ಮಾಧುರಿ ದೀಕ್ಷಿತ್‌ ಮುಖದ ನೈಸರ್ಗಿಕ ಹೊಳಪಿಗೆ ಕಾರಣ ಏನು ಗೊತ್ತೇ?

ಬಾಲಿವುಡ್‌ನ ಧಕ್‌ ಧಕ್‌ ಹುಡುಗಿ, ಮಾಧುರಿ ದೀಕ್ಷಿತ್, ಭಾರತೀಯ ಚಿತ್ರರಂಗದಲ್ಲಿ ಅಚ್ಚಳಿಯದ ಹೆಸರು. ಅದ್ಭುತ ಸೌಂದರ್ಯವತಿ ಹಮ್ ಆಪ್ಕೆ ಹೈ ಕೌನ್ ಚೆಲುವೆ. ಈಗ ಅವರಿಗೆ ಬರೋಬ್ಬರಿ 51 ವರ್ಷ. ಆದರೆ ಅವರಿನ್ನೂ 30ರ ಆಸುಪಾಸಿನ ವಯಸ್ಸಿನವರಂತೆ ಕಂಗೊಳಿಸುತ್ತಾರೆ. ಅದರಂತೆ ಫಿಟ್ನೆಸ್‌ನ್ನು ಕೂಡ ಕಾದುಕೊಂಡಿದ್ದಾರೆ ಅವರು.
ಹೊಳೆಯುವ ವದನದ ರಹಸ್ಯವೇನು ಎಂದು ಕೇಳಿದಾಗ ತಾರೆ ಉತ್ತರಿಸಿದ್ದು ಹೀಗೆ: ''ಸೌಂದರ್ಯಕ್ಕೆ ಮುಳುವಾಗುವಂತಹ ಯಾವುದೇ ದುರಭ್ಯಾಸಗಳು ನನಗಿಲ್ಲ. ನಾನು ಧೂಮಪಾನ ಮಾಡುವುದಿಲ್ಲ ಮತ್ತು ಕುಡಿಯುವುದಿಲ್ಲ. ಇದು ನನ್ನ ಸೌಂದರ್ಯ ಕಾಪಾಡಲು ಪೂರಕವಾಗಿರುವ ಅಂಶ. ವ್ಯಾಯಾಮ ಮತ್ತು ಡಯಟ್‌ಗೆ ನಾನು ಬಹಳ ಮಹತ್ವ ಕೊಡುತ್ತೇನೆ''.

ಎಳನೀರಿಗೆ ಆದ್ಯತೆ

ಸುಂದರ ನಗುವಿನ ಒಡತಿ ಮಾಧುರಿ ದೀಕ್ಷಿತ್‌ ಅವರ ಸೌಂದರ್ಯದ ಗುಟ್ಟೇನು ಗೊತ್ತೇ? ಆರೋಗ್ಯಕರ ಜೀವನ ಶೈಲಿ. ದೇಹಕ್ಕೆ ತಂಪು ನೀಡುವ ಎಳನೀರಿನ ಸೇವನೆಯನ್ನು ಅವರೆಂದು ಮಿಸ್ ಮಾಡೋದಿಲ್ಲವಂತೆ. ಕಡಿಮೆ ಕ್ಯಾಲೊರಿಯ ಸಿಹಿಯಿರುವ ಎಳನೀರು ದೇಹ ತೂಕ ಕಡಿಮೆ ಮಾಡಿ ಚಯಾಪಚಯ ಕ್ರಿಯೆಯನ್ನು ಹೆಚ್ಚಿಸುತ್ತದೆ ಎಂಬ ಕಾರಣಕ್ಕೆ ಮಾಧುರಿ ದೀಕ್ಷಿತ್‌ ನಿಯಮಿತವಾಗಿ ಎಳನೀರು ಸೇವಿಸುತ್ತಲೇ ಇರುತ್ತದೆ. ಅವರ ಮುಖದಲ್ಲಿ ಸದಾ ಚಿಮ್ಮುವ ನೈಸರ್ಗಿಕ ಹೊಳಪಿಗೂ ಎಳನೀರು ಕಾರಣವಂತೆ.

ತಾಜಾ ಹಣ್ಣು

ಮಾಧುರಿ ದೀಕ್ಷಿತ್‌ ಅವರು ವಿದೇಶದಲ್ಲಿದ್ದಾಗಲೂ ತಮ್ಮ ಮನೆಯಲ್ಲಿ ಭಾರತೀಯ ಆಹಾರಗಳನ್ನೇ ತಯಾರಿಸಿ ಕುಟುಂಬ ಸದಸ್ಯರಿಗೆ ಉಣಬಡಿಸುತ್ತಿದ್ದರಂತೆ. ಭಾರತೀಯ ಆಹಾರ ಸಂಸ್ಕೃತಿಯನ್ನು ತುಂಬಾ ಗೌರವಿಸುವ ಅವರು ಸಾಧ್ಯವಾದಷ್ಟು ಮಾರುಕಟ್ಟೆಯಿಂದ ಆಗಲೇ ತಂದ ತಾಜಾ ತರಕಾರಿಗಳ ಅಡುಗೆ ಮಾಡಲು ಇಷ್ಟಪಡುತ್ತಾರೆ. ತರಕಾರಿ ಮಾತ್ರವಲ್ಲ, ಫ್ರೆಶ್‌ ಹಣ್ಣುಗಳನ್ನೂ ತುಂಬಾ ಸೇವಿಸುವ ಅವರು ತಾಜಾ ಹಣ್ಣು, ತರಕಾರಿಗಳೇ ತಮ್ಮ ಸುಂದರ ಮೈಕಾಂತಿಯ ರಹಸ್ಯ ಎಂದು ಸಂದರ್ಶನವೊಂದರಲ್ಲಿ ಹೇಳಿಕೊಂಡಿದ್ದಾರೆ.

ಹರ್ಬಲ್‌ ಟೀ ಡಿಟಾಕ್ಸ್‌

ಚಹಾ ಪ್ರಿಯೆಯೂ ಆಗಿರುವ ಮಾಧುರಿ ಇತ್ತೀಚೆಗೆ ಹರ್ಬಲ್‌ ಚಹಾ ಸೇವನೆಯನ್ನು ರೂಢಿಸಿಕೊಂಡಿದ್ದಾರೆ. ಈ ಕುರಿತ ಫೋಟೋಗಳನ್ನು ಇನ್‌ಸ್ಟಾಗ್ರಾಮ್‌ನಲ್ಲಿ ಶೇರ್‌ ಮಾಡಿಕೊಂಡಿರುವ ಅವರು ಈ ಚಹಾ ಸೇವನೆಯಿಂದ ದೇಹದ ಕಲ್ಮಶಗಳೆಲ್ಲಾ ಹೋಗಿ ದೇಹಕ್ಕೆ ಚೈತನ್ಯ ಸಿಗುತ್ತದೆ ಎಂದು ಹೇಳಿದ್ದಾರೆ.

ಅವರಿಗೇನು ತಿನ್ನಲು ಇಷ್ಟ?

ಅವರು ಮೂಲತಃ ಮಹಾರಾಷ್ಟ್ರೀಯನ್‌ ಶೈಲಿಯ ದೇಸಿ ಆಹಾರಗಳನ್ನು ತುಂಬಾ ಇಷ್ಟಪಡುತ್ತಾರೆ. ಇದನ್ನು ಹೊರತುಪಡಿಸಿ ಬೇರೆ ಏನಾದರೂ ತಿನ್ನಬೇಕೆಂದು ಅನಿಸಿದರೆ ಅವರ ಫಸ್ಟ್‌ ಚಾಯ್ಸ್‌ ಪಾಪ್‌ಕಾರ್ನ್‌ ಅಂತೆ. ತಾವು ಪಾಪ್‌ಕಾರ್ನ್‌ ತಿನ್ನುತ್ತಿರುವ ಫೋಟೋಗಳನ್ನು ಆಗಾಗ ಸೋಷಿಯಲ್‌ ಮೀಡಿಯಾದಲ್ಲಿ ಶೇರ್‌ ಮಾಡಿಕೊಳ್ಳುವ ಅವರು, ಈ ಪುಟ್ಟ ಪುಟ್ಟ ಪಾಪ್‌ಕಾರ್ನ್‌ ತಿನ್ನುವುದರಲ್ಲಿಯೇ ನನಗೆ ಕೆಲವೊಮ್ಮೆ ದೊಡ್ಡ ಖುಷಿ ಸಿಗುತ್ತದೆ. ಚಹಾ ಜತೆ ಕ್ಯಾರಮೆಲ್‌ ಪಾಪ್‌ಕಾರ್ನ್‌ ತಿನ್ನುವ ಖುಷಿಯೇ ಅದ್ಭುತ ಎಂದು ಅವರು ಇನ್‌ಸ್ಟಾಗ್ರಾಮ್‌ನಲ್ಲಿ ಬರೆದುಕೊಂಡಿದ್ದಾರೆ.

ರುಚಿ ರುಚಿಯಾದ ಆಹಾರ ಸೇವನೆ ಮಾತ್ರವಲ್ಲ, ಆಹಾರಗಳನ್ನು ಕಲಾತ್ಮಕವಾಗಿ ಅಲಂಕಾರ ಮಾಡುವುದು ಕೂಡ ನನಗಿಷ್ಟ-ಮಾಧುರಿ ದೀಕ್ಷಿತ್‌, ನಟಿ