ಬಾಣಂತನದ ನಂತರ ಸ್ಲೀಮ್ ಆಗೋದು ಹೇಗೆ?

ತಾಯ್ತನವನ್ನು ಅನುಭವಿಸುವುದು ಸಾಮಾನ್ಯವಾಗಿ ಪ್ರತಿ ಹೆಣ್ಣಿಗೂ ವಿಶೇಷ ಅನಭೂತಿ ನೀಡುವ, ಖುಷಿಯ ವಿಚಾರವೇ. ಆದರೆ ಈ ಸಂದರ್ಭದಲ್ಲಿ ಹೆಚ್ಚಿರುವ ತೂಕವನ್ನು ಕಳೆದುಕೊಳ್ಳುವುದೇ ಆಧುನಿಕ ಮಹಿಳೆಯರಿಗೆ ದೊಡ್ಡ ತಲೆನೋವಾಗಿ ಕಾಡುತ್ತದೆ.

ಮಗುವಾದ ನಂತರ ಬಹುತೇಕ ತಾಯಂದಿರು ಮೊದಲಿನ ದೇಹ ತೂಕ ಹೊಂದಿರುವುದಿಲ್ಲ. ಅದೇ ರೀತಿ ದೇಹದ ಆಕಾರದಲ್ಲ್ಲೂ ಸಾಕಷ್ಟು ಬದಲಾವಣೆ ಆಗುತ್ತದೆ. ಇದೇ ಕಾರಣಕ್ಕೆ ಹಲವರು ಕೊರಗುತ್ತಾರೆ. ಮೊದಲಿನಂತಾಗಲು ಕೃತಕ ವಿಧಾನಗಳಿಗೆ ಮೊರೆ ಹೋಗುತ್ತಾರೆ. ಅನೇಕ ಅಡ್ಡ ಪರಿಣಾಮಗಳನ್ನು ಎದುರಿಸುತ್ತಾರೆ. ಆದರೆ ಮಗುವಾದ ನಂತರ ಮೊದಲಿನಂತೆ ನಿಮ್ಮ ದೇಹವನ್ನು ಮರಳಿ ಪಡೆಯಬಹುದು. ಯಾವುದೇ ಕೃತಕ ಮಾರ್ಗವನ್ನು ಅನುಸರಿಸದೆ ಎದೆ ಹಾಲು ಕೊಡುವ ಹಾಗೂ ಸೂಕ್ತ ಜೀವನಶೈಲಿ ಅನುಸರಿಸುವುದರಿಂದ ತೂಕವನ್ನು ನಿಯಂತ್ರಿಸಬಹುದು.

ತಾಯ್ತನದ ಬೊಜ್ಜನ್ನು ಕರಗಿಸಿ

ತಾಯಿಯು ಮಗುವಿಗೆ ಹಾಲೂಣಿಸುವುದರಿಂದ ದಿನಕ್ಕೆ 300-500 ಕ್ಯಾಲೋರಿ ಅನ್ನು ಕೂತಲ್ಲೇ ಕರಗಿಸಬಹುದು. ಮಗು ಹುಟ್ಟಿದ ಕ್ಷ ಣದಿಂದ 6 ತಿಂಗಳ ಕಾಲ ಎದೆ ಹಾಲು ಮತ್ತು ಎರಡು ವರ್ಷದವರೆಗೆ ತಾಯಿಯ ಹಾಲಿನ ಜೊತೆ ಪೂರಕ ಆಹಾರ ಕೊಡುವುದರಿಂದ ಮಗುವು ಆರೋಗ್ಯವಾಗಿ ಬೆಳೆಯುವುದರ ಜೊತೆಗೆ ನಿಮ್ಮ ತಾಯ್ತನದ ಬೊಜ್ಜು ಕರಗಿ ಹೋಗುತ್ತದೆ. ಮಗುವಿಗೆ ಹಾಲುಣಿಸುವ ತಾಯಂದಿರಿಗೆ ಮೊದಲ ಆರು ತಿಂಗಳು 550 ಕ್ಯಾಲೋರಿ ಮತ್ತು 6 ರಿಂದ 12 ತಿಂಗಳವರೆಗೆ 400 ಕ್ಯಾಲೋರಿ ಮಾತ್ರ ಹೆಚ್ಚಿಗೆ ಬೇಕಾಗುತ್ತದೆ. ಊಟದಲ್ಲಿ ಹಣ್ಣು ತರಕಾರಿ, ಮೊಟ್ಟೆ , ಸೊಪ್ಪು ಉಪಯೋಗಿಸಿ. ನೀರನ್ನು ಹೆಚ್ಚಾಗಿ ಸೇವಿಸಿ. ಕರಿದ ಪದಾರ್ಥಗಳಿಂದ ದೂರವಿರಿ.

ಕ್ಯಾನ್ಸರ್‌ ತಡೆಗಟ್ಟಲು ಸಹಕಾರಿ

ಎದೆ ಹಾಲೂಣಿಸುವವರಲ್ಲಿ ಸ್ತನದ ಮತ್ತು ಆಂಡಾಶಯ ಕ್ಯಾನ್ಸರ್‌ ಬರುವ ಸಾಧ್ಯತೆ ಕಡಿಮೆ. ಹೆರಿಗೆಯ ತಕ್ಷ ಣವೇ ಹಾಲೂಣಿಸುವುದರಿಂದ ಹೆರಿಗೆಯ ಸಂದರ್ಭದಲ್ಲಿ ಆಗುವ ರಕ್ತಸ್ರಾವ ಮತ್ತು ತದನಂತರದ ನಿಶ್ಯಕ್ತಿ ಕಡಿಮೆಯಾಗುವುದು. ಮೊದಲ ಆರು ತಿಂಗಳು ಮುಟ್ಟಾಗಿಸದೆ ಗರ್ಭ ನಿರೋಧಕವಾಗಿ ಕೆಲಸ ಮಾಡುತ್ತದೆ. ಮಗುವನ್ನು ಆರೋಗ್ಯವಾಗಿಟ್ಟು ತಾಯಿಯ ಖಿನ್ನತೆ ದೂರ ಮಾಡುತ್ತದೆ.