ವೆಸ್ಟರ್ನ್‌ ವಿನ್ಯಾಸಕ್ಕೂ ಎಂಟ್ರಿ ನೀಡಿದ ವರ್ಲಿ ಚಿತ್ತಾರ

ವರ್ಲಿ ಚಿತ್ತಾರಗಳು ಇದೀಗ ಇಂಟಿರಿಯರ್‌ ವಿನ್ಯಾಸದಲ್ಲಿ ಟ್ರೆಂಡಿಯಾಗಿವೆ, ಕೇವಲ ಮನೆಯೊಳಗಿನ ವಿನ್ಯಾಸದಲ್ಲಿ ಮಾತ್ರವಲ್ಲ,ಹೋಟೆಲ್‌, ರೆಸ್ಟೊರೆಂಟ್‌ ಹಾಗೂ ಅನೇಕ ಪಬ್ಲಿಕ್‌ ಸ್ಪಾಟ್‌ಗಳಲ್ಲಿ, ಕ್ಯಾಂಪಸ್‌ಗಳಲ್ಲಿ ಕಾಣಿಸಿಕೊಳ್ಳತೊಡಗಿವೆ.

ಕಾಲೇಜು ಕ್ಯಾಂಪಸ್‌ ಹಾಗೂ ದೊಡ್ಡ ಆಟದ ಮೈದಾನಗಳ ಕಾಂಪೌಟ್‌ಗಳ ಮೇಲೆ ಮಾತ್ರ ಕಾಣಿಸಿಕೊಳ್ಳುತ್ತಿದ್ದ ವರ್ಲಿ ಚಿತ್ತಾರದ ನಾನಾ ಸೂಕ್ಷ್ಮ ಕಲಾತ್ಮಕ ಚಿತ್ತಾರಗಳು ಇದೀಗ ಮನೆಯೊಳಗಿನ ಗೋಡೆ ಹಾಗೂ ಇಂಟೀರಿಯರ್‌ ಡೆಕೋರೇಟ್‌ ಮಾಡುವಂತಹ ವಸ್ತುಗಳ ಮೇಲೂ ವ್ಯಾಪಿಸಿಕೊಂಡಿವೆ.

ಗ್ರಾಮೀಣ ಸೊಗಡಿನ ಅಲಂಕಾರಿಕ ವಸ್ತು: ವರ್ಲಿ ಚಿತ್ತಾರವಿರುವ ಇಂಡೋ-ವೆಸ್ಟರ್ನ್‌ ಶೈಲಿಯ ಬಿಗ್‌ ಪಾಟ್‌, ವಾಝ್‌ ಹಾಗೂ ಕಾರ್ನರ್‌ ಹೂಜಿಗಳು, ವರ್ಲಿ ಪ್ರಿಂಟೆಡ್‌ ವಾಲ್‌ ಹ್ಯಾಂಗಿಂಗ್ಸ್‌, ವರ್ಲಿ ಸ್ಟ್ಯಾಂಡ್ಸ್‌, ವರ್ಲಿ ಸ್ಟಕ್ಚರ್‌ನ ಸ್ಕಲ್ಪ್ಚರ್‌, ಯುನಿಕ್‌ ವರ್ಲಿ ಡಾಲ್‌, ಪೇಪರ್‌ ಸ್ಟ್ಯಾಂಡ್‌ ಸೇರಿದಂತೆ ನಾನಾ ಬಗೆಯವು ಮಾರುಕಟ್ಟೆಯಲ್ಲಿ ದೊರೆಯುತ್ತಿವೆ. ಸಂತಸದ ವಿಚಾರವೆಂದರೆ, ವರ್ಲಿ ಮೇಲಿನ ಚಿತ್ತಾರಗಳಿಗೆ ಮಾತ್ರ ಸೀಮಿತವಾಗಿದ್ದ ವರ್ಲಿ ಡಿಸೈನ್‌ ಇದೀಗ ಊಹೆಗೂ ಮೀರಿದ ಒಳಾಂಗಣ ವಸ್ತುಗಳ ಮೇಲೆ ಆಕರ್ಷಕವಾಗಿ ಮೂಡತೊಡಗಿದೆ. ಬಗೆಬಗೆಯ ಅಲಂಕಾರಿಕ ವಸ್ತುಗಳ ಮೇಲೆ ವರ್ಲಿ ಚಿತ್ತಾರ ಹೊಸ ಸಂಚಲನ ಸೃಷ್ಟಿಸಿದೆ. ಅಲಂಕಾರಿಕ ವಸ್ತುಗಳ ಮೇಲಿರುವ ವರ್ಲಿ ಚಿತ್ತಾರದ ಗ್ರಾಮೀಣ ಸೊಗಡು ಜನರಿಗೆ ಇಷ್ಟವಾಗುತ್ತವೆ.

ಕಲಾತ್ಮಕ ವರ್ಲಿ: ಗ್ರಾಮೀಣ ಪ್ರದೇಶದ ಒಂದು ಸಾಂಪ್ರದಾಯಿಕ ಕಲೆಯಾಗಿರುವ ವರ್ಲಿ ಚಿತ್ತಾರ ಇದೀಗ ಮಾಡರ್ನ್‌ ಮನೆಗಳ ಒಳಾಂಗಣ ವಿನ್ಯಾಸದಲ್ಲೂ ಸೇರಿದೆ. ಇಂಡೋ-ವೆಸ್ಟರ್ನ್‌ ಕಾನ್ಸೆಪ್ಟ್‌ನ ಭಾಗವಾಗಿದ್ದು, ಕಲಾಪ್ರಿಯರಿಗೆ ಇದು ಆಕರ್ಷಿಸಿದೆ.

ವರ್ಲಿ ಚಿತ್ತಾರದಲ್ಲಿ ಇದೀಗ ಮಾನವಾಕೃತಿ, ಕಡ್ಡಿ, ಹಣ್ಣು, ಹೂವು, ಎಲೆ, ಸಂಗೀತ ಕಚೇರಿ, ನಾನಾ ಬಗೆಯ ಉಪಕರಣಗಳು, ನೃತ್ಯದ ಭಂಗಿ ಸೇರಿದಂತೆ ನಾನಾ ಬಗೆಯವು ಸಾಕಷ್ಟು ಒಳಾಂಗಣದ ಲಿವಿಂಗ್‌ ಹಾಗೂ ಬಾಲ್ಕನಿಯ ಗೋಡೆಗಳ ಮೇಲೆ ಮೇಳೈಸಿವೆ. ವರ್ಲಿ ಕಲಾವಿದರು ಹೇಳುವಂತೆ, ಈ ಕಲೆಯಲ್ಲಿ ಗ್ರಾಮೀಣ ಜೀವನಶೈಲಿಯ ಚಿತ್ರಣಗಳು ತೆರೆದುಕೊಳ್ಳುತ್ತವೆ. ಮದುವೆ, ಬೇಟೆ, ಬೇಸಾಯ, ಮೀನುಗಾರಿಕೆ, ನೃತ್ಯ ಮುಂತಾದ ಥೀಮ್‌ಗಳನ್ನು ಅತ್ಯಂತ ಸೂಕ್ಷ ್ಮವಾಗಿ ಬಿಡಿಸಲಾಗುವ ಈ ಚಿತ್ತಾರಗಳಲ್ಲಿ ಒಂದು ರೀತಿಯ ಜೀವಂತಿಕೆ ಕಾಣುತ್ತದೆ. ಈ ಅಪರೂಪದ ಕಲೆ ಮೊದಲು ಫ್ಯಾಷನ್‌ ಕ್ಷೇತ್ರವನ್ನು ಆಕ್ರಮಿಸಿಕೊಂಡಿತ್ತು. ಇದೀಗ ಇಂಟೀರಿಯರ್‌ ಡಿಸೈನರ್‌ಗಳ ಮನ ಗೆದ್ದಿದೆ. ಅವರೀಗ ತಮ್ಮ ಪ್ಲಾನ್‌ಗಳಲ್ಲಿ ಹಾಗೂ ಇಂಡಿಯನ್‌ ವಿನ್ಯಾಸದಲ್ಲಿ ವರ್ಲಿ ಪ್ರಿಂಟ್‌ ಡಿಸೈನ್‌ಗಳನ್ನು ಚಿತ್ತಾರಗಳನ್ನು ಸೇರಿಸಿಕೊಂಡಿದ್ದಾರೆ.

ವರ್ಲಿ ಆರ್ಟ್‌ ವಿನ್ಯಾಸ ಪ್ರಿಯರಿಗೆ 3 ಟಿಫ್ಸ್‌

1. ಒಳಾಂಗಣಕ್ಕೆ ಅಪ್ಪಟ ದೇಸಿ ಲುಕ್‌ ನೀಡುವ ವರ್ಲಿ ವಿನ್ಯಾಸವನ್ನು ಮನೆಯ ವಿನ್ಯಾಸಕ್ಕೆ ಸೂಟ್‌ ಆಗುವಂತೆ ನೋಡಿಕೊಳ್ಳಿ.
2. ನೋಡಲು ಒಂದೇ ತರಹನಾಗಿ ಕಂಡರೂ ಚಿತ್ತಾರ ವಿಭಿನ್ನವಾಗಿರುತ್ತದೆ.
3. ಚಿತ್ತಾರಗಳನ್ನು ಮೂಡಿಸುವಾಗ ಗುಣಮಟ್ಟದ ವರ್ಣಗಳನ್ನು ಬಳಸಿ.