ಅವೆಂಜರ್ಸ್‌ ಥೀಮ್‌ ಆ್ಯಕ್ಸೆಸರಿಗಳಿಗೆ ಸಿಕ್ಕಾಪಟ್ಟೆ ಡಿಮಾಂಡ್‌

ಹಾಲಿವುಡ್‌ನ ಅವೆಂಜರ್ಸ್‌ ಎಂಡ್‌ಗೇಮ್‌ ಸಿನಿಮಾ ಮಾತ್ರವಲ್ಲದೆ, ಅದರಲ್ಲಿ ಬರುವ ಪಾತ್ರ, ಹರಳು, ಹೆಲ್ಮೆಟ್‌, ಆಯುಧಗಳನ್ನು ಹೋಲುವ ಆ್ಯಕ್ಸೆಸರಿಗಳಿಗೂ ಬೇಡಿಕೆ ಬಂದಿದೆ.

ಬಬಿತಾ ಎಸ್‌.

ಜಗತ್ತಿನಾದ್ಯಂತ ಜನರು ಮುಗಿ ಬಿದ್ದು ನೋಡುತ್ತಿರುವ ಅವೆಂಜರ್ಸ್‌: ಎಂಡ್‌ಗೇಮ್‌ ಸಿನಿಮಾ ಗಳಿಕೆಯಲ್ಲಿ ಮಾತ್ರವಲ್ಲ, ಅದರ ಪ್ರತಿಯೊಂದು ಪಾತ್ರಗಳು, ದೈತ್ಯ ರಾಕ್ಷ ಸ ಥಾನೊಸ್‌ ಶಕ್ತಿ ಗಳಿಕೆಗೆ ಹುಡುವ ಹೊಳೆಯುವ ಹರಳುಗಳು, ಕ್ಯಾಪ್ಟನ್‌ ಅಮೆರಿಕ, ಐರನ್‌ ಮ್ಯಾನ್‌, ಕ್ಲಿಂಟ್‌ ಬಾರ್ಟನ್‌, ಬ್ಲ್ಯಾಕ್‌ ವಿಡೋ ಮುಂತಾದ ಪಾತ್ರಧಾರಿಗಳು ಧರಿಸಿರುವ ಹೆಲ್ಮೆಟ್‌, ಮಾಸ್ಕ್‌, ಆಯುಧಗಳನ್ನು ಹೋಲುವ ಅಲಂಕಾರಿಕ ವಸ್ತುಗಳು, ಸರ, ಬ್ರೇಸ್‌ಲೆಟ್‌ಗಳು ಇತ್ಯಾದಿಗಳಿಗೆ ಮಾರುಕಟ್ಟೆಯಲ್ಲಿ ಬಹು ಬೇಡಿಕೆ ಕಂಡು ಬಂದಿದೆ.

ಗೌಂಟ್ಲೆಟ್‌ ನ್ಯೂ ಎಂಟ್ರಿ

ಅವೆಂಜರ್ಸ್‌ನ ಈ ಮೊದಲಿನ ಸರಣಿಗಳು ಬಂದಾಗ ಹೆಲ್ಮೆಟ್‌, ಆಯುಧಗಳು, ಐರನ್‌ ಮ್ಯಾನ್‌, ಹಲ್ಕ್‌ ಮುಂತಾದವರನ್ನು ಹೋಲುವ ಪ್ರತಿಕೃತಿಗಳು ಜನಪ್ರಿಯವಾಗಿದ್ದವು. ಈ ಬಾರಿಯೂ ಇವೆಲ್ಲವೂ ಬೇಡಿಕೆಯಲ್ಲಿದೆ. ಜತೆಗೆ ಈ ಲಿಸ್ಟ್‌ಗೆ ಹೊಸದೊಂದು ಆ್ಯಕ್ಸೆಸರಿ ಎಂಟ್ರಿ ನೀಡಿದೆ. ಅದುವೇ ಗೌಂಟ್ಲೆಟ್‌. ಅವೆಂಜರ್ಸ್‌ ಎಂಡ್‌ಗೇಮ್‌ನಲ್ಲಿ ಮಧ್ಯ ಬಿಳಿ ಸ್ಟಾರ್‌, ಸುತ್ತ ನೀಲಿ, ಕೆಂಪು ಮತ್ತು ಬಿಳಿ ಬಣ್ಣದಿಂದ ಸುತ್ತುವರಿದಿರುವ ಈ ಆಯುಧದ ಪ್ರತಿಕೃತಿಯೂ ಮಾರುಕಟ್ಟೆಯಲ್ಲಿ ಕಾಣಿಸಿಕೊಂಡಿದೆ. ಜನರು ಇದನ್ನು ಮುಗಿ ಬಿದ್ದು ಖರೀದಿಸುತ್ತಿದ್ದಾರೆ.

ಇನ್ಫಿನಿಟಿ ಹರಳಿನ ಆಭರಣ

ಅವೆಂಜರ್ಸ್‌ ಸಿನಿಮಾದ ಮುಖ್ಯ ಹೈಲೈಟ್ಸ್‌ ಆಗಿರುವ ವಿವಿಧ ಬಣ್ಣಗಳ ಇನ್ಫಿನಿಟಿ ಹರಳುಗಳು ಪ್ರತಿಯೊಬ್ಬರಿಗೂ ಇಷ್ಟವಾಗಿವೆ. ಈ ಕಾರಣ ಇಂಥ ಹರಳುಗಳನ್ನು ಹೋಲುವ ಹರಳುಗಳಿಂದ ಮಾಡಿದ ನೆಕ್‌ ಪೀಸ್‌, ಬ್ರೇಸ್‌ಲೆಟ್‌, ಫಿಂಗರ್‌ ರಿಂಗ್‌ಗಳು ವಿನ್ಯಾಸಗೊಂಡಿವೆ. ಜನರು ಇಂಥ ಹರಳುಗಳ ಆಭರಣಗಳ ಧರಿಸಿ ತಾವು ಅಪ್ಪಟ ಅವೆಂಜರ್ಸ್‌ ಅಭಿಮನಿಗಳು ಎಂದು ತೋರಿಸಿಕೊಳ್ಳುತ್ತಿದ್ದಾರೆ.

ಹೆಲ್ಮೆಟ್‌ ಮತ್ತು ಮಾಸ್ಕ್‌

ಅವೆಂಜರ್ಸ್‌ ಸಿನಿಮಾ ನೋಡಿದ ಪ್ರತಿಯೊಬ್ಬರಿಗೂ ತಾವು ಕ್ಯಾಪ್ಟನ್‌ ಅಮೆರಿಕ, ಕ್ಯಾಪ್ಟನ್‌ ಮಾರ್ವೆಲ್‌, ವಾಸ್ಪ್‌ನಂತಾಗಬೇಕು ಎಂದು ಕನಸು ಕಾಣುವುದು ಸಹಜ. ಮುಖ್ಯವಾಗಿ ಮಕ್ಕಳಿಗೆ ಈ ಫ್ಯಾಂಟಸಿ ಪಾತ್ರಧಾರಿಗಳೆಂದರೆ ಸಿಕ್ಕಾಪಟ್ಟೆ ಕ್ರೇಜ್‌. ಅಂಥವರನ್ನು ಗಮನದಲ್ಲಿಟ್ಟುಕೊಂಡು ಆ ಪಾತ್ರಧಾರಿಗಳು ಆ ಸಿನಿಮಾಗಳಲ್ಲಿ ಧರಿಸಿರುವ ವಿವಿಧ ಹೆಲ್ಮೆಟ್‌ ಮತ್ತು ಮಾಸ್ಕ್‌ಗಳೂ ಮಾರುಕಟ್ಟೆಗೆ ಬಂದಿವೆ. ಮಕ್ಕಳು ಇಂಥ ಹೆಲ್ಮೆಟ್‌, ಮಾಸ್ಕ್‌ಗಳನ್ನು ಖರೀದಿಸಿ ಧರಿಸಿ ಸಂಭ್ರಮಿಸುವ ದೃಶ್ಯ ಸಾಮಾನ್ಯವಾಗಿದೆ.

ಟೀ ಶರ್ಟ್‌ ಮತ್ತು ಮಗ್‌

ಈ ಸಿನಿಮಾದ ವಿಭಿನ್ನ ಪಾತ್ರಧಾರಿಗಳ ಪ್ರಿಂಟ್‌ಗಳಿರುವ ಟೀ ಶರ್ಟ್‌, ಮಗ್‌ಗಳು, ಟ್ಯಾಟು, ಸ್ಟಿಕ್ಕರ್‌ಗಳೂ ಜನರಿಗೆ ಇಷ್ಟವಾಗಿವೆ. ಅವೆಂಜರ್ಸ್‌ ಪಾತ್ರಧಾರಿಗಳ ಟೀ ಶರ್ಟ್‌ ಧರಿಸುವುದು ಈಗ ಹೊಸ ಫ್ಯಾಷನ್‌ ಕೂಡಾ ಹೌದು. ಯುವತಿಯರು ಉಗುರುಗಳಿಗೆ ಅವೆಂಜರ್ಸ್‌ ಥೀಮ್‌ನ ಡಿಸೈನ್‌ ಬಿಡಿಸಿ ಈ ಸಿನಿಮಾ ಕುರಿತಾದ ತಮ್ಮ ಅಭಿಮಾನ ಪ್ರದರ್ಶಿಸುತ್ತಿದ್ದಾರೆ.