Diet Soda: ಡಯಟ್ ಸೋಡಾ ತೂಕ ಹೆಚ್ಚಿಸಬಹುದು, ಎಚ್ಚರ!

ಡಯಟ್ ಪಾನೀಯಗಳ ಸೇವನೆ ನಿಮ್ಮ ತೂಕವನ್ನು ಹೆಚ್ಚಿಸಬಹುದು- ಹೊಸ ಅಧ್ಯಯನದ ಫಲಿತಾಂಶವಿದು. ಕಡಿಮೆ-ಕ್ಯಾಲೋರಿ ಸೋಡಾಗಳನ್ನು ಆಯ್ಕೆ ಮಾಡುವುದರಿಂದ ನೀವು ಹೆಚ್ಚಿನ ಕ್ಯಾಲೊರಿಗಳನ್ನು ಸೇವಿಸುವ ಸಾಧ್ಯತೆಗಳಿವೆ, ಎಂದು ವಿಜ್ಞಾನಿಗಳು ಕಂಡುಕೊಂಡಿದ್ದಾರೆ.

ಪೀಡಿಯಾಟ್ರಿಕ್ ಒಬೆಸಿಟಿ ಯಲ್ಲಿ ಪ್ರಕಟವಾದ ಹೊಸ ಅಧ್ಯಯನ ವರದಿಯ ಪ್ರಕಾರ, ಡಯಟ್ ಕೋಕ್ ಮತ್ತು ಇತರ ಡಯಟ್ ಪಾನೀಯಗಳನ್ನು ಸೇವಿಸಿದ ಮಕ್ಕಳು ಮತ್ತು ಹದಿಹರೆಯದವರು ದಿನಕ್ಕೆ ಹೆಚ್ಚುವರಿ 200 ಕ್ಯಾಲರಿಗಳನ್ನು ಸೇವಿಸುತ್ತಾರೆ. ಅಧ್ಯಯನದಲ್ಲಿ ಪಾಲ್ಗೊಂಡವರನ್ನು ಕೇವಲ ನೀರು ಮಾತ್ರ ಕುಡಿಯುವ ಅವರದೇ ವಯೋ ಗುಂಪಿನವರೊಂದಿಗೆ ಹೋಲಿಸಲಾಗಿತ್ತು.

ನೀರಿಗೆ ಶಿಫಾರಸು

ಈ ಅಧ್ಯಯನದ ಬಳಿಕ ನಾವು ಶಿಫಾರಸ್ಸು ಮಾಡುವುದೇನೆಂದರೆ ಮಕ್ಕಳು ಮತ್ತು ಹದಿ ಹರೆಯದವರು ಈ ಪಾನೀಯಗಳ ಬದಲಾಗಿ ಹೆಚ್ಚು ನೀರು ಕುಡಿಯುವುದುತ್ತಮ, ಎಂದು ಅಧ್ಯಯನದ ನೇತೃತ್ವ ವಹಿಸಿದ್ದ ಜಾರ್ಜ್ ವಾಷಿಂಗ್ಟನ್ ವಿಶ್ವವಿದ್ಯಾಲಯದ ಡಾ. ಅಲಿಸನ್ ಸಿಲ್ವೆಟ್ಸ್ಕಿ ಸಲಹೆ ನೀಡುತ್ತಾರೆ.

ಅವರ ತಂಡ ಹಲವಾರು ವರ್ಷಗಳಿಂದ ಡಯಟ್ ಡ್ರಿಂಕ್ಸ್ ಮೇಲೆ ಅಧ್ಯಯನ ನಡೆಸುತ್ತಿದೆ.

ತೂಕ ಏರಿಕೆ ಅಪಾಯಕರ

ಮಕ್ಕಳಲ್ಲಿ ಬೊಜ್ಜು ಏರಿಕೆ ಹೆಚ್ಚುತ್ತಿದ್ದು ಇದು ಟೈಪ್ 2 ಮಧುಮೇಹ, ಹೃದಯ ಕಾಯಿಲೆ, ಕ್ಯಾನ್ಸರ್ ಮತ್ತು ಇತರ ಸಮಸ್ಯೆಗಳ ಹುಟ್ಟಿಗೆ ಕಾರಣವಾಗುತ್ತವೆ. ಬೊಜ್ಜಿಗೆ ಕಾರಣವಾಗುವ ಈ ತಂಪು ಪಾನೀಯಗಳಿಗಿಂತ , ಹಣ್ಣಿನ ರಸ, ಹಣ್ಣು, ತರಕಾರಿ, ಧಾನ್ಯಗಳನ್ನು ಸೇವಿಸುವುದತ್ತಮ ಎಂದವರು ಹೇಳುತ್ತಾರೆ.