ನೀವು ಕುಳಿತುಕೊಂಡು ಕೆಲಸ ಮಾಡುತ್ತೀರ?

ಇತ್ತೀಚಿನ ದಿನಗಳಲ್ಲಿ ಕಂಪ್ಯೂಟರ್ ಮುಂದೆ ಕುಳಿತು ಮಾಡುವ ಕೆಲಸಗಳೇ ಹೆಚ್ಚಾಗಿವೆ. ಕೆಲವರಂತೂ ಒಮ್ಮೆ ಕುಳಿತುಕೊಂಡರೆ ಮೂರು, ನಾಲ್ಕು ಗಂಟೆ ಕುರ್ಚಿಯಿಂದ ಮೇಲೇಳದೆ ಕೆಲಸ ಮಾಡುತ್ತಾರೆ. ಅದರಿಂದೇನು ಸಮಸ್ಯೆ ಅಂದುಕೊಂಡರೆ ಅದು ತಪ್ಪಾಗುತ್ತದೆ. ಆದರೆ ಹೆಚ್ಚು ಹೊತ್ತು ಕುಳಿತು ಕೊಳ್ಳುವುದು ಆರೋಗ್ಯಕ್ಕೆ ಮಾರಕ ಎಂಬ ಸತ್ಯ ನಿಮಗೆ ಗೊತ್ತೇ?

ಎಲ್ಲಿಯೂ ತಿರುಗಾಡದೇ ನೀವು ಒಂದು ಕಡೆ ಕುಳಿತೇ ಕೆಲಸ ಮಾಡುವವರಾದಲ್ಲಿ ನಿಮಗೆ ಒಂದಿಷ್ಟು ಫಿಸಿಕಲ್‌ ಆ್ಯಕ್ಟಿವಿಟಿ ಅವಶ್ಯ. ನಿಮ್ಮ ದೇಹ ರಿಲಾಕ್ಸ್‌ ಆಗಲು ಒಂದಿಷ್ಟು ಓಡಾಟ ಅತ್ಯಗತ್ಯ ಎನ್ನುತ್ತಾರೆ ಫಿಟ್ನೆಸ್‌ ಎಕ್ಸ್‌ಪರ್ಟ್ಸ್. ಅಷ್ಟೇ ಅಲ್ಲದೆ ಒಂದೆಡೆ ಕುಳಿತುಕೊಂಡೇ ಇರುವುದರಿಂದ ಬೊಜ್ಜು, ಮಧುಮೇಹ, ಹೃದಯ ಸಂಬಂಧಿ ಕಾಯಿಲೆಗಳು, ಕ್ಯಾನ್ಸರ್ ಒಕ್ಕರಿಸುವ ಸಾಧ್ಯತೆ ಹೆಚ್ಚು. ಅಷ್ಟೇ ಅಲ್ಲ ಗಂಟು ಮತ್ತು ಮಾಂಸಖಂಡಗಳ ನೋವೂ ಕಾಣಿಸಿಕೊಳ್ಳುತ್ತದೆ.

ಕುಳಿತುಕೊಂಡೇ ಮಾಡುವ ಕೆಲಸ ನಿಮ್ಮದಾಗಿದ್ದಲ್ಲಿ, ದೈಹಿಕ ಚಟುವಟಿಕೆಗಳಿಗಾಗಿ ಇದನ್ನು ರೂಢಿಸಿಕೊಳ್ಳಿ

• ಕಚೇರಿಗೆ ಹತ್ತಿ ಇಳಿಯುವಾಗ ಲಿಫ್ಟ್ ಬಳಸುವ ಬದಲು ಮೆಟ್ಟಿಲು ಬಳಸಿ

• ಸದಾ ಕುಳಿತೇ ಕೆಲಸ ಮಾಡುವ ಬದಲು ಮಧ್ಯೆ ಮಧ್ಯೆ ನಿಂತುಕೊಳ್ಳಿ.

• 30 ನಿಮಿಷಕ್ಕಿಂತ ಹೆಚ್ಚು ಹೊತ್ತು ಕುಳಿತಿರಲೇಬೇಡಿ. ಅರ್ಧ ಗಂಟೆಗೊಮ್ಮೆ ಎದ್ದು ಹೋಗಿ. ಕನಿಷ್ಠ ಪಕ್ಷ ವಾಶ್ ರೂಮ್‌ಗೆ ಹೋಗಿ ಮುಖಕ್ಕೆ ನೀರು ಹಾಕಿಕೊಂಡು ಬನ್ನಿ. ಇದರಿಂದ ಕಣ್ಣಿಗೂ ಹಿತವೆನಿಸುತ್ತದೆ.

ಕುಳಿತುಕೊಂಡು ಕೆಲಸ ಮಾಡುವುದು ನಿಮ್ಮ ಮೆದುಳಿನ ಆರೋಗ್ಯ, ಮಾನಸಿಕ ಆರೋಗ್ಯಕ್ಕೂ ಮಾರಕ ಎನ್ನುತ್ತಾರೆ ತಜ್ಞರು. ಹೆಚ್ಚು ಸಮಯ ಒಂದೆಡೆ ಕುಳಿತು ಕೆಲಸ ಮಾಡುವುದರಿಂದ ಮಿದುಳಿನ ಕ್ರಿಯಾಶೀಲತೆಗೆ ತೊಡಕಾಗಿ ಖಿನ್ನತೆ, ಡಿಮೆನ್ಸಿಯಾ ಅಪಾಯದ ಸಾಧ್ಯತೆ ಹೆಚ್ಚುತ್ತದೆ ಎನ್ನಲಾಗುತ್ತದೆ.