ಹೆಚ್ಚಿನವರು ಫ್ಯಾನ್ಸಿ ಸ್ಪಾಗಳಿಗಿಂತ ಲೋಕಲ್‌ ಸಲೂನ್‌ಗೆ ಹೋಗುವುದೇಕೆ ಗೊತ್ತೆ?

ಸಲೂನ್‌ಗಳಿಗೆ ಹೈಟೆಕ್‌ ಸ್ಪರ್ಶ ಬಂದು ಬಹಳ ಕಾಲವಾಗಿಯಿತು. ಅಲ್ಲಲ್ಲಿ ಫ್ಯಾನ್ಸಿ ಸ್ಪಾಗಳು ನೆಲೆಯಾಗಿವೆ. ಲಕ್ಸುರಿ ಸೆಲೂನ್‌ಗಳು ಕೈ ಬೀಸಿ ಕರೆಯುತ್ತಿವೆ. ಹೇರ್‌ ಕಟ್ಟಿಂಗ್‌ ಮಾಡಲು ವಿಶೇಷ ಕೋರ್ಸ್‌ಗಳನ್ನು ಮಾಡಿದ ತಜ್ಞರು ಕಾಣಿಸುತ್ತಿದ್ದಾರೆ. ಚಿತ್ರವಿಚಿತ್ರ ಹೇರ್‌ಸ್ಟೈಲ್‌ಗಳಿರುವ ಪಟ್ಟಿಯನ್ನೇ ಕೈಗಿತ್ತು ಯಾವ ರೀತಿ ಬೇಕು ಎಂದು ಕೇಳುತ್ತಿದ್ದಾರೆ.

ಕಟ್ಟಿಂಗ್‌ಗೆ ದೊಡ್ಡವರಿಗೆ 20 ರೂ. ಚಿಕ್ಕವರಿಗೆ 10 ರೂ. ತೆಗೆದುಕೊಳ್ಳುತ್ತಿದ್ದ ಕಾಲ ಕಳೆದು ಹಲವು ವರ್ಷಗಳೇ ಸಂದಿವೆ. ಗಡ್ಡವನ್ನು ಸೆಟ್‌ ಮಾಡಿಸಬೇಕು ಎಂದರೂ ಕನಿಷ್ಠ 50 ರೂ. ಚಾರ್ಜ್‌ ಮಾಡುತ್ತಾರೆ. ಗಡ್ಡಕ್ಕೆ ಶೇಪ್‌ ಕೊಡಿ ಎಂದರೆ ಇತ್ತೀಚೆಗೆ ಬಂದ ಕೆಜಿಎಫ್‌ ಚಿತ್ರದ ನಟ ಯಶ್‌ ಗಡ್ಡದ ವಿನ್ಯಾಸವನ್ನು ಸೇರಿಸಿ ಹಲವು ಸ್ಟೈಲ್‌ಗಳನ್ನು ಒದರುತ್ತಾರೆ.

ಈ ಎಲ್ಲಾ ಹೈಟೆಕ್‌ ಸ್ಪರ್ಶ, ತರಹೇವಾರಿ ಸ್ಟೈಲ್‌ಗಳ ನಡುವೆ ಹೆಚ್ಚಿನವರು ಸ್ಥಳೀಯ ಸೆಲೂನ್‌ಗಳಿಗೆ ಹೋಗಲು ಬಯಸುತ್ತಾರೆ. ದುಡ್ಡಿನ ವಿಚಾರಕ್ಕಾಗಿ ಅಲ್ಲ, ಕಂಫರ್ಟ್‌ಗಾಗಿ. ಇಲ್ಲಿವೆ ನೋಡಿ ಕೆಲವು ಕಾರಣಗಳು.

1. ಕಟ್ಟಿಂಗ್‌ ಮಾಡುವವ ಚಿರಪರಿಚಿತನಾಗಿದ್ದು, ನೀವು ಹೇಳುವ ಮೊದಲೇ ನಿಮಗೆ ಹೇಗೆ ಕಟ್ಟಿಂಗ್‌ ಮಾಡಬೇಕು ಎಂದು ತಿಳಿದುಕೊಂಡು ಕೆಲಸ ಆರಂಭಿಸುತ್ತಾನೆ.
2. ಕಟ್ಟಿಂಗ್‌ ಮಾಡುವವನು ಹೋಟೆಲ್‌ನಲ್ಲಿ ವೈಟರ್‌ ತಿನಿಸುಗಳನ್ನು ಒದರಿದಂತೆ ಆಡದೆ, ಸೀಮಿತ ನಾಲ್ಕೈದು ವಿನ್ಯಾಸಗಳನ್ನಷ್ಟೇ ಹೇಳುತ್ತಾನೆ.
3. ಒಂದು ಬಾರಿ ಕಟ್ಟಿಂಗ್‌ ಮಾಡಿಸಿಕೊಂಡರೆ ಕನಿಷ್ಠ 1 ತಿಂಗಳು ಆ ಕಡೆ ತಲೆ ಹಾಕಬೇಕೆಂದಿಲ್ಲ.
4. ಹೈಟೆಕ್‌ ಸೆಲೂನ್‌ಗಳಲ್ಲಿ ಕಟ್ಟಿಂಗ್‌ ಮಾಡಿಸಿಕೊಂಡ ದಿನವಷ್ಟೇ ಚಂದ ಎಂದೆನಿಸುತ್ತದೆ. ಮರು ದಿನ ಕಟ್ಟಿಂಗ್‌ ಮಾಡಿಸಿದ್ದೆನೆಯೋ ಇಲ್ಲವೋ ಎಂಬ ಅನುಮಾನ ಕಾಡುವಂತೆ ತಲೆಕೂದಲು ಇರುತ್ತದೆ!
5. ಕಟ್ಟಿಂಗ್‌ ಮಾಡುವವ ಆತನಿಗೆ ಹೇಗೆ ಬೇಕೋ ಹಾಗೆ ಮಾಡದೆ ಗ್ರಾಹಕರಿಗೆ ಹೇಗೆ ಬೇಕು ಹಾಗೆ ಮಾಡಿಕೊಡುತ್ತಾನೆ.
6. ಆಗಾಗ ಬಂದು ಮೀಸೆ ಸೆಟ್ಟಿಂಗ್‌ ಮಾಡಿಸಿಕೊಂಡು ಹೋದರೂ ಸ್ಥಳೀಯ ಸೆಲೂನ್‌ಗಳಲ್ಲಿ ಕಾಸು ಕೇಳುವುದಿಲ್ಲ.
7. ಸ್ಥಳೀಯ ಸೆಲೂನ್‌ಗಳಲ್ಲಿ ಆಗಾಗ ಬಂದು ಕೂಂಬ್‌ ಮಾಡಿದರೂ, ಸ್ಪ್ರೇಗಳನ್ನು ಬಳಸಿದರೂ ಏನೂ ಹೇಳುವುದಿಲ್ಲ.
8. ಮಕ್ಕಳಿಗಾದರೆ ಕಡಿಮೆ ದುಡ್ಡು ತೆಗೆದುಕೊಳ್ಳುತ್ತಾರೆ.
9. ಸ್ಪಾ, ಬ್ಯೂಟಿ ಪಾರ್ಲರ್‌ಗಳಿರುವುದು ಮಹಿಳೆಯರಿಗೆ ಮಾತ್ರ ಎಂದು ಹೆಚ್ಚಿನ ಮಂದಿ ನಂಬಿದ್ದಾರೆ.
10. ಫ್ಯಾನ್ಸಿ ಸ್ಪಾ, ಬ್ಯೂಟಿ ಪಾರ್ಲರ್‌ಗಳಿಗೆ ಹೋದರೆ ಮೇಕಪ್‌ ಎನಿಸಿಕೊಳ್ಳುತ್ತದೆ, ನ್ಯಾಚುರಲ್‌ ಎಂದೆನಿಸುವುದಿಲ್ಲ ಎಂಬ ನಂಬಿಕೆ.
11. ಹೈಟೆಕ್‌ ಸೆಲೂನ್‌ಗಳಲ್ಲಿ ಕಟ್ಟಿಂಗ್‌ ಮಾಡುವ ಹೆಚ್ಚಿನವರಿಗೆ ಸ್ಥಳೀಯ ಭಾಷೆ ಬರುವುದಿಲ್ಲ. ಹಾಗಾಗಿ ಅವರು ಪರಕೀಯರು ಎಂದೆನಿಸುತ್ತದೆ.
12. ಕಂಕುಳ ಕೂದಲನ್ನು ತೆಗೆಯಲು ನಿರಾಕರಿಸುವುದಿಲ್ಲ ಮತ್ತು ಎಕ್ಸ್‌ಟ್ರಾ ಚಾರ್ಜ್‌ ಮಾಡುವುದಿಲ್ಲ.
13. ಗೋಲ್ಡನ್‌ ಫೇಶಿಯಲ್‌, ಸಿಲ್ವರ್‌ ಫೇಶಿಯಲ್‌ ಎಂದೆಲ್ಲ ಅನಗತ್ಯ ಸೇವೆಗಳ ಬಗ್ಗೆ ತಲೆ ತಿನ್ನುವುದಿಲ್ಲ.