ತ್ವಚೆ ಆರೋಗ್ಯಕರವಾಗಿ ಇರಬೇಕಾದರೆ ದೇಹದಲ್ಲಿ ಯಾವುದೇ ಪೋಷಕಾಂಶಗಳ ಕೊರತೆ ಎದುರಾಗಬಾರದು. ಈ ಕೊರತೆಗಳು ತ್ವಚೆಯ ಮೇಲೆ ಸ್ಪಷ್ಟವಾದ ಪ್ರಭಾವ ಬೀರುತ್ತವೆ ಹಾಗೂ ಪರಿಣಾಮಗಳು ತ್ವಚೆಯಲ್ಲಿ ಕಂಡುಬರುತ್ತವೆ. ಪ್ರಸಾದನಗಳಿಂದ ಈ ಕೊರತೆಗಳನ್ನು ಮರೆಮಾಚಬಹುದಾದರೂ, ಈ ಕೊರತೆಯನ್ನು ನೀಗಿಸಿ ಸಹಜ ಸೌಂದರ್ಯ ಪಡೆದರೆ ಇದೇ ನಿಮ್ಮ ನೈಜ ವ್ಯಕ್ತಿತ್ವವನ್ನು ಬಿಂಬಿಸುತ್ತದೆ. ಆದ್ದರಿಂದ, ಕೇವಲ ಆರೋಗ್ಯದ ದೃಷ್ಟಿಯಿಂದ ಮಾತ್ರವಲ್ಲ, ಸೌಂದರ್ಯದ ದೃಷ್ಟಿಯಿಂದಲೂ ನಾವು ಸೇವಿಸುವ ಆಹಾರ ಸೂಕ್ತವಾಗಿರುವುದು ಅವಶ್ಯವಾಗಿದೆ.
ನಮ್ಮ ತ್ವಚೆಯ ಆರೋಗ್ಯ ನಮ್ಮ ದೇಹದಲ್ಲಿ ಸ್ರವಿಸುವ ಹಲವಾರು ರಸದೂತಗಳ ಪ್ರಭಾವಕ್ಕೆ ಅನುಗುಣವಾಗಿ ಬದಲಾಗುತ್ತಿರುತ್ತದೆ. ಅಲ್ಲದೇ ಇದು ನಮ್ಮ ಆಹಾರವನ್ನೂ ಅವಲಂಬಿಸಿರುತ್ತದೆ. ಆದ್ದರಿಂದ ನಮ್ಮ ಅಹಾರದಲ್ಲಿ ತ್ವಚೆಗೆ ಸೂಕ್ತವಾದುದನ್ನು ಅಳವಡಿಕೊಳ್ಳುವುದು ಮತ್ತು ಸೂಕ್ತವಲ್ಲದ್ದನ್ನು ನಿವಾರಿಸಿ ತ್ವಚೆಯ ಆರೋಗ್ಯವನ್ನು ಅತ್ಯುತ್ತಮಗೊಳಿಸಬಹುದು.
ನಾವು ಸೇವಿಸುವ ಆಹಾರ ನಮ್ಮ ಚರ್ಮದ ಬಗೆಯನ್ನು ಬಲುವಾಗಿ ಅವಲಂಬಿಸಿದೆ. ಅಂದರೆ, ಒಂದೇ ಆಹಾರ ಭಿನ್ನ ಬಗೆಯ ಚರ್ಮದ ವ್ಯಕ್ತಿಗಳಲ್ಲಿ ಭಿನ್ನವಾದ ಪ್ರಭಾವನ್ನು ಉಂಟುಮಾಡಬಹುದು. ಹಾಗಾಗಿ, ಮೊದಲು ನಮ್ಮ ಚರ್ಮ ಯಾವ ಬಗೆಯದ್ದು ಎಂಬುದನ್ನು ಖಚಿತಪಡಿಸಿಕೊಂಡು ಆ ಪ್ರಕಾರವೇ ಆಹಾರದಲ್ಲಿಯೂ ಮಾರ್ಪಾಡು ಮಾಡಿಕೊಳ್ಳಬೇಕು.
ನಮ್ಮ ತ್ವಚೆಯ ಬಗೆ ಯಾವುದು ಎಂದು ತಿಳಿಯುವುದು ಹೇಗೆ?
ಉತ್ತಮ ಗುಣಮಟ್ಟದ ಕ್ಲೀನ್ಸಿಂಗ್ ದ್ರಾವಣದಿಂದ ಒಂದು ಭಾಗದ ತ್ವಚೆಯನ್ನು ಚೆನ್ನಾಗಿ ಸ್ವಚ್ಛಗೊಳಿಸಿ ಕೆಲವು ಘಂಟೆಗಳವರೆಗೆ ಹಾಗೇ ಬಿಡಬೇಕು. ಬಳಿಕ ಈ ಕೆಳಗಿನ ನಾಲ್ಕು ವಿಧಗಳಲ್ಲಿ ಯಾವುದು ಅತ್ಯುತ್ತಮವಾಗಿ ಹೊಂದಿಕೆಯಾಗುತ್ತದೆಯೋ ಅದೇ ನಿಮ್ಮ ತ್ವಚೆಯ ವಿಧ:
- ಒಣ (ಡ್ರೈ)
- ಸಾಮಾನ್ಯ (ನಾರ್ಮಲ್)
- ಎಣ್ಣೆಚರ್ಮ (ಆಯ್ಲೀ)
- ಮೇಲಿನ ಸ್ಥಿತಿಗಳ ಸಂಯೋಜನೆ (ಕಾಂಬಿನೇಶನ್)
ತ್ವಚೆಗೆ ಸಂಬಂಧಿಸಿದಂತೆ ಇತರ ಸ್ಥಿತಿಗಳೂ ಇರಬಹುದು, ಉದಾಹರಣೆಗೆ ಮೊಡವೆ, ಪಕಳೆ ಏಳುವುದು, ಕಳಾಹೀನತೆ ಇತ್ಯಾದಿ. ಒಂದು ವೇಳೆ ನಿಮ್ಮ ತ್ವಚೆ ಚೆನ್ನಾಗಿ ಹೊಳೆಯುತ್ತಿದ್ದರೆ ನಿಮ್ಮದು ಎಣ್ಣೆ ಚರ್ಮವಾಗಿದೆ. ಒಂದು ವೇಳೆ ಕೊಂಚ ಪಕಳೆ ಎದ್ದಂತೆ ಅಥವಾ ಉರಿ / ತುರಿಕೆ ಇರುವಂತೆ ಅನ್ನಿಸಿದರೆ ನಿಮ್ಮದು ಒಣಚರ್ಮ. ಈ ಸ್ಥಿತಿಗಳೇನೂ ಇಲ್ಲದಿದ್ದರೆ ಇದು ಸಾಮಾನ್ಯ ಚರ್ಮ. ಕೆಲವೆಡೆ ಎಣ್ಣೆಪಸೆಯನ್ನು ಹೊಂದಿದ್ದು ಕೆಲವೆಡೆ ಒಣಗಿದಂತೆ ಇದ್ದರೆ ಇದು ಸಂಯೋಜನೆಯ ವಿಧವಾಗಿದೆ.
ಒಣಚರ್ಮದ ವ್ಯಕ್ತಿಗಳು ಯಾವ ಆಹಾರವನ್ನು ಸೇವಿಸಬೇಕು?
ಈ ವ್ಯಕ್ತಿಗಳು ನಿತ್ಯವೂ ಎರಡು ಲೀಟರಿನಷ್ಟು ನೀರನ್ನು ತಪ್ಪದೇ ಕುಡಿಯಬೇಕು. ಇವರ ಆಹಾರದಲ್ಲಿ ನೀರಿನಿಂದ ತುಂಬಿರುವ ಹಣ್ಣುಗಳು, ಉದಾಹರಣೆಗೆ ಕಲ್ಲಂಗಡಿ, ಸೌತೆ, ಲಿಂಬೆ ಮೊದಲಾದವುಗಳು ಹೆಚ್ಚಿರಬೇಕು. ಅಲ್ಲದೇ ಕೊಬ್ಬಿನ ಆಮ್ಲಗಳು ಹೆಚ್ಚಿರುವ ಆಹಾರಗಳನ್ನು ಸಾಕಷ್ಟು ಮಟ್ಟಿಗೆ ತಮ್ಮ ಆಹಾರದಲ್ಲಿ ಸೇರಿಸಿಕೊಳ್ಳಬೇಕು.. ಇವೆಂದರೆ:
* ಬೆಣ್ಣೆಹಣ್ಣು (ಅವೋಕ್ಯಾಡೋ)
* ಆಲಿವ್ಎಣ್ಣೆ
* ಸಾಲ್ಮನ್ ಮೀನು
ಈ ವ್ಯಕ್ತಿಗಳು ಕೆಫೀನ್ ಮತ್ತು ಮದ್ಯವನ್ನು ಅತ್ಯಂತ ಮಿತಗೊಳಿಸಬೇಕು.
ದೇಹದಲ್ಲಿ ವಿಟಮಿನ್ ಎ ಮತ್ತು ಸಿ ಗಳ ಕೊರತೆಯಾದಾಗಲೂ ಒಣಚರ್ಮ ಕಾಣಿಸಿಕೊಳ್ಳುತ್ತದೆ. ನಿಮ್ಮ ತ್ವಚೆ ಬೇರೆಯ ವಿಧದ್ದಾಗಿದ್ದು ಈಗ ಒಣದಾಗಿರುವಂತೆ ಕಂಡು ಬಂದರೆ ಈ ಆಹಾರಗಳ ಸೇವನೆಯನ್ನು ಹೆಚ್ಚಿಸಿ:
* ಪಾಲಕ್
* ಬ್ರೋಕೋಲಿ
* ಸಿಹಿಗೆಣಸು
ಎಣ್ಣೆ ಚರ್ಮದ ವ್ಯಕ್ತಿಗಳು ಯಾವ ಆಹಾರವನ್ನು ಸೇವಿಸಬೇಕು?
ಎಣ್ಣೆ ಚರ್ಮದವರಲ್ಲಿ ಈಗಾಗಲೇ ಎಣ್ಣೆಯ ಅಂಶ ಹೆಚ್ಚೇ ಇರುವ ಕಾರಣ ನಿಮ್ಮ ಆಹಾರದಲ್ಲಿ ಎಣ್ಣೆಯೇ ಇರಬಾರದು ಎಂದರೆ ಇದು ಸಾಧ್ಯವಾಗದು. ಆದ್ದರಿಂದ ನಿಮ್ಮ ಎಣ್ಣೆಗಳನ್ನು ಈ ಕೆಳಗಿನ ಉರಿಯೂತ ನಿವಾರಕ ಗುಣವಿರುವ ಎಣ್ಣೆಗಳಿಗೆ ಬದಲಿಸಿಕೊಳ್ಳುವುದೇ ಜಾಣತನದ ಕ್ರಮವಾಗಿದೆ:
- ಬೆಣ್ಣೆಹಣ್ಣಿನ ಎಣ್ಣೆ (ಅವೋಕ್ಯಾಡೋ ಆಯಿಲ್)
- ಆಲಿವ್ ಎಣ್ಣೆ
- ಮೀನಿನ ಎಣ್ಣೆ
- ಅಗಸೆ ಬೀಜದ ಎಣ್ಣೆ (ಫ್ಲ್ಯಾಕ್ಸ್ ಸೀಡ್ ಆಯಿಲ್)
ಎಣ್ಣೆಯಲ್ಲಿ ತಯಾರಿಸಲ್ಪಟ್ಟ ಆಹಾರಗಳನ್ನು ಆದಷ್ಟೂ ಮಟ್ಟಿಗೆ ತಗ್ಗಿಸಿ. ಅಲ್ಲದೇ ಸಿದ್ಧ ಆಹಾರಗಳು, ಹುರಿದ, ಕರಿದ ಅಹಾರಗಳು, ಸಕ್ಕರೆ ಅಧಿಕವಾಗಿರುವ ಆಹಾರಗಳು ಮೊದಲಾದವನ್ನು ತ್ಯಜಿಸಿದಷ್ಟೂ ಉತ್ತಮ. ಬದಲಿಗೆ ಇಡಿಯ ಗೋಧಿಯ ಹಿಟ್ಟಿನಿಂದ ತಯಾರಿಸಿದ ಆಹಾರಗಳು, ಕೆಂಪು ಮಾಂಸದ ಬದಲಿಗೆ ಬಿಳಿ ಮಾಂಸ (ಉದಾಹರಣೆಗೆ ಕೋಳಿ ಅಥವಾ ಮೀನು) ಮೊದಲಾದವುಗಳಿಗೆ ಬದಲಿಸಿಕೊಳ್ಳಿ.
ಒಂದು ವೇಳೆ ಸಂಯೋಜನೆಯ ತ್ವಚೆ ಇದ್ದರೆ ಯಾವ ಆಹಾರಗಳನ್ನು ಸೇವಿಸಬೇಕು?
ಈ ವ್ಯಕ್ತಿಗಳ ತ್ವಚೆ ಕೆಲವೆಡೆ ಎಣ್ಣೆಯ ಪಸೆ ಅತಿ ಹೆಚ್ಚು ಕೆಲವೆಡೆ ತೀರಾ ಒಣದಾಗಿರುವ ಕಾರಣ ಇವರ ಆಹಾರ ಈ ಎರಡೂ ಸ್ಥಿತಿಗಳಿಗೆ ಹೊಂದುವಂತಹ ಆಹಾರಗಳಾದರೆ ಒಳ್ಳೆಯದು. ಅಂದರೆ, ಕಾರ್ಬೋಹೈಡ್ರೇಟುಗಳನ್ನು ಸೇವಿಸುವುದೇ ಬೇಡ ಎಂದಲ್ಲ, ಬದಲಿಗೆ ಯಾವ ಕಾಳುಗಳನ್ನು ನೀವು ಸೇವಿಸಬೇಕೆಂಬುದನ್ನು ಸೂಕ್ತವಾಗಿ ಆಯ್ದುಕೊಳ್ಳಿ.
ಮೊಡವೆಗಳು ಹೆಚ್ಚಾಗಿ ಮೂಡುವ ತ್ವಚೆಯ ವ್ಯಕ್ತಿಗಳು ಯಾವ ಆಹಾರಗಳನ್ನು ಸೇವಿಸಬೇಕು?
ಮೊಡವೆ ಎಂದರೆ ತಾರುಣ್ಯದಲ್ಲಿ ಮಾತ್ರ ಬರುವ ತೊಂದರೆ ಎಂದು ತಿಳಿದಿದ್ದಾರೆ. ವಾಸ್ತವದಲ್ಲಿ, ಮೊಡವೆಗಳು ಯಾವುದೇ ವಯಸ್ಸಿನಲ್ಲಿ ಎದುರಾಗಬಹುದು. ಅದರಲ್ಲೂ ವಯಸ್ಕರಲ್ಲಿ ಮೂಡುವ ಮೊಡವೆಗಳು ಸುಲಭವಾಗಿ ಗುಣವಾಗದೇ, ಗುಣವಾದರೂ ಕಪ್ಪು ಕಲೆಯನ್ನು ಬಿಟ್ಟು ಹೋಗುತ್ತದೆ.
ಈ ಬಗೆಯ ಚರ್ಮದ ವ್ಯಕ್ತಿಗಳು ಡೈರಿ ಉತ್ಪನ್ನಗಳು, ಸಕ್ಕರೆ, ಕೊಬ್ಬಿನ ಆಹಾರಗಳನ್ನು ಆದಷ್ಟೂ ತಗ್ಗಿಸಬೇಕು. ಈ ಆಹಾರಗಳು ಚರ್ಮದ ಉರಿಯೂತವನ್ನು ಹೆಚ್ಚಿಸಿ ಮೊಡವೆಗಳಿಗೆ ಕಾರಣವಾಗುತ್ತವೆ. ಬದಲಿಗೆ ಪ್ರೊಬಯಾಟಿಕ್ಸ್ ಅಥವಾ ಮೊಸರು ಹಾಗೂ ಹುಳಿಬಂದಿರುವ ಆಹಾರಗಳನ್ನು ಸೇವಿಸಬಹುದು. ಆದರೆ, ನೀವಾಗಿ ಇದನ್ನು ನಿರ್ಧರಿಸದೇ ಚರ್ಮವೈದ್ಯರ ಸಲಹೆ ಪಡೆದೇ ಅಳವಡಿಸಿಕೊಳ್ಳಿ.
