ವ್ಯಾಲೆಂಟೈನ್ಸ್‌ ಡೇ ಸುಮಹೂರ್ತ-ಕಲ್ಯಾಣ ಮಂಟಪಗಳಿಗೆ ಭಾರೀ ಡಿಮಾಂಡ್‌

ಸುನಯನ ಸುರೇಶ್‌
ವ್ಯಾಲೆಂಟೈನ್ಸ್‌ ಡೇ ದಿನ ಮದುವೆಯಾಗುವ ಟ್ರೆಂಡ್‌ ಬೆಂಗಳೂರಿನಲ್ಲಿ ಹೆಚ್ಚಾಗುತ್ತಿದೆ.

ಪ್ರೇಮಿಗಳಿಗೆ ಹಾಗೂ ರಿಲೇಷನ್‌ಶಿಪ್‌ನಲ್ಲಿರುವವರಿಗೆ ಪ್ರಪೋಸ್‌ ಮಾಡಲು, ಎಂಗೇಜ್‌ಮೆಂಟ್‌ ಇಲ್ಲವೇ ಮದುವೆ ಮಾಡಿಕೊಳ್ಳಲು ವ್ಯಾಲೆಂಟೈನ್ಸ್‌ ಡೇ ಪ್ರಶಸ್ತ ದಿನವೆಂದು ಅನೇಕರು ಭಾವಿಸಿರುವುದು ಇದಕ್ಕೆ ಕಾರಣ.

ಪ್ರೇಮಿಗಳಿಗೆ ಎಲ್ಲೆ ಎಲ್ಲಿ? ನವಜೋಡಿಗಳಿಗೆ ಹೊಸ ಜೋಷ್‌ ಕೊಡೋದೆ ವ್ಯಾಲೆಂಟೈನ್ಸ್‌ ಡೇ. ರಿಲೇಷನ್‌ಶಿಪ್‌ ಅನ್ನು ಹೊಸಮಟ್ಟಕ್ಕೆ ಎಂಗೇಜ್‌ಮೆಂಟ್‌ ಅಥವಾ ವೆಡ್ಡಿಂಗ್‌ ಮೂಲಕ ಕೊಂಡೊಯ್ಯಲು ಅದುವೇ ಮೆಟ್ಟಿಲು. ಇತ್ತೀಚೆಗೆ ಈ ದಿನ ಪ್ರೇಮಿಗಳು ಒಂದಾಗೋದು ಶುಭ ಅನ್ನೋದು ಅವರ ನಂಬಿಕೆಯಾಗಿದೆ.

ಜೋತಿಷ್ಯಿಗಳ ಅನಿಸಿಕೆ

'ಶ್ರೀಕೃಷ್ಣ ಜನಿಸಿದಾಗ ಆಗಸದಲ್ಲಿ ನಕ್ಷತ್ರಗಳು ಜೋಡಿಯಾಗಿದ್ದವಂತೆ. ಅದಕ್ಕೆ ನಿದರ್ಶನವೆನ್ನುವಂತೆ ಇಂದು (ವ್ಯಾಲೆಂಟೈನ್ಸ್‌ ಡೇ) ಆಗಸದಲ್ಲಿ ರೋಹಿಣಿ ನಕ್ಷತ್ರ ಹೆಚ್ಚು ಪ್ರಕಾಶಮಾನವಾಗಿರುತ್ತದೆ. ಗುರುವಿನ ದೃಷ್ಟಿ ಚಂದ್ರನ ಮೇಲಿರುತ್ತದೆ. ಹಾಗಾಗಿ ಇಂದು ಬೆಳಗ್ಗೆ 11ರಿಂದ ಮಧ್ಯಾಹ್ನ ರೊಳಗೆ ಮದುವೆಯಾಗುವುದು ಶುಭ. ಈ ಘಳಿಗೆಯಲ್ಲಿ ಕಂಕಣ ಕಟ್ಟಿದವರು ಜೀವನಪರ್ಯಂತ ಹ್ಯಾಪಿಯಾಗಿರ್ತಾರೆ. ಹಾಗಾಗಿ ವ್ಯಾಲೆಂಟೈನ್ಸ್‌ ಡೇ ದಿನದಂದು ವಿವಾಹವಾಗೋದು ತುಂಬಾ ಒಳ್ಳೆಯದು ' ಎನ್ನುತ್ತಾರೆ ಖ್ಯಾತ ಜ್ಯೋತಿಷಿ ಎಸ್‌.ಕೆ.ಜೈನ್‌.

ಭರ್ಜರಿ ಡಿಮಾಂಡ್‌

ಬಹುತೇಕರು ಪ್ರೇಮಿಗಳ ದಿನದಂದು ಮದುವೆ ಆಗುತ್ತಿರುವುದರಿಂದ ಎರಡು ರೀತಿಯ ಲಾಭವಿದೆ. ವೃಶ್ಚಿಕ ರಾಶಿಯಲ್ಲಿ ಗುರು ಗ್ರಹದ ಪ್ರಭಾವ ಈ ದಿನದಂದೇ ಇರುವುದು ವಿಶೇಷ ಎಂದು ವಿವರಿಸುತ್ತಾರೆ ಅವರು.

'ಪ್ರೇಮಿಗಳ ದಿನದಂದೇ ವಿವಾಹವಾಗುವುದು ಬಹುತೇಕರ ಬಯಕೆ. ಹಾಗೆಂದೇ ಇಂದು ಬೆಂಗಳೂರಿನ ಬಹುತೇಕ ಕಲ್ಯಾಣ ಮಂಟಪ ಹಾಗೂ ಪಾರ್ಟಿಹಾಲ್‌ಗಳಿಗೆ ಭರ್ಜರಿ ಡಿಮಾಂಡ್‌ ಬಂದಿದೆ. ಮದುವೆ ಸಂಭ್ರಮಕ್ಕೆ ವ್ಯಾಲೆಂಟೈನ್ಸ್‌ ಡೇ ಜೋಷ್‌ ಆ್ಯಡೆಡ್‌ ಫ್ಲೇವರ್‌. ಆ ಕಾರಣ ನಾವು ಅವರಿಗೇ ಫಸ್ಟ್‌ ಪ್ರಿಫರೆನ್ಸ್‌ ಕೊಡ್ತೀವಿ' ಎನ್ನುತ್ತಾರೆ ಕ್ಯಾಟರರ್‌ ಗಣೇಶ್‌ ನಾಯಕ್‌.

ಹಾಲ್‌ಗಳು ಭರ್ತಿ

ಮೋಸ್ಟ್‌ ಪ್ರಿಫರ್ಡ್‌ ವೆಡ್ಡಿಂಗ್‌ ಡೇ ಇದಾದ್ದರಿಂದ ಪಾರ್ಟಿ ಹಾಲ್‌ಗಳು ಭರ್ತಿಯಾಗಿವೆ. ಸಾಂಪ್ರದಾಯಿಕ ಮನೋಭಾವ ಉಳ್ಳವರೂ ಶುಭ ಘಳಿಗೆ ಇದೆಂದು ನಂಬುವುದರಿಂದ ಕಲ್ಯಾಣ ಮಂಟಪಗಳಿಗೆ ಮುಗಿ ಬೀಳುತ್ತಿದ್ದಾರೆ. ಹಾಗೆಂದೇ ಡಿಮಾಂಡ್‌ ಹೆಚ್ಚಿದೆ. ಮುಂಗಡ ಬುಕ್ಕಿಂಗ್‌ ಆದ ಕಾರಣ ಅದೆಷ್ಟೋ ಮಂದಿ ನಿರಾಶರಾಗಿ ಹಿಂದಿರುಗಿದ್ದಾರೆ ಎನ್ನುತ್ತಾರೆ ಪ್ಯಾಲೇಸ್‌ಗ್ರೌಂಡ್‌ನ ವೆಡ್ಡಿಂಗ್‌ಹಾಲ್‌ನ ಮಾಲೀಕರೊಬ್ಬರು.