ಪಿರಿಯಡ್ಸ್‌ ಎಂದು ಹೇಳಿಕೊಳ್ಳಬಹುದು.

ಬಬಿತಾ ಎಸ್‌.

ಜಗತ್ತಿನಾದ್ಯಂತ ಇಮೋಜಿ ನಿರ್ವಹಣೆ ಮಾಡುತ್ತಿರುವ ಅಧಿಕೃತ ಸಂಸ್ಥೆ ಯುನಿಕೋಡ್‌ ಕನ್ಸೊರ್ಟಿಯಮ್‌ ಬರುವ ಮಾರ್ಚ್‌ನಿಂದ 59 ಹೊಸ ಇಮೋಜಿಗಳನ್ನು ಪರಿಚಯಿಸುತ್ತಿದೆ. ಇದರಲ್ಲಿ ಪಿರಿಯಡ್ಸ್‌ ಇಮೋಜಿ ಕೂಡಾ ಒಂದು. ಕೆಂಪು ರಕ್ತದ ಹನಿಯಂತಿರುವ ಈ ಇಮೋಜಿಯು ತಿಂಗಳ ಋುತುಸ್ರಾವದ ಬಗ್ಗೆ ಹೇಳಿಕೊಳ್ಳಲು ಸಂಕೋಚ ಪಡುವ ಮಹಿಳೆಯರಿಗೆ ಉಪಯುಕ್ತವಾಗಲಿದೆ ಎಂದು ಹೇಳಲಾಗುತ್ತಿದೆ.

ನ್ಯೂ ಎಂಟ್ರಿ

ವಾಟ್ಸ್‌ಆ್ಯಪ್‌, ಟ್ವಿಟ್ಟರ್‌, ಫೇಸ್‌ಬುಕ್‌ನಲ್ಲಿ ಈಗ ದೈನಂದಿನ ವಿದ್ಯಮಾನಕ್ಕೆ ಸಂಬಂಧಿಸಿದ ಮತ್ತು ಮನುಷ್ಯರ ಎಲ್ಲಾ ಭಾವನೆಗಳನ್ನು ವ್ಯಕ್ತಪಡಿಸುವ ಇಮೋಜಿಗಳಿವೆ. ಆದರೆ ಪಿರಿಯಡ್ಸ್‌ ಬಗ್ಗೆ ಸಂವಹನ ಮಾಡಿಕೊಳ್ಳಲು ಈವರೆಗೆ ಯಾವುದೇ ಇಮೋಜಿ ಇರಲಿಲ್ಲ. ಮಹಿಳೆಯರು ಚಿಮ್ಮುವ ಜ್ವಾಲಾಮುಖಿ, ರೆಡ್‌ ಹಾರ್ಟ್‌, ರೆಡ್‌ ರೋಸ್‌, ಕೆಂಪು ಬಣ್ಣದ ಫ್ಲೆಮಿಂಕೊ ಡಾನ್ಸರ್‌ ಇಮೋಜಿಗಳ ಮೂಲಕ ತಮ್ಮ ಋುತುಸ್ರಾವದ ಬಗ್ಗೆ ಇತರರೊಂದಿಗೆ ಶೇರ್‌ ಮಾಡಿಕೊಳ್ಳುತ್ತಿದ್ದರು. ಕೆಲವೊಮ್ಮೆ ಈ ಇಮೋಜಿಗಳು ತಪ್ಪು ಸಂದೇಶವನ್ನೂ ರವಾನಿಸುತ್ತಿದ್ದವು. ಆದ್ದರಿಂದ ಪಿರಿಯಡ್ಸ್‌ ಬಗ್ಗೆಯೇ ಒಂದು ಇಮೋಜಿ ಇರಬೇಕು ಎಂಬ ಬೇಡಿಕೆ ಜಗತ್ತಿನ ವಿವಿಧ ದೇಶಗಳಲ್ಲಿ ವ್ಯಕ್ತವಾಗಿದ್ದ ಕಾರಣ ಪಿರಿಯಡ್‌ ಇಮೋಜಿ ಪರಿಚಯಿಸಲಾಗಿದೆ ಎಂದು ಈ ಕುರಿತು ಅಭಿಯಾನ ಆರಂಭಿಸಿದ್ದ ಪ್ಲಾನ್‌ಇಂಟರ್‌ನ್ಯಾಷನಲ್‌ ಯುಕೆ ತಿಳಿಸಿದೆ.

ನೋ ಶೇಮ್‌

ಋುತುಸ್ರಾವದ ಬಗ್ಗೆ ಈಗಲೂ ತಮ್ಮ ಸ್ನೇಹಿತರೊಂದಿಗೆ, ಸಂಗಾತಿಯೊಂದಿಗೆ, ಬಂಧುಗಳೊಂದಿಗೆ ಮುಕ್ತವಾಗಿ ಹೇಳಿಕೊಳ್ಳಲು ಹಿಂಜರಿಯುವ ಮಹಿಳೆಯರು ಇನ್ನು ಮುಂದೆ ಈ ಪಿರಿಯಡ್ಸ್‌ ಇಮೋಜಿ ಸೆಂಡ್‌ ಮಾಡಿ ಅಥವಾ ಪೋಸ್ಟ್‌ ಮಾಡಿ ನಿರಾಳರಾಗಬಹುದು. ಕೆಂಪು ಬಣ್ಣದ ಹನಿಯಾಕಾರದ ಇಮೋಜಿ ಋುತುಸ್ರಾವದ ಅವಧಿಯಲ್ಲಿ ಮಹಿಳೆಯರು ಅನುಭವಿಸುವ ಅನನುಕೂಲಗಳ ಸಂಪೂರ್ಣ ಚಿತ್ರಣವನ್ನು ವ್ಯಕ್ತಪಡಿಸುವುದಿಲ್ಲವಾದರೂ ಆ ಕುರಿತ ಸಂವಹನದಲ್ಲಿ ಅಲ್ಪ ಬದಲಾವಣೆ ತರಲಿದೆ ಎಂಬ ಅಭಿಪ್ರಾಯಗಳು ಸೋಷಿಯಲ್‌ ಮೀಡಿಯಾದಲ್ಲಿ ವ್ಯಕ್ತವಾಗಿವೆ.

ಬೇಕು ಬೇಡ ಚರ್ಚೆ

ಪಿರಿಯಡ್ಸ್‌ ಇಮೋಜಿ ಬರುವ ಮೊದಲೇ ಸೋಷಿಯಲ್‌ ಮೀಡಿಯಾದಲ್ಲಿ ಅದರ ಕುರಿತು ಪರ ವಿರೋಧ ಚರ್ಚೆಗಳು ಆರಂಭವಾಗಿವೆ. ಈ ಇಮೋಜಿಗೆ ಕೆಲವರು ವೆಲ್‌ಕಮ್‌ ಹೇಳಿದರೆ, ಇನ್ನು ಕೆಲವರು ಕೆಂಪು ಹನಿಯ ಇಮೋಜಿಗಿಂತ ಸ್ಯಾನಿಟರಿ ಪ್ಯಾಡ್‌, ಟ್ಯಾಂಪುನ್‌, ಪಿರಿಯಡ್ಸ್‌ ಕಪ್‌ ಇಮೋಜಿ ಪರಿಚಯಿಸಬಹುದಿತ್ತು ಎಂದು ಹೇಳಿದ್ದಾರೆ. ರೆಡ್‌ ಡ್ರಾಪ್‌ ರಕ್ತದಾನವನ್ನೂ ಸೂಚಿಸುವ ಕಾರಣ ಈ ಇಮೋಜಿ ಬೇರೆ ಅರ್ಥ ಕೊಡುವ ಸಾಧ್ಯತೆಯೂ ಇದೆ ಎಂದು ನೆಟ್ಟಿಗರು ಕಾಮೆಂಟ್‌ ಮಾಡುತ್ತಿದ್ದಾರೆ.