ಥಾರ್‌ ಡೆಸರ್ಟ್‌ ರೇಸ್‌ ಗೆದ್ದ ಬೆಂಗಳೂರಿನ ಬೈಕರ್‌ ವಿಶ್ವಾಸ್‌

ಇದು ಅಂತಿಂಥ ಬೈಕ್‌ ರೇಸ್‌ ಅಲ್ಲ. ರಾಜಸ್ಥಾನದ 190 ಕಿ.ಮೀ ಉದ್ದಕ್ಕೆ ಚಾಚಿದ ದುರ್ಗಮ ಥಾರ್‌ ಮರಳುಗಾಡಿನಲ್ಲಿ ನಡೆದ ಬೈಕ್‌ ರೇಸ್‌. ಈ ಸ್ಪರ್ಧೆಯಲ್ಲಿ ಬೆಂಗಳೂರಿನ ಮೋಟಾರ್‌ಸೈಕ್ಲಿಸ್ಟ್‌ ವಿಶ್ವಾಸ್‌ ಎಸ್‌ಡಿ ಗೆದ್ದು ಸಾಧನೆ ಮಾಡಿದ್ದಾರೆ. ಈ ರೇಸ್‌ನಲ್ಲಿ ಅವರು ದಿಢೀರನೆ ಎದುರಾದ ಅನನುಕೂಲ ಸಂದರ್ಭವೊಂದನ್ನು ಎದುರಿಸಿ ಸಾಧನೆ ಮಾಡಿದ್ದು ಇನ್ನೊಂದು ವಿಶೇಷ. ಅಂದರೆ ಸ್ಪರ್ಧೆಯ ಅರ್ಧ ದಾರಿಯಲ್ಲಿ ಬೈಕ್‌ನ ಟಯರ್‌ಗಳು ಹಾನಿಗೊಳಗಾಗಿದ್ದವು. ಅದರೂ ಅವರು ಎದೆಗುಂದದೆ ಗುರಿ ತಲುಪುವಲ್ಲಿ ಯಶಸ್ವಿಯಾಗಿದ್ದಾರೆ.

ದುರ್ಗಮ ಹಾದಿ

ತಮ್ಮ ಗೆಲುವಿನ ದುರ್ಗಮ ಹಾದಿಯ ಬಗ್ಗೆ ಮಾತನಾಡಿರುವ ವಿಶ್ವಾಸ್‌, ನಾನು ಮಧ್ಯಮ ವರ್ಗದ ಕುಟುಂಬದಿಂದ ಬಂದವನು. ಸಣ್ಣ ವಯಸ್ಸಿನಿಂದಲೂ ನನಗೆ ಬೈಕಿಂಗ್‌ ಅಂದರೆ ತುಂಬಾ ಇಷ್ಟ. ಆದರೂ ಆಗ ನನಗೆ ಹೈಎಂಡ್‌ ಬೈಕ್‌ ಖರೀದಿಸುವ ಸಾಮರ್ಥ್ಯ‌ ಅಥವಾ ರೈಡಿಂಗ್‌ನಲ್ಲಿ ವೃತ್ತಿಪರ ತರಬೇತಿ ಪಡೆಯಲು ಸಾಧ್ಯವಾಗಿರಲಿಲ್ಲ. ಆದರೂ ನಾನು ನನ್ನ 14 ವರ್ಷಗಳಷ್ಟು ಹಳೆಯದಾದ ಕಾರ್ಬೊರೇಟರ್‌ ಬೈಕ್‌ನಲ್ಲಿಯೇ ಈ ಸ್ಪರ್ಧೆಯಲ್ಲಿ ಪಾಲ್ಗೊಳ್ಳಲು ನಿರ್ಧರಿಸಿದೆ ಎಂದು ಹೇಳಿದ್ದಾರೆ.

ಸ್ಕಿಲ್‌ ಮುಖ್ಯ

ಐಟಿ ಉದ್ಯೋಗಿಯೂ ಆಗಿರುವ ಅವರು, ಥಾರ್‌ ಮರುಭೂಮಿಯ ದುರ್ಗಮ ಹಾದಿಯಲ್ಲಿ ಈ ಬೈಕ್‌ನೊಂದಿಗೆ ನನ್ನ ಸ್ವಂತ ಸ್ಕಿಲ್‌ ಮೇಲೆ ಇಟ್ಟಿದ್ದ ನಂಬಿಕೆಯೇ ಸಹಾಯಕ್ಕೆ ಬಂತು. ಸ್ಪರ್ಧೆಯ ಮೊದಲ ಎರಡು ದಿನ ಎಲ್ಲವೂ ಚೆನ್ನಾಗಿ ನಡೆಯಿತು. ಆದರೆ ಮೂರನೇ ದಿನ ಅಂದರೆ ಸ್ಪರ್ಧೆಯ ಅರ್ಧ ದಾರಿಯಲ್ಲಿ ಬೈಕ್‌ನ ಮುಂದಿನ ಟೈರ್‌ ಪಂಕ್ಚರ್‌ ಆದಾಗ ಪರಿಸ್ಥಿತಿ ಬಿಗಡಾಯಿಸಿತು. ಅದರ ಬೆನ್ನಲ್ಲೇ ಹಿಂದಿನ ಚಕ್ರವೂ ಹಾಳಾಯಿತು ಎಂದು ವಿವರಿಸಿದ್ದಾರೆ.

ಗೆದ್ದ ಖುಷಿ

ಈ ಬೈಕ್‌ನ ಬಿಡಿ ಭಾಗಗಳು ಭಾರತದಲ್ಲಿ ಸಿಗದ ಕಾರಣ ನಾನು ಯಾವುದೇ ಬಿಡಿ ಭಾಗಗಳಿಲ್ಲದೆಯೇ ಈ ಸ್ಪರ್ಧೆಯಲ್ಲಿ ಪಾಲ್ಗೊಂಡಿದ್ದೆ. ಹಳೆಯ ಬೈಕ್‌ನೊಂದಿಗೆ ಆ ಬಿಸಿಲು ಮತ್ತು ಒಣ ಹವೆಯಲ್ಲಿ ಕಾಲ ಕಳೆಯುವುದು ತುಂಬಾ ದುಸ್ತರವಾಗಿತ್ತು ಎಂದು ಬೈಕರ್‌ ವಿಶ್ವಾಸ್‌ ಡಿಎಸ್‌ ಹೇಳಿದ್ದಾರೆ.