ರಾತ್ರಿ ಪಾಳಿಯಿಂದ ಮೆನೋಪಾಸ್

ರಾತ್ರಿ ಪಾಳಿ ಕೆಲಸದಿಂದಾಗಿ ಅವಧಿಪೂರ್ವ ಋತುಬಂಧ ಅಥವಾ ಮೆನೋಪಾಸ್‌ಗೆ ಒಳಗಾಗಬೇಕಾಗುತ್ತದೆ ಎಂದು ಸಂಶೋಧನೆಯೊಂದು ಎಚ್ಚರಿಕೆ ನೀಡಿದೆ.

ರಾತ್ರಿ ಪಾಳಿ ಕೆಲಸ ಹಲವು ಆರೋಗ್ಯ ಸಮಸ್ಯೆಗಳಿಗೆ ಆಹ್ವಾನ ನೀಡುತ್ತದೆ. ಅವುಗಳಲ್ಲೊಂದು ಋತುಬಂಧ. 20 ತಿಂಗಳಿಗೂ ಹೆಚ್ಚು ಕಾಲ ಸತತವಾಗಿ ರಾತ್ರಿ ಪಾಳಿಯಲ್ಲಿ ಕೆಲಸ ನಿರ್ವಹಿಸುತ್ತಿರುವ ಮಹಿಳೆಯು 9% ರಷ್ಟು ಅವಧಿಗೆ ಮುನ್ನ ಋತುಬಂಧಕ್ಕೆ ಒಳಗಾಗಬೇಕಾಗುತ್ತದೆ ಎನ್ನಲಾಗಿದೆ. ಈ ಸಂಬಂಧ ಇನ್ನಷ್ಟು ಅಧ್ಯಯನಗಳು ನಡೆಯಬೇಕಿದೆ.

ಒತ್ತಡ ಸೇರಿದಂತೆ ಹಲವು ಕಾರಣಗಳು ಇದಕ್ಕೆ ಕಾರಣ ಎನ್ನುತ್ತಾರೆ ತಜ್ಞರು.

ಮಧುಮೇಹಕ್ಕೂ ರಹದಾರಿ

ರಾತ್ರಿ ಪಾಳಿಯಲ್ಲಿ ಕೆಲಸ ಮಾಡುವ ಮಹಿಳೆಯರಲ್ಲಿ ಟೈಪ್‌ 2 ಮಧುಮೇಹದ ಸಾಧ್ಯತೆ ಕೂಡ ಹೆಚ್ಚು ಎಂದು ಎಚ್ಚರಿಸಿದೆ ಸಂಶೋಧನೆ. ರಾತ್ರಿ ಪಾಳಿ ಹಲವು ಆರೋಗ್ಯ ಸಮಸ್ಯೆಗಳನ್ನು ಒಳಗೊಂಡಿರುತ್ತದೆ. ಅದರಲ್ಲೂ ಕೆಟ್ಟ ಜೀವನಶೈಲಿ ನಿಮ್ಮದಾಗಿದ್ದು, ರಾತ್ರಿ ಪಾಳಿಯಲ್ಲಿ ದೀರ್ಘ ಕಾಲ ದುಡಿಯುತ್ತೀರ ಎಂದರೆ ಮಧುಮೇಹ ನಿಮ್ಮನ್ನು ಕಾಡುವ ಸಾಧ್ಯತೆ ಹೆಚ್ಚು. ಆದ್ದರಿಂದ ರಾತ್ರಿ ಪಾಳಿಯ ಅನಿವಾರ‍್ಯ ಇದ್ದಾಗ ಆರೋಗ್ಯಕರ ಜೀವನಶೈಲಿ ಅನುಸರಿಸುವುದನ್ನು ಮರೆಯಬೇಡಿ ಎನ್ನುತ್ತಾರೆ ತಜ್ಞರು.

ಟೈಪ್ 2 ಮಧುಮೇಹ ಇರುವವರಿಗೆ ರಕ್ತದಲ್ಲಿನ ಗ್ಲೂಕೋಸ್ ಮಟ್ಟವನ್ನು ನಿಯಂತ್ರಣದಲ್ಲಿ ಇಟ್ಟುಕೊಳ್ಳುವುದು ತುಂಬಾ ಕಷ್ಟವಾಗುತ್ತದೆ. ಹೀಗಾಗಿ ಈ ಹಂತದ ಮಧುಮೇಹ ಇರುವ ವ್ಯಕ್ತಿಗಳು ರಾತ್ರಿ ಪಾಲಿಯಲ್ಲಿ ಕೆಲಸ ಮಾಡಬಾರದು ಎಂದು ಅಧ್ಯಯನಗಳು ಹೇಳಿವೆ.

ದಿನದಲ್ಲಿ ಕೆಲಸ ಮಾಡುವವರು ಅಥವಾ ನಿರುದ್ಯೋಗಿಗಳಿಗಿಂತ ರಾತ್ರಿ ಪಾಳಿಯಲ್ಲಿ ಕೆಲಸ ಮಾಡುವವರು ನಿದ್ರೆಯ ಸಮಯ ಹಾಗೂ ನಿದ್ರಾ ಕ್ರಮದಲ್ಲಿ ಆಗುವಂತಹ ಏರುಪೇರಿನಿಂದಾಗಿ ಸಮಸ್ಯೆಯಾಗುತ್ತದೆ ಎಂದು ಅಧ್ಯಯನವು ಹೇಳಿದೆ.