ಕೇರಳ ಕೈದಿಗಳು ಮಾಡಿರುವ ಬಿರಿಯಾನಿ ಆನ್‌ಲೈನ್‌ನಲ್ಲಿ ಲಭ್ಯ

ತ್ರಿಶೂರ್‌,ಕೇರಳ: ಕೇರಳ ಜೈಲಿನಲ್ಲಿರುವ ಕೈದಿಗಳು ಮಾಡಿರುವ ಬಿರಿಯಾನಿ ಇದೀಗ ಆನ್‌ಲೈನ್‌ ಸೇಲ್‌ಗಿದೆ. ಜೈಲು ಅಧಿಕಾರಿಗಳು ಈ ಆನ್‌ಲೈನ್‌ ಸೇಲ್ ಮೊದಲ ಹಂತವಾಗಿ ಕೋಂಬೋ ಬಿರಿಯಾನಿಗೆ ರೂ. 127 ನಿಗದಿ ಮಾಡಲಾಗಿದ್ದು ಇದನ್ನು ವಿಯ್ಯೂರ್ ಸೆಂಟ್ರಲ್‌ ಜೈಲ್‌ನಲ್ಲಿ ತಯಾರಿಸಲಾಗುತ್ತದೆ.

ಈ ಬಿರಿಯಾನಿ ಕೋಂಬೋ ಅನ್ನು ಆನ್‌ಲೈನ್‌ ಮಾರಾಟಕ್ಕಾಗಿಯೇ ಸಿದ್ಧಪಡಿಸಲಾಗಿದೆ, ಒಂದು ಬಿರಿಯಾನಿಯಲ್ಲಿ 300 ಗ್ರಾಂ ಅನ್ನ, ಒಂದು ರೋಸ್ಟ್ ಮಾಡಿದ ಚಿಕನ್ ಲೆಗ್, 3 ಚಪಾತಿ, ಒಂದು ಕಪ್ ಕೇಕ್, ಸಲಾಡ್, ಉಪ್ಪಿನಕಾಯಿ ಹಾಗೂ ಇದನ್ನು ಬಡಿಸಿ ತಿನ್ನಲು ಬಾಳಲೆಯನ್ನು ನೀಡಲಾಗುವುದು.

ಫ್ರೀಡಂ ಫುಡ್‌ ಫ್ಯಾಕ್ಟರಿ ಈ ಉದ್ಯಮ ಮಾಡುತ್ತಿದ್ದು, 2011ರಿಂದಲೂ ಕೈದಿಗಳು ತಯಾರಿಸುವ ಆಹಾರವನ್ನು ಮಾರಾಟ ಮಾಡುತ್ತಿದೆ, ಆದರೆ ಇದೇ ಮೊದಲ ಬಾರಿಗೆ ಆನ್‌ಲೈನ್ ಮಾರುಕಟ್ಟೆಗೆ ಕಾಲಿಟ್ಟಿದೆ.

'ಆನ್‌ಲೈನ್‌ನಲ್ಲಿ ಆಹಾರ ಮಾರಾಟ ಮಾಡುವಂತೆ ಅಲ್ಲಿಯ ಡಿಜಿಪಿ ರಿಷಿರಾಜ್‌ ಸಿಂಗ್‌ ಸಲಹೆ ನೀಡಿದರು, ಅದರಂತೆ ನಾನ್‌ ವೆಜ್‌ ಕರಿ, ಬೇಕರಿ ಐಟಂಗಳನ್ನು ಮಾರಾಟ ಮಾಡಲಾಗುವುದು' ಎನ್ನುತ್ತಾರೆ ಅಲ್ಲಿಯ ಜೈಲಾಧಿಕಾರಿ ನಿರ್ಮಲಾನಂದನ್‌ ನಾಯರ್‌.

ಗ್ರಾಹಕರಿಂದ ಫೀಡ್‌ಬ್ಯಾಕ್‌ ಬಂದ ಮೇಲೆ ಇನ್ನು ಅಧಿಕ ಆಹಾರ ಐಟಂಗಳನ್ನು ತಯಾರಿಸಿ ಆನ್‌ಲೈನ್‌ ಮಾರುಕಟ್ಟೆಯಲ್ಲಿ ಬಿಡುವ ಚಿಂತನೆ ನಡೆಸುತ್ತಿದೆ.