ರಿಲ್ಯಾಕ್ಸ್‌ ನೀಡುವ ತೈಲಗಳ ಉಪಯೋಗ

ವೀಕೆಂಡ್‌ನಲ್ಲಿ ಮನಸ್ಸು ಹಾಗೂ ದೇಹವನ್ನು ರಿಲಾಕ್ಸ್‌ ಮಾಡಲು ಬಳಸುವ ತೈಲಗಳ ಸಂಕ್ಷಿಪ್ತ ವಿವರ ಇಲ್ಲಿದೆ.

ಸ್ಪಾಗೆ ಸಾವಿರಗಟ್ಟಲೇ ಹಣ ಸುರಿದು ಟ್ರೀಟ್‌ಮೆಂಟ್‌ ತೆಗೆದುಕೊಳ್ಳುವ ಬದಲು ಮನೆಯಲ್ಲಿರುವ ಕೆಲವು ಉಪಯುಕ್ತ ತೈಲಗಳನ್ನು ಬಳಸಿಕೊಂಡು ಮಸಾಜ್‌ ಮಾಡಿಕೊಂಡರೆ ರಿಲ್ಯಾಕ್ಸ್‌ ಮಾಡಬಹುದು. ಈ ಬಗ್ಗೆ ಎಕ್ಸ್‌ಪರ್ಟ್ಸ್ ಸಂಕ್ಷೀಪ್ತ ಮಾಹಿತಿ ನೀಡಿದ್ದಾರೆ.

ಲ್ಯಾವೆಂಡರ್‌ ಆಯಿಲ್‌

ಮಾನಸಿಕ ಒತ್ತಡ ಹಾಗೂ ಶರೀರದ ದುರ್ಬಲತೆಯನ್ನು ಹೋಗಲಾಡಿಸುವಲ್ಲಿ ಲ್ಯಾವೆಂಡರ್‌ ಆಯಿಲ್‌ನ ಪಾತ್ರ ಅತ್ಯಂತ ಪ್ರಮುಖವಾಗಿದೆ. ಇದರ ಬಳಕೆ ದೇಹಕ್ಕೆ ತಂಪು, ತಲೆಯ ಹೊಟ್ಟು ನಿವಾರಣೆ ಹಾಗೂ ಕೂದಲು ಸೊಂಪಾಗಿ ಬೆಳೆಯಲು ಸಹಕರಿಸುತ್ತದೆ. ಈ ತೈಲದ ಮಸಾಜ್‌ ನರ ದೌರ್ಬಲ್ಯವನ್ನು ಶಮನಗೊಳ್ಳುತ್ತದೆ. ಬಳಸುವ ವಿಧಾನ ಹೀಗಿದೆ. ಲ್ಯಾವೆಂಡರ್‌ ಆಯಿಲ್‌ನ ನಾಲ್ಕೈದು ಹನಿಯನ್ನು ಅಂಗೈ ಮೇಲೆ ಹಾಕಿಕೊಳ್ಳಿ. ನಂತರ ಕೈ, ಕಾಲು, ಪಾದಗಳಿಗೆ ಲೇಪಿಸಿ, ಮಸಾಜ್‌ ಮಾಡಿ, ನಿಮ್ಮಲ್ಲಿರುವ ಜಡತ್ವ ಮಾಯವಾಗುವುದರೊಂದಿಗೆ ಮನಸ್ಸಿಗೂ ಉಲ್ಲಾಸ ದೊರೆಯುತ್ತದೆ.

ಲೆಮನ್‌ ಗ್ರಾಸ್‌ ಆಯಿಲ್‌

ಹುಳಿಯ ಅಂಶವನ್ನು ಹೊಂದಿರುವ ಕಿತ್ತಳೆ ಅಥವಾ ನಿಂಬೆ ಹಣ್ಣಿನ ಫ್ಲೇವರ್‌ಇರುವಂತಹ ತೈಲ ಇದಾಗಿದೆ. ಬಳಕೆಯಿಂದ ರಕ್ತ ಸಂಚಾರ ಸುಗಮವಾಗುತ್ತದೆ. ರೋಗ ನಿರೋಧಕ ಶಕ್ತಿ ಹೆಚ್ಚುತ್ತದೆ. ನೋವು ನಿವಾರಕ, ಚರ್ಮರೋಗಕ್ಕೆ ರಾಮಬಾಣ, ಜೀರ್ಣಶಕ್ತಿಗೆ ಉಪಯುಕ್ತ ಹಾಗೂ ಗಾಯಗಳ ಒಣಗುವಿಕೆಯಲ್ಲಿ ಪ್ರಮುಖ ಪಾತ್ರವನ್ನು ವಹಿಸುತ್ತದೆ. ಸುವಾಸನೆಯಿಂದ ಕೂಡಿರುವುದರಿಂದ ಇದನ್ನು ಸುಗಂಧ ದ್ರವ್ಯದ ರೀತಿಯಲ್ಲೂ ಬಳಸಬಹುದು.

ಬಳಸುವ ವಿಧಾನ ಹೀಗಿದೆ. ಮಲಗುವಾಗ ಪಾದಗಳಿಗೆ ಈ ಎಣ್ಣೆಯನ್ನು ಸವರಿಕೊಂಡು ಮಲಗುವುದರಿಂದ ನಿದ್ದೆ ಚೆನ್ನಾಗಿ ಬರುತ್ತದೆ. ಕೊಬ್ಬರಿ ಎಣ್ಣೆಯೊಂದಿಗೆ ಇದನ್ನು ಬೆರೆಸಿ ಉಪಯೋಗಿಸಬಹುದು.

ರೋಸ್‌ಮೆರಿ ತೈಲ

ತಲೆಯ ಹೊಟ್ಟನ್ನು ನಿವಾರಣೆ ಮಾಡುವುದರೊಂದಿಗೆ ನೀಳವಾದ ಕಪ್ಪಾದ ಕೂದಲನ್ನು ಹೊಂದಲು ಇದು ಸಹಕಾರಿ. ಬಳಸುವ ವಿಧಾನ: ಮೂರರಿಂದ ನಾಲ್ಕು ಹನಿಯನ್ನು ತಲೆಯ ಕೂದಲಿನ ಬುಡಕ್ಕೆ ಹಚ್ಚಿ ಮಸಾಜ್‌ ಮಾಡಬೇಕು. ಸುಮಾರು ಎರಡರಿಂದ ಮೂರು ಗಂಟೆಗಳ ಕಾಲ ಎಣ್ಣೆ ಹಾಗೆಯೇ ಬಿಡಬೇಕು. ಅನಂತರ ಉಗುರು ಬೆಚ್ಚಗಿನ ನೀರಿನಲ್ಲಿ ಸ್ನಾನ ಮಾಡುವುದರಿಂದ ತಲೆಯಲ್ಲಿನ ಹೊಟ್ಟು ಮಾಯವಾಗುವುದರೊಂದಿಗೆ ಕೂದಲಿನ ಹೊಳಪು ಕೂಡ ಜಾಸ್ತಿಯಾಗುತ್ತದೆ.

ಕೊಬ್ಬರಿ ಎಣ್ಣೆ

ವಿಟಮಿನ್‌ ಇ ಅಂಶ ಹೇರಳವಾಗಿರುತ್ತದೆ. ಕೊಬ್ಬರಿ ಎಣ್ಣೆಯ ಮಸಾಜ್‌ ಮಾಡುವುದರಿಂದ ಕೈ-ಕಾಲಿನ ನೋವು, ಮಂಡಿ ನೋವು, ಪಾದಗಳ ಸೆಳೆತ ಮುಂತಾದವುಗಳಿಂದ ಮುಕ್ತಿ ಪಡೆಯಬಹುದು. ಚರ್ಮದ ಸುಕ್ಕುಗಟ್ಟುವಿಕೆಯನ್ನು ತಡೆಗಟ್ಟಬಹುದು.

----------------

ಬಾಕ್ಸ್‌

* ತೈಲಗಳನ್ನು ಬಳಸಿ, ಮಸಾಜ್‌ ಮಾಡುವುದರಿಂದ ಒತ್ತಡ ನಿವಾರಣೆಯಾಗುವುದು.

* ದೇಹಕ್ಕೆ ಪರಿಮಳಯುಕ್ತ ತೈಲದ ಕೆಲವು ಹನಿಗಳನ್ನು ಬಳಸಿ ಸ್ನಾನ ಮಾಡುವುದರಿಂದ ಫ್ರೆಶ್‌ ಫೀಲ್‌ ಆಗುವುದು.

* ದೇಹಕ್ಕೆ ಅಲರ್ಜಿವುಂಟು ಮಾಡುವ ಎಣ್ಣೆಗಳನ್ನು ಬಳಸದಿರುವುದು ಸೂಕ್ತ.