ಫ್ರೆಕ್ಕ್ಲೆಸ್ ಎಂದರೇನು?
ಬಿಸಿಲಿಗೆ ಹೆಚ್ಚಾಗಿ ಮೈ ಒಡ್ಡಿದಷ್ಟೂ ಚರ್ಮದ ಮೇಲೆ ಕಂದು ಬಣ್ಣದ ಸಣ್ಣ ಸಣ್ಣ ಕಲೆಗಳು ಇದ್ದಕ್ಕಿದ್ದಂತೆ ಗೋಚರವಾಗಲು ಪ್ರಾರಂಭವಾಗುತ್ತದೆ. ನೋಡಲು ಥೇಟ್ ಮೊಡವೆ ತರಹವೇ ಕಂಡು ಬರುವ ಇವುಗಳು ಹೆಚ್ಚಾಗಿ ಮುಖ, ತೋಳುಗಳು ಮತ್ತು ಭುಜದ ಮೇಲೆ ಕಂಡು ಬರುತ್ತದೆ. ಇವುಗಳಲ್ಲಿ ಹೆಚ್ಚಾಗಿ ಮೆಲನಿನ್ ಪಿಗ್ಮೆಂಟ್ ಶೇಖರಣೆಯಾಗಿದ್ದು, ಚರ್ಮದ ಬಹಳಷ್ಟು ಕೋಶಗಳು ಒಟ್ಟುಗೂಡಿ ಫ್ರೆಕ್ಕ್ಲೆಸ್ ಉಂಟು ಮಾಡುತ್ತವೆ. ಬಿಸಿಲಿಗೆ ಮಾತ್ರವಲ್ಲದೆ ದೇಹದಲ್ಲಿನ ಹಾರ್ಮೋನ್ ಅಸಮತೋಲನದಿಂದ ಸಹ ಈ ಸಮಸ್ಯೆಗಳು ಉದ್ಭವವಾಗುತ್ತವೆ. ಇವುಗಳಿಂದ ಮುಕ್ತಿ ಪಡೆಯಲು ಒಳ್ಳೆಯ ಆಹಾರ ಸೇವನೆ ಬಹಳ ಅಗತ್ಯ. ಅದರಲ್ಲೂ ನೈಸರ್ಗಿಕ ಆಹಾರ ಪದಾರ್ಥಗಳು ಚರ್ಮದ ಇಂತಹ ಸಮಸ್ಯೆಗಳಿಗೆ ಬಹಳಷ್ಟು ಪರಿಣಾಮಕಾರಿಯಾಗಿ ಕೆಲಸ ಮಾಡುತ್ತದೆ.
ನಿಮ್ಮ ಅಡುಗೆ ಮನೆಯಲ್ಲಿ ಸುಲಭವಾಗಿ ಸಿಗುವ ಕೆಲವೊಂದು ನೈಸರ್ಗಿಕ ಆಹಾರ ಪದಾರ್ಥಗಳು ಫ್ರೆಕ್ಕ್ಲೆಸ್ ಮಚ್ಚೆಗಳ ನಿವಾರಣೆಯಲ್ಲಿ ಪರಿಣಾಮಕಾರಿ ಕೆಲಸ ಮಾಡುತ್ತವೆ ಎಂದು ಹೇಳಬಹುದು. ಅವುಗಳೆಂದರೆ,
ನಿಂಬೆ ಹಣ್ಣಿನ ರಸ
ನಿಂಬೆ ಹಣ್ಣು ತನ್ನಲ್ಲಿ ಸಿಟ್ರಿಕ್ ಆಸಿಡ್ ಅಂಶವನ್ನು ಹೊಂದಿರುವುದರಿಂದ ಚರ್ಮದ ಮೇಲಿನ ಕಲೆಗಳನ್ನು ಮತ್ತು ಮೊಡವೆಗಳಂತಹ ಗುಳ್ಳೆಗಳನ್ನು ಸುಲಭವಾಗಿ ಹೋಗಲಾಡಿಸುವಂತಹ ಶಕ್ತಿ ಪಡೆದಿವೆ. ನೈಸರ್ಗಿಕ ಮತ್ತು ಸಾವಯುವ ಗುಣ ಲಕ್ಷಣಗಳು ನಿಂಬೆ ಹಣ್ಣಿನಲ್ಲಿರುವುದರಿಂದ ಕಪ್ಪಾದ ಅಥವಾ ಕಂದು ಬಣ್ಣದ ಕಲೆಗಳನ್ನು ಬಿಳುಪಾಗಿಸುವ ಶಕ್ತಿ ಪಡೆದಿವೆ.
ಫ್ರೆಕ್ಕ್ಲೆಸ್ ನಿವಾರಣೆಯಲ್ಲಿ ನಿಂಬೆ ಹಣ್ಣಿನ ತಯಾರಿ ಹೇಗೆ ?
- ಮೊದಲಿಗೆ ಎರಡರಿಂದ ಮೂರು ಟೇಬಲ್ ಚಮಚದಷ್ಟು ನಿಂಬೆ ಹಣ್ಣಿನ ರಸ ತೆಗೆದುಕೊಂಡು ನಿಮ್ಮ ಬೆರಳುಗಳ ತುದಿಯಿಂದ ಫ್ರೆಕ್ಕ್ಲೆಸ್ ಮೇಲೆ ನಯವಾಗಿ ಮಸಾಜ್ ಮಾಡಿ.
- ಸುಮಾರು 8 ರಿಂದ 10 ನಿಮಿಷ ಹಾಗೆ ಬಿಡಿ.
- ಪ್ರತಿ ದಿನ ಎರಡು ಬಾರಿ ಈ ರೀತಿ ಮಾಡುವುದರಿಂದ ಉತ್ತಮ ಪರಿಹಾರ ನಿಮಗೆ ಸಿಗುತ್ತದೆ.
ಪುದಿನ ಮತ್ತು ಬಾಳೆಹಣ್ಣು
ಪುದಿನ ಸೊಪ್ಪಿನಲ್ಲಿ ಆಂಟಿ - ಆಕ್ಸಿಡೆಂಟ್ ಅಂಶಗಳು ಹೆಚ್ಚಾಗಿದ್ದು, ಇವುಗಳು ಫ್ರೆಕ್ಕ್ಲೆಸ್ ನಿವಾರಣೆಗೆ ಪೂರಕವಾಗಿ ಕೆಲಸ ಮಾಡುತ್ತವೆ. ಜೊತೆಗೆ ಬಾಳೆ ಹಣ್ಣಿನಲ್ಲಿ ಚರ್ಮವನ್ನು ತೇವಾಂಶಗೊಳಿಸುವ ಗುಣ ಲಕ್ಷಣಗಳಿದ್ದು, ಮೊಡವೆಗಳಂತಹ ಸಮಸ್ಯೆಗಳನ್ನು ಸುಲಭವಾಗಿ ನಿವಾರಣೆ ಮಾಡುತ್ತದೆ.
ಇದರ ಉಪಯೋಗ ಹೇಗೆ?
- ಒಂದು ಹಿಡಿ ಪುದಿನ ಎಲೆಗಳನ್ನು ಚೆನ್ನಾಗಿ ತೊಳೆದು ಮಿಕ್ಸರ್ ನಲ್ಲಿ ಹಾಕಿ ರುಬ್ಬಿ ಪೇಸ್ಟ್ ತಯಾರಿಸಿಕೊಳ್ಳಿ.
- ತಯಾರಾದ ಪೇಸ್ಟ್ ಗೆ ಬಾಳೆಹಣ್ಣುಗಳನ್ನು ಸೇರಿಸಿ
- ಎರಡನ್ನೂ ಮತ್ತೊಮ್ಮೆ ಚೆನ್ನಾಗಿ ರುಬ್ಬಿ.
- ರುಬ್ಬಿದ ಮಿಶ್ರಣವನ್ನು ಮುಖದ ಮೇಲೆ ಹಚ್ಚಿ ನಯವಾಗಿ ಮಸಾಜ್ ಮಾಡಿ
- 8 ರಿಂದ 12 ನಿಮಿಷಗಳ ಕಾಲ ಹಾಗೆ ಬಿಡಿ.
- ವಾರದಲ್ಲಿ ಮೂರು ಬಾರಿ ಈ ಪ್ರಕ್ರಿಯೆಯನ್ನು ಪ್ರಯತ್ನಿಸಿ ನೋಡಿ.
ಓಟ್ ಮೀಲ್ ಮತ್ತು ಮಜ್ಜಿಗೆ
ಮಜ್ಜಿಗೆಯಲ್ಲಿ ಚರ್ಮಕ್ಕೆ ತೇವಾಂಶ ಒದಗಿಸುವ ಮತ್ತು ಚರ್ಮವನ್ನು ಆರೋಗ್ಯವಾಗಿರಿಸುವ ಹಲವಾರು ಗುಣ ಲಕ್ಷಣಗಳಿವೆ. ಸಾಮಾನ್ಯವಾಗಿ ಬಹಳಷ್ಟು ಜನರು ಅಡುಗೆ ಮನೆಯಲ್ಲಿ ಸುಲಭವಾಗಿ ಸಿಗುವ ಮಜ್ಜಿಗೆಯನ್ನು ತಮ್ಮ ಫ್ರೆಕ್ಕ್ಲೆಸ್ ಸಮಸ್ಯೆಯ ನಿವಾರಣೆಯಲ್ಲಿ ಬಳಸುತ್ತಾರೆ. ಓಟ್ ಮೀಲ್ ಸಹ ಚರ್ಮದ ಹಲವಾರು ಆರೋಗ್ಯ ಪ್ರಯೋಜನಗಳಿಗೆ ಕಾರಣವಾಗುತ್ತದೆ.
ಮಜ್ಜಿಗೆ ಮತ್ತು ಓಟ್ ಮೀಲ್ ಬಳಸುವುದು ಹೇಗೆ ?
- ಮೊದಲಿಗೆ ಒಂದು ಬಟ್ಟಲು ಮಜ್ಜಿಗೆಗೆ ಒಂದು ಹಿಡಿ ಓಟ್ ಮೀಲ್ ಹಾಕಿ ಚೆನ್ನಾಗಿ ಕಲಸಿ ಗಟ್ಟಿಯಾದ ಪೇಸ್ಟ್ ತಯಾರಿಸಿಕೊಳ್ಳಿ.
- ತಯಾರಾದ ಈ ಪೇಸ್ಟ್ ಅನ್ನು ಮುಖದ ಮೇಲೆ ನಿಧಾನವಾಗಿ ಮಸಾಜ್ ಮಾಡಿ.
- 15 ನಿಮಿಷ ಹಾಗೆ ಬಿಟ್ಟು ನಂತರ ಉಗುರು ಬೆಚ್ಚಗಿನ ನೀರಿನಲ್ಲಿ ಮುಖ ತೊಳೆದುಕೊಳ್ಳಿ.
- ಪ್ರತಿ ದಿನ ಎರಡು ಬಾರಿ ಇದೇ ರೀತಿ ಮಾಡುವುದರಿಂದ ಬಹಳಷ್ಟು ಬೇಗನೆ ಫ್ರೆಕ್ಕ್ಲೆಸ್ ಸಮಸ್ಯೆಯಿಂದ ನಿವಾರಣೆ ಕಾಣಬಹುದು
ಅಲೋವೆರಾ
ಇದೊಂದು ನೈಸರ್ಗಿಕ ಗಿಡಮೂಲಿಕೆ ಆಗಿದ್ದು, ಚರ್ಮದ ಮೇಲಿನ ಕಪ್ಪು ಕಲೆಗಳನ್ನು ಹೋಗಲಾಡಿಸುವಲ್ಲಿ ಯಶಸ್ವಿಯಾಗಿ ಕೆಲಸ ಮಾಡುತ್ತದೆ. ಇದರಲ್ಲಿ ರಾಸಾಯನಿಕ ವಸ್ತುಗಳು ಯಾವುದೂ ಇಲ್ಲದಿರುವುದರಿಂದ ಇದರಿಂದ ಚರ್ಮಕ್ಕೆ ಯಾವುದೇ ಹಾನಿಯಾಗುವುದಿಲ್ಲ. ತಾಜಾ ಅಲೋವೆರಾ ಜೆಲ್ ನಿಮ್ಮ ಮುಖದ ಸೌಂದರ್ಯವನ್ನು ವೃದ್ಧಿಗೊಳಿಸುತ್ತದೆ.
ಅಲೋವೆರಾದ ಬಳಕೆ ಹೇಗೆ?
- ಅಲೋವೆರಾ ಗಿಡದಿಂದ ಅಲೋವೆರಾ ಜಲ್ ಬೇರ್ಪಡಿಸಿ.
- ನೇರವಾಗಿ ನಿಮ್ಮ ಚರ್ಮದಲ್ಲಿ ಫ್ರೆಕ್ಕ್ಲೆಸ್ ಕಂಡು ಬರುವ ಜಾಗಕ್ಕೆ ಅಲೋವೆರಾ ಜಲ್ ಹಚ್ಚಿ.
- ಸುಮಾರು ಹದಿನೈದು ನಿಮಿಷಗಳು ಹಾಗೆ ಬಿಟ್ಟು ತಣ್ಣನೆಯ ನೀರಿನಿಂದ ಮುಖ ತೊಳೆದುಕೊಳ್ಳಿ.
- ಪ್ರತಿ ದಿನ 1 ರಿಂದ 2 ಬಾರಿ ಅಂದರೆ ಬೆಳಗ್ಗೆ ಮತ್ತು ಸಂಜೆ ಇದನ್ನು ಪ್ರಯತ್ನಿಸಿ.
ಬಾದಾಮಿ ಎಣ್ಣೆ
ಬಾದಾಮಿ ಎಣ್ಣೆಯಲ್ಲಿ ಚರ್ಮದ ಆರೋಗ್ಯಕ್ಕೆ ಪೂರಕವಾಗಿರುವ ನೈಸರ್ಗಿಕ ವಿಟಮಿನ್ ಅಂಶಗಳಾದ ವಿಟಮಿನ್ ' ಎ ' ಮತ್ತು ವಿಟಮಿನ್ ' ಇ ' ಅಂಶಗಳು ಲಭ್ಯವಿವೆ. ಇವುಗಳು ಚರ್ಮದ ಮೇಲಿನ ಕಲೆಗಳನ್ನು ಸುಲಭವಾಗಿ ಹೋಗಲಾಡಿಸುತ್ತವೆ.
ಫ್ರೆಕ್ಕ್ಲೆಸ್ ನಿವಾರಣೆಯಲ್ಲಿ ಬಾದಾಮಿ ಎಣ್ಣೆಯ ಬಳಕೆ ಹೇಗೆ?
- ಮೊದಲಿಗೆ 2 ರಿಂದ 3 ಹನಿಗಳಷ್ಟು ಬಾದಾಮಿ ಎಣ್ಣೆ ತೆಗೆದುಕೊಂಡು ಅದನ್ನು ಸ್ವಲ್ಪ ಬಿಸಿ ಮಾಡಿ.
- ನಿಮ್ಮ ಕೈ ಬೆರಳುಗಳ ಸಹಾಯದಿಂದ ಬಿಸಿಯಾದ ಬಾದಾಮಿ ಎಣ್ಣೆಯನ್ನು ನಿಮ್ಮ ಮುಖದ ಮೇಲೆ freckles ಮೂಡಿ ಬಂದಿರುವ ಜಾಗಕ್ಕೆ ನಯವಾಗಿ ಮಸಾಜ್ ಮಾಡಿ.
- ಸುಮಾರು ಒಂದು ಗಂಟೆ ಇದನ್ನು ಹಾಗೆ ಬಿಡುವುದರಿಂದ ನಿಮ್ಮ ಮುಖದ ಭಾಗದ ಚರ್ಮ ತನ್ನ ಸಣ್ಣ ಸಣ್ಣ ರಂಧ್ರಗಳಲ್ಲಿ ಬಾದಾಮಿ ಎಣ್ಣೆಯ ಅಂಶವನ್ನು ನಿಧಾನವಾಗಿ ಹೀರಿಕೊಳ್ಳುತ್ತದೆ.
- ಉಗುರುಬೆಚ್ಚಗಿನ ನೀರಿನಲ್ಲಿ ಒಂದು ಗಂಟೆಯ ನಂತರ ಮುಖ ತೊಳೆದುಕೊಳ್ಳಿ.
- ಬೆಳಗಿನ ಸಮಯದಲ್ಲಿ ಈ ಪ್ರಕ್ರಿಯೆಯನ್ನು ಮಾಡಲು ಸಾಧ್ಯವಾಗದಿದ್ದವರು ರಾತ್ರಿ ಸಮಯದಲ್ಲಿ ಬಾದಾಮಿ ಎಣ್ಣೆ ಹಚ್ಚಿ ಮಲಗಿಕೊಳ್ಳಬಹುದು.