ಒಟ್ಟಿಗೆ ಕುಳಿತು ಊಟ ಮಾಡುವುದರಿಂದೇನು ಲಾಭ?

ಹಿಂದಿನ ಕಾಲದಲ್ಲಿ ಅವಿಭಕ್ತ ಕುಟುಂಬ ಪದ್ಧತಿ ಇತ್ತು. ಅಜ್ಜ, ಅಜ್ಜಿ, ಅಪ್ಪ, ಅಮ್ಮ, ತಂಗಿ, ಮಕ್ಕಳು, ಮೊಮ್ಮಕ್ಕಳು ಎಲ್ಲರೂ ಕುಳಿತು ಊಟ ಮಾಡುತ್ತಿದ್ದರು. ಬೆಳದಿಂಗಳ ಊಟ ಮಾಡುತ್ತಿದ್ದರು. ಏನೇ ವಿಷಯ ಇದ್ದರು ಹಂಚಿಕೊಳ್ಳುತ್ತ ಖುಷಿಯಿಂದ ಹೊಟ್ಟೆ ತುಂಬ ತಿನ್ನುತ್ತಿದ್ದರು. ಈ ಖುಷಿಯಲ್ಲಿ ಮಾನಸಿಕ ತೊಳಲಾಟಗಳನ್ನೆಲ್ಲ ಮರೆಯುತ್ತಿದ್ದರು. ಏನೇ ವಿಷಯ ಇದ್ದರು ಈ ಸಮಯದಲ್ಲಿ ಚರ್ಚೆಯಾಗಿ ಸಮಸ್ಯೆಗಳಿದ್ದರೆ ಬಗೆಹರಿಸಿಕೊಳ್ಳುತ್ತಿದ್ದರು.

ಆದರೆ ಈಗೆಲ್ಲ ಕುಟುಂಬಗಳು ಹರಿದು ಹಂಚಿ ಹೋಗಿವೆ. ಮನೆಯಲ್ಲಿ ಇರುವವರೆ ಮೂರು, ನಾಲ್ಕು ಐದು ಜನ. ಆದರೂ ಒಬ್ಬರ ಮುಖ ಒಬ್ಬರಿಗೆ ನೋಡಲು ಸಮಯವಿಲ್ಲ. ಅದರಲ್ಲೂ ಈ ಟಿವಿ, ಮೊಬೈಲ್‌ಗಳು ಬಂದ ಮೇಲಂತೂ ಟಿವಿ ಮುಂದೆ ಕುಳಿತು ಊಟ ಮಾಡುವುದು ಸಾಮಾನ್ಯವಾಗಿದೆ. ಸಂಬಂಧಗಳನ್ನು ಉಳಿಸಿಕೊಳ್ಳಬೇಕಾದ ಅನಿವಾರ್ಯತೆ ಇರುವ ಈ ಕಾಲದಲ್ಲಿ ಒಟ್ಟಿಗೆ ಕೂತು ಊಟ ಮಾಡುವುದು ಅವಶ್ಯ. ಒಟ್ಟಿಗೆ ಕುಳಿತು ಊಟ ಮಾಡುವುದರಿಂದ ಅನೇಕ ಲಾಭಗಳಿವೆ.

• ಎಲ್ಲರೂ ಸೇರಿ ಊಟ ಮಾಡುವಾಗ ಆ ದಿನದಲ್ಲಿ ಆದ ಸಿಹಿ ಕಹಿ ಘಟನೆಗಳನ್ನು ಎಲ್ಲರೊಡನೆ ಹಂಚಿಕೊಳ್ಳಬಹುದು. ಮಕ್ಕಳು ಆ ಸಮಯದಲ್ಲಿ ಮನ ಬಿಚ್ಚಿ ಮಾತನಾಡುತ್ತಾರೆ. ಇದರಿಂದ ಮನೆಯಲ್ಲಿ ಪ್ರತಿಯೊಬ್ಬರಲ್ಲೂ ಪ್ರೀತಿ ವಿಶ್ವಾಸ ಹೆಚ್ಚಿ ಕುಟುಂಬದಲ್ಲಿ ನೆಮ್ಮದಿ ಇರುವುದು.

• ಎಲ್ಲರು ಒಟ್ಟಿಗೆ ಕುಳಿತು ಅನ್ನಪೂರ್ಣೇಶ್ವರಿ ಎಂದು ಪೂಜಿಸಲ್ಪಡುವ ಆಹಾರಕ್ಕೆ ವಂದಿಸಿ ದೇವರಿಗೆ ಪ್ರಾರ್ಥಿಸಿ ಊಟ ಮಾಡಬೇಕು. ಈ ಪ್ರಾರ್ಥನೆಯಲ್ಲಿ ವಿಶೇಷವಾದ ಶಕ್ತಿ ಇರುತ್ತದೆ.

• ಊಟ ಮಾಡುವ ಮೊದಲು ಶಾಂತಿಗಳನ್ನು ಪಠಿಸಬೇಕು. ಇದರಿಂದ ಆಹಾರವೂ ಶುದ್ಧವಾಗುವುದು ಹಾಗೂ ಮಕ್ಕಳಲ್ಲಿ ಭಾವಾನಾತ್ಮಕ ಬೆಳವಣಿಗೆ ಉಂಟಾಗುತ್ತದೆ.

• ಒಟ್ಟಿಗೆ ಊಟ ಮಾಡುವಾಗ ಮನೆ ಮಂದಿಯೆಲ್ಲಾ ಸೇರಿ ಮಾತುಕತೆಯಾಡಲು ಸುಲಭವಾಗುತ್ತದೆ. ಆ ಸಮಯದಲ್ಲಿ ಮನಸ್ಸಿನಲ್ಲಾದ ದುಗುಡವನ್ನು ಹೊರ ಹಾಕಲು ಅನುಕೂಲವಾಗುತ್ತದೆ. ಮಕ್ಕಳಿಗೆ ತಮ್ಮ ಆತಂಕವನ್ನು ಅಭಿವ್ಯಕ್ತಗೊಳಿಸಲು ಇದೊಂದು ಉತ್ತಮ ವೇದಿಕೆ.

• ಆಕಸ್ಮಾತ್‌ ಪದಾರ್ಥಗಳು ಕಡಿಮೆ ಇದ್ದರೆ ಅದನ್ನು ಸಮಪಾಲು ಮಾಡಿ ಹಂಚಿ ತಿನ್ನಬಹುದು. ಇದರಿಂದ ಮಕ್ಕಳಲ್ಲಿ ಹಂಚಿ ತಿನ್ನುವ ಸ್ವಭಾವ ಬರುತ್ತದೆ. ಹಾಗೂ ಪದಾರ್ಥಗಳ ಮಹತ್ವ ಅರ್ಥವಾಗುತ್ತದೆ.

• ಮಾಡಿದ ಪದಾರ್ಥ ವೇಸ್ಟ್‌ ಆಗುವುದಿಲ್ಲ ಮತ್ತು ಅಡುಗೆಯ ರುಚಿಯೂ ಹೆಚ್ಚುವುದು.

• ಒಟ್ಟಿಗೆ ಕುಳಿತು ಊಟ ಮಾಡುವಾಗ ಟಿವಿ ನೋಡುವುದು, ಮೊಬೈಲ್‌ನಲ್ಲಿ ಮಾತನಾಡುವುದು ಕಡಿಮೆ ಆಗುವುದು. ಇದರಿಂದ ಆಹಾರ ರುಚಿ ತಿಳಿಯುತ್ತದೆ.

• ನೆಲದ ಮೇಲೆ ಕುಳಿತು ಊಟ ಮಾಡಿದರೆ ಆಹಾರವು ಚೆನ್ನಾಗಿ ಜೀರ್ಣವಾಗುವುದು, ಮನಸ್ಸಿಗೆ ಸಂತೋಷವುಂಟಾಗುವುದು ಮತ್ತು ದೇಹಕ್ಕೆ ವ್ಯಾಯಾಮ ಸಿಗುತ್ತದೆ.