ಪತಿಗೆ ವಯಸ್ಸಾಗಿದ್ದರೆ ಗರ್ಭಿಣಿ ಪತ್ನಿ ಹಾಗೂ ಹುಟ್ಟಲಿರುವ ಮಗುವಿಗೆ ರಿಸ್ಕ್‌ ಜಾಸ್ತಿ

ಗರ್ಭಧಾರಣೆಯಲ್ಲಿ ಮಹಿಳೆಯರ ವಯಸ್ಸು ಮಾತ್ರವಲ್ಲ ಪುರುಷರ ವಯಸ್ಸು ಕೂಡ ಬಹು ದೊಡ್ಡ ಪ್ರಭಾವ ಬೀರುತ್ತದೆ. ವಯಸ್ಸು ಅಧಿಕವಾಗುತ್ತಿದ್ದಂತೆ ಮಹಿಳೆಯರಲ್ಲಿ ಗರ್ಭಧಾರಣೆಗೆ ತೊಂದರೆಯಾದರೆ ಪುರುಷರ ವಯಸ್ಸು ಜಾಸ್ತಿಯಾದಷ್ಟು ಮಗು ಹಾಗೂ ತಾಯಿಯ ಆರೋಗ್ಯಕ್ಕೆ ಅಪಾಯ ಹೆಚ್ಚು.

ವಯಸ್ಸು 40ರ ಬಳಿಕ ಫ್ಯಾಮಿಲಿ ಪ್ಲಾನಿಂಗ್ ಬಗ್ಗೆ ಯೋಚಿಸುವ ಪುರುಷರು ವೈದ್ಯರನ್ನು ಕಂಡು ಅವರ ಸಲಹೆ ಪಡೆದು ವೀರ್ಯಾಣುಗಳನ್ನು ಸಂಗ್ರಹಿಸಿಡುವುದು ಒಳ್ಳೆಯದು.

ಪುರುಷರ ವಯಸ್ಸು ಅಧಿಕವಾದಂತೆ ಗರ್ಭಿಣಿ ಮಹಿಳೆ ಹಾಗೂ ಮಗುವಿನ ಮೇಲಾಗುವ ಪರಿಣಾಮ ಏನು ಎಂಬುವುದರ ಕುರಿತು ಅಧ್ಯಯನ ನಡೆಸಿ Maturitas ಎಂಬ ಜರ್ನಲ್‌ನಲ್ಲಿ ಪಬ್ಲಿಷ್‌ ಮಾಡಲಾಗಿದೆ.

ಪತಿಯ ವಯಸ್ಸು ಅಧಿಕವಾಗಿರುವ ಗರ್ಭಿಣಿಯರಲ್ಲಿ ಮಧುಮೇಹ (gestational diabetes) ಹೆಚ್ಚಾಗಿ ಕಂಡು ಬರುತ್ತದೆ. ಹೆಚ್ಚಿನ ಸಂದರ್ಭದಲ್ಲಿ ಮಹಿಳೆಯರು ಅವಧಿಪೂರ್ವ ಮಗುವಿಗೆ ಜನ್ಮ ನೀಡುತ್ತಾರೆ.

ಇನ್ನು ಹುಟ್ಟುವ ಹೆಚ್ಚಿನ ಮಕ್ಕಳಲ್ಲಿ ತೂಕ ಕಡಿಮೆ, ದೈಹಿಕ ನ್ಯೂನತೆ ಕಂಡು ಬರುತ್ತದೆ. ಕೆಲ ಮಕ್ಕಳು ಹುಟ್ಟುವಾಗಲೇ ಮರಣ ಹೊಂದುತ್ತವೆ, ಇನ್ನು ಕೆಲ ಮಕ್ಕಳು ಆಟಿಸಂ, ಹೃದಯಸಂಬಂಧಿ ಕಾಯಿಲೆಯಿಂದ ಬಳಲುತ್ತದೆ ಎಂದು ಅಧ್ಯಯನ ಹೇಳಿದೆ.