ಮಳೆಗಾಲಕ್ಕೆ 4 ಬಗೆಯ ವ್ಯಾಯಾಮ

ಮಳೆಗಾಲದಲ್ಲಿ ಮಾಡಬಹುದಾದ ಕೆಲವು ವ್ಯಾಯಾಮಗಳಿವೆ. ಕೊಂಚ ಸಮಯದಲ್ಲಿ ದೇಹದಲ್ಲಿನ ಕೊಬ್ಬಿನ ಅಂಶವನ್ನು ಕರಗಿಸಬಹುದಾದ ವ್ಯಾಯಾಮಗಳನ್ನು ಮನೆಯಲ್ಲೆ ಮಾಡಬಹುದು. ಅದರಲ್ಲೂ ಸದಾ ಬ್ಯುಸಿಯಾಗಿರುವ ವ್ಯಕ್ತಿಗಳು ಈ ವ್ಯಾಯಾಮವನ್ನು ರೂಢಿಸಿಕೊಳ್ಳಬಹುದು. ಇದರಿಂದ ಮಳೆಗಾಲದಲ್ಲೂ ದೇಹವನ್ನು ಸುಸ್ಥಿತಿಯಲ್ಲಿಟ್ಟುಕೊಳ್ಳಬಹುದು ಎನ್ನುತ್ತಾರೆ ಫಿಟ್ನೆಸ್‌ ಎಕ್ಸ್‌ಪರ್ಟ್‌ ವನಿತಾ ಅಶೋಕ್‌.

1. ಪ್ಲಾಂಕ್‌/ಪುಶ್‌ ಅಪ್‌

3 ನಿಮಿಷಗಳ ವ್ಯಾಯಾಮವಿದು. ದೇವಾಲಯಗಳಲ್ಲಿ ಹುಡುಗರು ಸಾಷ್ಟಾಂಗ ಮಾಡುವ ಭಂಗಿಯಲ್ಲಿ, ಭುಜದ ಕೆಳಗೆ ಕೈಗಳ ಮೇಲೆ ದೇಹದ ಭಾರ ಹಾಕಿ ಕನಿಷ್ಟ 30 ಸೆಕೆಂಡ್‌ಗಳವರೆಗೆ ಅದೇ ಭಂಗಿಯಲ್ಲಿರಬೇಕು. ನಂತರ 15 ಬಾರಿ ಪುಶ್‌ ಅಪ್‌ ಮಾಡಬೇಕು.

2. ಬೈಸೆಫ್ಸ್‌ ಕರ್ಲ್‌

ಡಂಬೆಲ್ಸ್‌ ಇಲ್ಲವೇ ವಾಟರ್‌ ಬಾಟಲ್‌ ಕೈಗಳಲ್ಲಿ ಹಿಡಿದು 8 ಬಾರಿ ಕೈಗಳಿಂದ ಎತ್ತುವ ವ್ಯಾಯಾಮ ಮಾಡಿ. ಮಂಡಿಯೂರಿ ಹತ್ತು ಬಾರಿ ಬೈಸೆಫ್ಸ್‌ ಕರ್ಲ್ಸ್ ರಿಪೀಟ್‌ ಮಾಡಿ.

3. ವಿಂಡ್‌ಮಿಲ್‌

ಮುಖವನ್ನು ಮೇಲ್ಭಾಗಕ್ಕೆ ಎತ್ತಿ. ಹೊಟ್ಟೆ ಭಾಗವನ್ನು ಒಳಗೆ ಎಳೆದಿಟ್ಟುಕೊಳ್ಳಿ. ಕೈಗಳನ್ನು ಹರಡಿ. ಸೊಂಟದ ಭಾಗವನ್ನು ಬಲಭಾಗದ ಕಾಲಿನ ಬೆರಳಿನವರೆಗೆ ಬಗ್ಗಿಸಿ ಮತ್ತೆ ಎದ್ದೇಳಿ. ಇದನ್ನು 25 ಬಾರಿ ಪುನರಾವರ್ತಿಸಿ. ಒಮ್ಮೆ ಬಲಭಾಗದ ಕಡೆ, ಮತ್ತೊಮ್ಮೆ ಎಡಭಾಗ ಹೀಗೆ ಪುನರಾವರ್ತಿಸಿ.

4. ಚೆಸ್ಟ್‌ ಫ್ಲೈ

ಮುಖವನ್ನು ಮೇಲೆತ್ತಿ. ಮಂಡಿಯೂರಿ. ಡಂಬಲ್ಸ್‌ ಕೈಗಳಲ್ಲಿಡಿದು ಎದೆಭಾಗದ ಹತ್ತಿರ ದೂರ ಹಿಡಿಯುತ್ತಾ ವ್ಯಾಯಾಮ ಮಾಡಿ.