ಗರಿಗೆದರಿದ ಫ್ರೀಡಂ ಡೇ ಸಂಭ್ರಮ

ಬೆಂಗಳೂರು ಸೇರಿದಂತೆ ರಾಜ್ಯದ ಇತರೆಡೆ ಸ್ವಾತಂತ್ರ್ಯ ದಿನಾಚರಣೆಯ ಸಂಭ್ರಮ ಮುಗಿಲು ಮುಟ್ಟಿದೆ. ಪ್ರಮುಖ ಮಾಲ್‌ಗಳು, ಶಾಪಿಂಗ್‌ ಸ್ಟ್ರೀಟ್‌ಗಳು ತ್ರಿವರ್ಣದಿಂದ ಕಂಗೊಳಿಸುತ್ತಿವೆ.

ಬಬಿತಾ ಎಸ್‌.

ಈ ಬಾರಿ ಇಂಡಿಪೆಂಡೆನ್ಸ್‌ ಡೇ ವೀಕ್‌ ಡೇಯಲ್ಲಿ ಬಂದಿದ್ದರೂ ಜನರ ಉತ್ಸಾಹ ಮಾತ್ರ ಕಡಿಮೆಯಾಗಿಲ್ಲ. ಕಳೆದ ವೀಕೆಂಡ್‌ನಲ್ಲೇ ಆರಂಭವಾಗಿರುವ ಫ್ರೀಡಂ ಡೇ ಸಂಭ್ರಮಕ್ಕೆ ವಿವಿಧ ಮಾಲ್‌ಗಳು, ಶಾಪಿಂಗ್‌ ಮಳಿಗೆಗಳು, ರೆಸ್ಟೋರೆಂಟ್‌ಗಳೂ ಸಾಥ್‌ ನೀಡುತ್ತಿವೆ.

ಮಾಲ್‌ನಲ್ಲಿ ತ್ರಿವರ್ಣ ಥೀಮ್‌

ಪ್ರಮುಖ ಮಾಲ್‌ಗಳು ಕೇಸರಿ ಬಿಳಿ ಹಸಿರು ಬಣ್ಣಗಳ ಥೀಮ್‌ನಿಂದ ಅಲಂಕೃತಗೊಂಡಿವೆ. ಮಾಲ್‌ ಒಳಗೆ ಸ್ವಾತಂತ್ರ್ಯ ದಿನಾಚರಣೆ, ಸ್ವಾತಂತ್ರ್ಯ ನಾಯಕರು, ಸ್ವಾತಂತ್ರ್ಯ ಹೋರಾಟಕ್ಕೆ ಸಂಬಂಧಿಸಿದ ಘಟನೆಗಳನ್ನು ಪ್ರತಿಬಿಂಬಿಸುವ ಪ್ರತಿಕೃತಿಗಳನ್ನು ಅಲಂಕರಿಸಲಾಗಿದೆ. ಬಹುತೇಕ ಜನರು ಕುಟುಂಬ ಸಮೇತ ತ್ರಿವರ್ಣ ಥೀಮ್‌ನ ಅಲಂಕಾರ ನೋಡಲೆಂದೇ ಮಾಲ್‌ಗೆ ಭೇಟಿ ನೀಡುತ್ತಿದ್ದಾರೆ.

ತಿರಂಗಾ ಲೈಟಿಂಗ್‌

ಮಾಲ್‌ ಮಾತ್ರವಲ್ಲದೆ ಕೆಲವು ಪ್ರತಿಷ್ಠಿತ ಕಟ್ಟಡಗಳೂ ತ್ರಿವರ್ಣ ವಿದ್ಯುದ್ದೀಪ ಅಲಂಕಾರಗಳಿಂದ ಕಂಗೊಳಿಸುತ್ತಿವೆ. ಬೆಂಗಳೂರಿನ ದೇವನಹಳ್ಳಿ ವಿಮಾನ ನಿಲ್ದಾಣದಲ್ಲಿರುವ ಏರ್‌ ಟ್ರಾಫಿಕ್‌ ಕಂಟ್ರೋಲ್‌ ರೂಮ್‌ನ ಕಟ್ಟಡವೂ ತಿರಂಗಮಯವಾಗಿದೆ. ರಾತ್ರಿ ವೇಳೆ ಈ ತಿರಂಗಾ ಲೈಟಿಂಗ್‌ ಅತ್ಯಂತ ಆಕರ್ಷಕವಾಗಿ ಕಂಗೊಳಿಸಿ ಫ್ರೀಡಂ ಡೇ ಸಂಭ್ರಮವನ್ನು ಇಮ್ಮಡಿಸುತ್ತದೆ.

ಫ್ರೀಡಂ ಬ್ಯಾಂಡ್‌ಗೆ ಬೇಡಿಕೆ

ಸ್ವಾತಂತ್ರ್ಯ ದಿನಾಚರಣೆಯನ್ನು ತಮ್ಮದೇ ರೀತಿಯಲ್ಲಿ ಸಂಭ್ರಮಿಸುವ ಯಂಗ್‌ಸ್ಟರ್ಸ್‌ ತ್ರಿವರ್ಣ ಹ್ಯಾಂಡ್‌ ಬ್ಯಾಂಡ್‌, ಹ್ಯಾಟ್‌, ಬ್ಯಾಡ್ಜ್‌, ಇಯರ್‌ ಹ್ಯಾಂಗಿಂಗ್ಸ್‌, ಹೇರ್‌ ಬ್ಯಾಂಡ್‌ ಮತ್ತು ಇನ್ನಿತರ ಆ್ಯಕ್ಸೆಸರಿಗಳನ್ನು ಧರಿಸಿ ಖುಷಿ ಪಡುತ್ತಿದ್ದಾರೆ. ಕೆಲವರು ಕೇಸರಿ ಬಿಳಿ ಹಸಿರು ಬಣ್ಣಗಳ ಕಾಂಬಿನೇಷನ್‌ ಇರುವ ಟೀ ಶರ್ಟ್‌, ಸಲ್ವಾರ್‌ ಕಮೀಜ್‌, ದುಪಟ್ಟಾ, ಸೀರೆ ಧರಿಸಿ ಸಂಭ್ರಮಿಸಿದರೆ, ಇನ್ನು ಕೆಲವರು ಮುಖ, ತೋಳುಗಳ ಮೇಲೆ ತ್ರಿವರ್ಣ ಧ್ವಜವಿರುವ ಚಿತ್ರ ಮತ್ತು ಟ್ಯಾಟು ಮೂಡಿಸಿದ್ದಾರೆ.