ಹೊಟ್ಟಿನ ಸಮಸ್ಯೆಗೆ ಮುಕ್ತಿ ಕೊಡಿ

ಗೊತ್ತಿದ್ದೋ ಗೊತ್ತಿಲ್ಲದೆಯೋ ಪ್ರತಿನಿತ್ಯ ಕೂದಲು ಉದುರುವುದು ಹೆಚ್ಚಾಗಿರುತ್ತದೆ. ತಲೆಯಲ್ಲಿ ಲೆಕ್ಕವಿಲ್ಲದಷ್ಟು ಹೊಟ್ಟುಗಳು ಜೀವ ಹಿಂಡುತ್ತಿರುತ್ತವೆ. ಆಗಾಗ ತುರಿಕೆ, ಕಿರಿಕಿರಿ ಹುಟ್ಟಿಸಿಬಿಡುತ್ತವೆ. ಅವುಗಳಿಂದ ಪಾರಾಗುವುದೇನು ಕಷ್ಟವಲ್ಲ. ಆದರೆ ಕಂಡಕಂಡ ಶಾಂಪೂ ಬಳಸಿ ಕೂದಲ ಆರೋಗ್ಯ ಹಾಳು ಮಾಡಿಕೊಳ್ಳಬೇಡಿ. ಹೊಟ್ಟನ್ನು ಹೋಗಲಾಡಿಸಲು ಮನೆಯಲ್ಲೇ ಇರೋ ಔಷಧ ಬಳಸಿ ಸಾಕು.

ಕೊಬ್ಬರಿ ಎಣ್ಣೆ ಮತ್ತು ಈರುಳ್ಳಿ ಸೇರಿಸಿ ಕಾಯಿಸಿ. ಈ ಎಣ್ಣೆಯನ್ನು ತಲೆಗೆ ತಿಕ್ಕಿ. ಅನಂತರ ಹೆಸರು ಹಿಟ್ಟು ಮತ್ತು ಅನ್ನ ಬಸಿದ ನೀರಿನಿಂದ ತೊಳೆದುಕೊಳ್ಳಿ.

ಬಾದಾಮಿ ಎಣ್ಣೆ ಮತ್ತು ನೆಲ್ಲಿಕಾಯಿ ರಸವನ್ನು ತಲೆ ಬುರುಡೆಗೆ ಬೆರಳಿನಿಂದ ಉಜ್ಜಿ.

ಆಲಿವ್‌ ಎಣ್ಣೆ, ನಿಂಬೆರಸ ಹಾಗೂ ಕೊಬ್ಬರಿ ಎಣ್ಣೆಯನ್ನು ತಲೆಗೆ ಹಚ್ಚಿಕೊಳ್ಳಿ. ಬಿಸಿ ನೀರಿನಲ್ಲಿ ಅದ್ದಿ ಹಿಂಡಿದ ಟವೆಲ್‌ನ್ನು ತಲೆಗೆ 15 ನಿಮಿಷಗಳ ಕಾಲ ಸುತ್ತಿಕೊಳ್ಳಿ.

ಮೆಂತ್ಯೆ ಹಾಗೂ ಸಾಸಿವೆ ಪೇಸ್ಟ್‌ ಹಚ್ಚಿಕೊಳ್ಳಿ.

ದಾಸವಾಳದ ಎಲೆಗಳನ್ನು ತೆಗೆದುಕೊಂಡು ಅದಕ್ಕೆ ನೀರು ಹಾಗೂ ಮೊಸರು ಹಾಕಿ ರುಬ್ಬಿಕೊಂಡು ತಲೆಗೆ ಹಚ್ಚಿ ಅರ್ಧ ಗಂಟೆ ಬಿಟ್ಟು ಸ್ನಾನ ಮಾಡಿ.

ಕರಿಬೇವಿನ ಎಲೆಗಳನ್ನು ಎಣ್ಣೆಯ ಜತೆ ಸೇರಿಸಿ ವಾರಕ್ಕೆರಡು ಬಾರಿ ತಲೆಗೆ ಹಚ್ಚಿಕೊಳ್ಳಿ.

ಹುಣಸೆಹಣ್ಣಿನ ನೀರಿಗೆ ಸ್ವಲ್ಪ ಬೆಲ್ಲ ಸೇರಿಸಿ ಕುದಿಸಿ ತಲೆ ಸ್ನಾನ ಮಾಡಿ.