ಕಾಂಗೋ ಜ್ವರ : ನಿಮ್ಮನ್ನು ಮತ್ತೊಮ್ಮೆ ಎಚ್ಚರಗೊಳಿಸುವ ಸರದಿ!

ಈ ವರ್ಷ 2020 ರಾಹುಗ್ರಸ್ತ ವರ್ಷ ಎಂದು ಯಾರೋ ಜ್ಯೋತಿಷಿಗಳು ಹೇಳಿದ ನೆನಪು. ಆದರೆ ಸಾಮಾನ್ಯ ಜನರ ಪಾಲಿಗೆ ಇದು ನಿಜಕ್ಕೂ ರೋಗಗ್ರಸ್ತ ವರ್ಷ. ಏಕೆಂದರೆ ಕಾಯಿಲೆಗಳ ಸರಮಾಲೆಯನ್ನೇ ಇಷ್ಟು ವರ್ಷಗಳ ಇತಿಹಾಸದಲ್ಲಿ ಪ್ರಸ್ತುತ ಈ ವರ್ಷ ಕಾಣಬಹುದು.

ಜನರಿಗೆ ಆರೋಗ್ಯದ ವಿಚಾರದಲ್ಲಿ ಒಂದಾದ ಮೇಲೊಂದರಂತೆ ಬರ ಸಿಡಿಲು ಬಂದೆರಗಿದಂತೆ ಹೊಸ ಹೊಸ ಕಾಯಿಲೆಗಳು ಹುಟ್ಟಿಕೊಂಡು ತನ್ನ ಪ್ರಲಾಪ ಮೆರೆಯುತ್ತಿವೆ. ಆದರೆ ಎಲ್ಲಾ ಅನಿಷ್ಟಕ್ಕೂ ಶನೀಶ್ವರನೇ ಕಾರಣ ಎಂಬಂತೆ ಈ ವರ್ಷದಲ್ಲಿ ಕಂಡು ಬಂದ ಬಹುತೇಕ ಕಾಯಿಲೆಗಳು ಕೇವಲ ಪ್ರಾಣಿಗಳಿಂದಲೇ ಮನುಷ್ಯರಿಗೆ ಹಬ್ಬುತ್ತಿವೆ ಎನ್ನುವುದು ಸತ್ಯಾಂಶವಾಗಿ ತೋರುತ್ತಿದೆ.

ವಿಶ್ವ ಆರೋಗ್ಯ ಸಂಸ್ಥೆಯ ಪ್ರಕಾರ ಕಾಂಗೋ ಜ್ವರ ಆಫ್ರಿಕಾದ ಮೂಲದಿಂದ ಪ್ರಾರಂಭವಾಗಿ ಮಧ್ಯಪ್ರಾಚ್ಯ ಮತ್ತು ಏಷ್ಯಾ ಖಂಡಗಳಲ್ಲಿ ಹರಡಿದ್ದು ಸದ್ಯ ಈಗ ನಮ್ಮ ರಾಜಸ್ಥಾನದ ಜೋದ್ಪುರ್ ಮತ್ತು ಜೈಸಲ್ಮೇರ್ ಪ್ರದೇಶಗಳಲ್ಲಿ ಹಲವು ಜನರಲ್ಲಿ ಕಂಡು ಬಂದಿದೆ. ರಾಜಸ್ಥಾನ ಸರಕಾರ ಈ ಬಗ್ಗೆ ಅಲ್ಲಿನ ಜನರಿಗೆ ಎಚ್ಚರಿಕೆಯಾಗಿ ಇರಬೇಕೆಂಬ ಸಂದೇಶ ರವಾನಿಸಿದೆ.

134 ಜನರ ರಕ್ತದ ಮಾದರಿಗಳನ್ನು ಈಗಾಗಲೇ ಪುಣೆಯ ' ನ್ಯಾಷನಲ್ ಇನ್ಸ್ಟಿಟ್ಯೂಟ್ ಆಫ್ ವೈರಾಲಜಿ ' ಸಂಸ್ಥೆಗೆ ಪರೀಕ್ಷೆಗಾಗಿ ಕಳುಹಿಸಲಾಗಿದೆ. ನಮ್ಮ ದೇಶದಲ್ಲಿ ಪ್ರಾಣಿಗಳ ಮೂಲದಿಂದ ವೈರಸ್ ಸೋಂಕನ್ನು ಹಬ್ಬಿಸಿಕೊಂಡ ಇಬ್ಬರು ಈಗಾಗಲೇ ಮೃತರಾಗಿದ್ದಾರೆ.

ಹೆಚ್ಚಾಗಿ ಪ್ರಾಣಿಗಳ ಜೊತೆ ಒಡನಾಟ ಇಟ್ಟುಕೊಂಡಿರುವವರು ಅಂದರೆ ಪ್ರಾಣಿಗಳ ಸಾಕಣೆ ಕಾರ್ಯದಲ್ಲಿ ನಿರತರಾಗಿರುವವರು, ಹೊಲ ಗದ್ದೆಗಳಲ್ಲಿ ಕೆಲಸ ಮಾಡುವ ರೈತಾಪಿ ವರ್ಗ, ಮಾಂಸಾಹಾರ ಪೂರೈಕೆ ಮಾಡುವ ಸ್ಥಳಗಳಲ್ಲಿ ಕೆಲಸ ಮಾಡುವವರು ಕಾಂಗೋ ವೈರಸ್ ಜ್ವರಕ್ಕೆ ತುತ್ತಾಗುತ್ತಿದ್ದಾರೆ ಎಂಬುದು ಸದ್ಯ ನಮಗೆ ಲಭ್ಯವಾಗಿರುವ ಮಾಹಿತಿ.

1. ಕಾಂಗೋ ಜ್ವರ ಹೇಗೆ ಹರಡುತ್ತದೆ?
   ಕಾಂಗೋ ವೈರಸ್ ಒಬ್ಬ ಮನುಷ್ಯನಿಂದ ಇನ್ನೊಬ್ಬ ಮನುಷ್ಯನಿಗೆ ರಕ್ತದ ಮೂಲಕ, ದೇಹದ ಇತರ ದ್ರವಗಳ ಮೂಲಕ ಅಥವಾ ಸೋಂಕಿತ ವ್ಯಕ್ತಿಯ ಅಂಗಾಂಗದ ಮೂಲಕ ಹರಡುವ ಸಾಧ್ಯತೆ ಇದೆ.ಬಳಸುವ ವೈದ್ಯಕೀಯ ಉಪಕರಣ ಸರಿಯಾಗಿ ಸ್ಟರಿಲೈಸೇಶನ್ ಮಾಡದೆ ಇದ್ದರೆ, ಮತ್ತು ಒಮ್ಮೆ ಒಬ್ಬರಿಗೆ ಬಳಕೆ ಮಾಡಿದ ಸೂಜಿಯನ್ನು ಇನ್ನೊಬ್ಬರಿಗೆ ಬಳಕೆ ಮಾಡುವುದರಿಂದ ಅಥವಾ ಕಲುಷಿತಗೊಂಡ ಔಷಧೀಯ ಪೂರೈಕೆಗಳನ್ನು ಬಳಕೆ ಮಾಡುವುದರಿಂದ ಆಸ್ಪತ್ರೆಗಳಲ್ಲಿ ಕಾಂಗೋ ವೈರಸ್ ನಿಂದ ರೋಗ ಹರಡುವ ಸಾಧ್ಯತೆ ಹೆಚ್ಚಿದೆ.
2. ರೋಗ - ಲಕ್ಷಣಗಳು ಮತ್ತು ಕಾಯಿಲೆಯ ಚಿಹ್ನೆಗಳು
   ವಿಶ್ವ ಆರೋಗ್ಯ ಸಂಸ್ಥೆಯ ಪ್ರಕಾರ ಕಾಂಗೋ ವೈರಸ್ ಸೋಂಕು ಉಂಟಾದ ವ್ಯಕ್ತಿಯಲ್ಲಿ ಜ್ವರ, ಮೈ ಕೈ ನೋವು, ತಲೆ ಸುತ್ತು, ಕತ್ತು ನೋವು, ಕುತ್ತಿಗೆ ಹಿಡಿದುಕೊಂಡಂತೆ ಆಗುವುದು, ಬೆನ್ನು ನೋವು, ತಲೆ ನೋವು, ಕಣ್ಣುಗಳು ಊದಿಕೊಂಡಂತೆ ಆಗುವುದು, ಫೋಟೋಫೋಬಿಯ ( ಬೆಳಕಿಗೆ ಕಣ್ಣುಗಳ ಸೂಕ್ಷ್ಮ ಪ್ರತಿರೋಧ ) ಇದರ ಜೊತೆಗೆ ವಾಕರಿಕೆ, ವಾಂತಿ, ಭೇದಿ, ಹೊಟ್ಟೆ ನೋವು, ಗಂಟಲಿನಲ್ಲಿ ಕಿರಿಕಿರಿ, ಮಾನಸಿಕವಾಗಿ ವಿಪರೀತ ಗೊಂದಲ ಇತ್ಯಾದಿ ಸಮಸ್ಯೆಗಳು ಒಮ್ಮೆಲೇ ಕಾಡುತ್ತವೆ.ಸೋಕಿಗೆ ಗುರಿಯಾದ ವ್ಯಕ್ತಿ ತಾನು ಹುಷಾರು ತಪ್ಪಿದ ಎರಡನೇ ವಾರದ ಹೊತ್ತಿಗೆ ಸಾವನ್ನಪ್ಪುತ್ತಾನೆ ಎಂದು ಸಂಶೋಧನೆಯ ಮೂಲದಿಂದ ತಿಳಿದು ಬಂದಿದೆ. ಸೋಂಕು ಪ್ರಾರಂಭ ಆದ ಸುಮಾರು 2 ರಿಂದ 4 ದಿನಗಳ ನಂತರ ಕಣ್ಣುಗಳಿಗೆ ವಿಪರೀತ ನಿದ್ರೆ ಆವರಿಸುವುದು, ಮಾನಸಿಕವಾಗಿ ಖಿನ್ನತೆ ಎದುರಾಗುವುದು, ದೇಹಕ್ಕೆ ಅತಿ ಹೆಚ್ಚು ದಣಿವು ಎದುರಾದಂತೆ ಆಗುವುದು, ಹೃದಯ ಬಡಿತ ಜೋರಾಗುವುದು, ದುಗ್ಧರಸ ಗ್ರಂಥಿಗಳು ವಿಸ್ತಾರಗೊಳ್ಳುವುದು, ಲಿವರ್ ಭಾಗ ದಪ್ಪವಾಗುವುದು, ಚರ್ಮದ ಮೇಲೆ ಅಲ್ಲಲ್ಲಿ ದದ್ದುಗಳು ಕಂಡು ಬಂದು ಅವುಗಳಿಂದ ರಕ್ತ ಸೋರಿಕೆ ಉಂಟಾಗುವುದು, ಮೂಗು ಸೋರುವುದು, ಬಾಯಿ ಮತ್ತು ಗಂಟಲಿನಲ್ಲಿ ಲೋಳೆಯ ರೀತಿ ಉತ್ಪತ್ತಿಯಾಗುವುದು ಇತ್ಯಾದಿ ಆರೋಗ್ಯ ಸಮಸ್ಯೆಗಳು ಕಾಂಗೊ ವೈರಸ್ ಸೋಂಕಿತ ರೋಗಿಗೆ ಕಾಡಬಹುದು.
3. ಕಾಂಗೋ ಜ್ವರಕ್ಕೆ ಚಿಕಿತ್ಸೆ ಹೇಗೆ?
   ವಿಶ್ವ ಆರೋಗ್ಯ ಸಂಸ್ಥೆಯ ಪ್ರಕಾರ ಇದೊಂದು ವೈರಸ್ ನಿಂದ ಉಂಟಾಗುವ ಜ್ವರ ಆಗಿದ್ದು, ಇದಕ್ಕೆ ಆಂಟಿ - ವೈರಲ್ ಔಷಧಿಯಾದ ' ರಿಬವಿರಿನ್ ' ಎಂಬ ಔಷಧಿ ನೀಡುವ ಮೂಲಕ ಚಿಕಿತ್ಸೆ ನೀಡಲಾಗುತ್ತದೆ. ಆಸ್ಪತ್ರೆಗಳಲ್ಲಿ ಬಾಯಿಯ ಮೂಲಕ ಅಥವಾ ಇಂಜೆಕ್ಷನ್ ಮೂಲಕ ಈ ಔಷಧವನ್ನು ನೀಡಲಾಗುತ್ತದೆ.
4. ಕಾಂಗೋ ವೈರಸ್ ತಡೆಗಟ್ಟುವಿಕೆ ಮತ್ತು ನಿಯಂತ್ರಣ?
   ಕಾಂಗೋ ವೈರಸ್ ಸೋಂಕು ಪ್ರಮುಖವಾಗಿ ಪ್ರಾಣಿಗಳಿಗೆ ಹಬ್ಬುವುದರಿಂದ ನಮ್ಮ ಸಾಕು ಪ್ರಾಣಿಗಳಲ್ಲಿ ಯಾವುದು ರೋಗಗ್ರಸ್ತವಾಗಿದೆ ಎಂಬುದನ್ನು ಕಂಡು ಹಿಡಿಯುವುದು ಕಷ್ಟ. ಇದುವರೆಗೂ ಮನುಷ್ಯರಿಗೆ ಅಥವಾ ಪ್ರಾಣಿಗಳಿಗೆ ಉಂಟಾಗುವ ಕಾಂಗೋ ಜ್ವರಕ್ಕೆ ಯಾವುದೇ ಲಸಿಕೆ ಲಭ್ಯವಿಲ್ಲ. ಜನರಲ್ಲಿ ಇದರ ಬಗ್ಗೆ ಜಾಗೃತಿ ಮೂಡಿಸಿ ಪ್ರತಿಯೊಬ್ಬರಿಗೂ ಕಾಂಗೋ ಜ್ವರದ ರೋಗ ಲಕ್ಷಣಗಳನ್ನು ವಿವರಿಸಿ ಹೇಳಿ ಜನರನ್ನು ಎಚ್ಚರಿಸಬೇಕಾಗಿರುವುದೇ ಸದ್ಯದಲ್ಲಿ ಇದಕ್ಕೆ ಇರುವ ಒಂದು ಪರಿಹಾರ ಮಾರ್ಗ.