ನೀವು ಇದುವರೆಗೆ ಸೇಬು ಹಣ್ಣಿನ ಬಗ್ಗೆ ಏನೆಲ್ಲಾ ವಿಷಯಗಳನ್ನು ಕೇಳಿರುತ್ತೀರಿ ಅಥವಾ ಓದಿರುತ್ತೀರಿ ಅಲ್ಲವೇ, ಸೇಬು ವಿಶ್ವದೆಲ್ಲೆಡೆ ಸುಲಭವಾಗಿ ಲಭ್ಯವಿರುವ ಹಣ್ಣುಗಳಲ್ಲಿ ಒಂದಾಗಿದೆ. ಇಂದಿಗೂ ಹೆಚ್ಚು ಜನಪ್ರಿಯವಾಗಿರುವ ಸೇಬನ್ನು ಸಿಹಿ ತಿನಿಸುಗಳಿಗೆ, ಕೆಲವು ಕಾಯಿಲೆಗಳಿಗೆ ಮನೆ ಮದ್ದಾಗಿ ಬಳಸಲಾಗುತ್ತದೆ. ಸೇಬು ತಿಂದರೆ ಅನೇಕ ಸಮಸ್ಯೆಗಳಿಂದ ದೂರವಿರಬಹುದು. ಆದರೆ ಇಂದು ನಾವು ಹೇಳುತ್ತಿರುವುದು ಸೇಬು ಬಗ್ಗೆಯಾದರೂ, ಅದು ಮಾಮೂಲಿ ಸೇಬುನಂತೆ ಇರುವುದಿಲ್ಲ, ಹೌದು. ನೀವು ಇದುವರೆಗೆ ಕೆಂಪು ಮತ್ತು ಹಸಿರು ಸೇಬುಗಳನ್ನು ಮಾತ್ರ ಸೇವಿಸಿರುತ್ತೀರಿ. ಆದರೆ ಕಪ್ಪು ಬಣ್ಣದ ಸೇಬು ಹಣ್ಣಿನ ರುಚಿ ಕಂಡಿದ್ದೀರಾ, ಹೌದು, ಇದನ್ನು ಕೇಳಿ ನಿಮಗೆ ಆಶ್ಚರ್ಯವಾಗಬಹುದು.
ಬ್ಲ್ಯಾಕ್ ಡೈಮಂಡ್ ಆಪಲ್ ಎಂದು ಕರೆಯಲ್ಪಡುವ ಈ ಕಪ್ಪು ಸೇಬು ಹುವಾ ನಿಯು ಸೇಬುಗಳ ಕುಟುಂಬದ ಅಪರೂಪದ ವಿಧವಾಗಿದೆ. ಇದನ್ನು ಚೈನೀಸ್ ರೆಡ್ ಡಿಲೀಶಿಯಸ್ ಎಂದೂ ಕರೆಯುತ್ತಾರೆ. ಯು.ಎಸ್. ಮೂಲದ ಕ್ರಿಸ್ಟಿನಾ ಪರ್ಸೌಡ್ @ಎರಿಕ್ರಿಸ್ಟೈನ್ ಎಂಬ ಲೇಖಕಿಯ ಟ್ವೀಟ್ ಪ್ರಕಾರ, ಈ ಜಾತಿಯನ್ನು ಟಿಬೆಟ್’ನಲ್ಲಿ ಮಾತ್ರ ಬೆಳೆಯಲಾಗುತ್ತದೆ. ಈ ವೈವಿಧ್ಯಮಯ ಸೇಬು ಬಗ್ಗೆ ಇನ್ನಷ್ಟು ತಿಳಿದುಕೊಳ್ಳಲು ಮುಂದೆ ಓದಿ…
ಈ ಸೇಬು ಏಕೆ ಕಪ್ಪಾಗಿರುತ್ತದೆ?
ಈ ಹಣ್ಣುಗಳು ಏಕೆ ಕಪ್ಪಾಗಿರುತ್ತವೆ ಎಂಬುದಕ್ಕೆ ಮುಖ್ಯ ಕಾರಣವೆಂದರೆ ಹಗಲು ಮತ್ತು ರಾತ್ರಿಯ ನಡುವಿನ ಗಮನಾರ್ಹ ತಾಪಮಾನ ವ್ಯತ್ಯಾಸಗಳು. ಹೌದು, ತಜ್ಞರ ಪ್ರಕಾರ, ಭೌಗೋಳಿಕ ಪ್ರದೇಶ ಮತ್ತು ಹವಾಮಾನ ವೈಪರೀತ್ಯದಿಂದಾಗಿ ಅವು ವಿಶಿಷ್ಟವಾದ ಬಣ್ಣವನ್ನು ಹೊಂದಿವೆ. ಅವುಗಳನ್ನು ಟಿಬೆಟ್ ಪರ್ವತಗಳಲ್ಲಿರುವ ಒಂದು ಸಣ್ಣ ನಗರ ನೈಂಗ್ಚಿಯಲ್ಲಿ ಬೆಳೆಸಲಾಗುತ್ತದೆ. ಈ ಪ್ರದೇಶವು ಹಗಲಿನಲ್ಲಿ ಅತಿಯಾದ ನೇರಳಾತೀತ ಬೆಳಕನ್ನು ಪಡೆಯುತ್ತದೆ. ಹಾಗೆಯೇ ರಾತ್ರಿಯಲ್ಲಿ ತಾಪಮಾನವು ತೀವ್ರವಾಗಿ ಏರಿಳಿತಗೊಳ್ಳುತ್ತದೆ. ಇದು ಸೇಬು ಮೇಲ್ಮೈ ಮೇಲೆ ಪರಿಣಾಮ ಬೀರುತ್ತದೆ. ಇದರಿಂದ ಆಳವಾದ, ಕಪ್ಪು ಬಣ್ಣ ಅಭಿವೃದ್ಧಿಯಾಗುತ್ತದೆ. ಸೇಬು ಮೇಲ್ಮೈ ಕಪ್ಪು ಬಣ್ಣದಲ್ಲಿದ್ದರೆ ಒಳಗೆ ಮಾತ್ರ ಬೇರೆ ಸೇಬು ಹಣ್ಣಿನಂತೆ ಬಿಳಿ ಮತ್ತು ಪ್ರಕಾಶಮಾನವಾಗಿರುತ್ತದೆ.
ಈ ವೈವಿಧ್ಯಮಯ ಸೇಬು ಎಲ್ಲಿ ಕಂಡುಬರುತ್ತದೆ?
ಟಿಬೆಟ್’ನ ಹೊರತಾಗಿ, ಯು.ಎಸ್.ನಲ್ಲಿ ಬ್ಲ್ಯಾಕ್ ಡೈಮಂಡ್ ಆಪಲ್’ಗೆ ಹತ್ತಿರವಿರುವ ಮತ್ತೊಂದು ಜಾತಿಯನ್ನು ನೀವು ನೋಡಬಹುದು. ಇದನ್ನು ಅರ್ಕಾನ್ಸಾಸ್ ಬ್ಲ್ಯಾಕ್ ಎಂದು ಕರೆಯಲಾಗುತ್ತದೆ. ತಜ್ಞರ ಪ್ರಕಾರ, ಅವು ಇತರ ಜಾತಿಗೆ ಹೋಲಿಸಿದರೆ ಸಿಹಿಯಾಗಿರುವುದಿಲ್ಲ ಮತ್ತು ಉತ್ತಮ ರುಚಿಯನ್ನು ಪಡೆಯಲು ಗಾಢವಾದ ಸ್ಥಳಗಳಲ್ಲಿ ಸಂಗ್ರಹಿಸಬೇಕಾಗುತ್ತದೆ.
ಇವು ಎಲ್ಲೆಡೆ ಲಭ್ಯವಿದೆಯೇ?
ಬೇಸರದ ವಿಚಾರವೆಂದರೆ ಇಲ್ಲ, ಇವು ಮಾರುಕಟ್ಟೆಯಲ್ಲಿ ಸುಲಭವಾಗಿ ಲಭ್ಯವಿಲ್ಲ. ಅಧ್ಯಯನದ ಪ್ರಕಾರ, ವಾರ್ಷಿಕ ಬ್ಲ್ಯಾಕ್ ಡೈಮಂಡ್ ಬೆಳೆಯ ಶೇಕಡ 70 ರಷ್ಟು ಮಾರುಕಟ್ಟೆಗೆ ತರುವುದಿಲ್ಲ. ಅಲ್ಲದೆ, ಅನೇಕ ರೈತರು ಈ ಜಾತಿಯನ್ನು ಬೆಳೆಯುವುದಿಲ್ಲ. ಏಕೆಂದರೆ ಈ ಹಣ್ಣು ಪಡೆಯಲು ಐದರಿಂದ ಎಂಟು ವರ್ಷಗಳು ಬೇಕಾಗುತ್ತದೆ. ಇದು ಕೇವಲ 2 ತಿಂಗಳುಗಳವರೆಗೆ ಇರುತ್ತದೆ. ಬ್ಲ್ಯಾಕ್ ಡೈಮಂಡ್ ಸೇಬನ್ನು ಬೆಳೆಯಲು ವಿಶೇಷ ಭೌಗೋಳಿಕ ಪರಿಸ್ಥಿತಿಯ ಜೊತೆಗೆ, ಮೇಲೆ ತಿಳಿಸಿದಂತಹ ಸಮಸ್ಯೆಗಳು ಇರುವುದರಿಂದ ಹಣ್ಣು ಬೆಳೆಗಾರರು ಈ ತಳಿಯನ್ನು ಬೆಳೆಯಲು ಹಿಂಜರಿಯುತ್ತಾರೆ.
ದಿನಕ್ಕೊಂದು ಬಾಳೆಹಣ್ಣು ತಿಂದರೆ ದೃಷ್ಟಿ ಮಾಂದ್ಯತೆ ಸಮಸ್ಯೆ ಕಾಡುವುದಿಲ್ಲವಂತೆ!
ಇದು ಆರೋಗ್ಯಕ್ಕೆ ಒಳ್ಳೆಯದೇ?
ಇವು ಸಿಹಿಯಾಗಿ, ಕ್ರಂಚಿಯಾಗಿರುತ್ತವೆ. ಆದರೆ ಪೌಷ್ಠಿಕಾಂಶದ ಮೌಲ್ಯಕ್ಕೆ ಬಂದಾಗ ಅವು ಸಾಮಾನ್ಯ ಸೇಬುಗಳಿಗೆ ಎಲ್ಲಿಯೂ ಹೋಲಿಕೆ ಬರುವುದಿಲ್ಲ. ಸಾಮಾನ್ಯ ಸೇಬು 4 ಗ್ರಾಂ ಫೈಬರ್ ಅನ್ನು ನೀಡುತ್ತದೆ ಮತ್ತು ರಕ್ತದೊತ್ತಡವನ್ನು ಕಡಿಮೆ ಮಾಡಲು ಸಹಾಯ ಮಾಡುವ ಎಪಿಕಾಟೆಚಿನ್ ಎಂಬ ಫ್ಲೇವನಾಯ್ಡ್ ಅನ್ನು ಹೊಂದಿರುತ್ತದೆ, ಆದರೆ ಈ ಜಾತಿಯು ಅಂತಹ ಯಾವುದೇ ಪ್ರಯೋಜನಗಳನ್ನು ಹೊಂದಿಲ್ಲ.
ಅಲ್ಲದೆ, ಅವು ತುಂಬಾ ದುಬಾರಿಯಾಗಿವೆ. ಪ್ರತಿ ಸೇಬು ಬೆಲೆ 7 ಡಾಲರ್’ನಿಂದ 20 ಡಾಲರ್ ನಡುವೆ ವೆಚ್ಚವಾಗಬಹುದು. ಅಂದಹಾಗೆ ಆನ್‌’ಲೈನ್‌ನಲ್ಲಿ ಈ ಸೇಬು ಬಗ್ಗೆ ವಿವಿಧ ಮಾಹಿತಿಗಳು ಆಗಾಗ್ಗೆ ಹರಿದಾಡುತ್ತವೆ. ಈ ಹಣ್ಣುಗಳು ನಿಜವಾಗಿಯೂ ಇವೆಯೇ ಎಂದು ಪ್ರಶ್ನೆ ಕೇಳಲಾಗುತ್ತದೆ. ಒಟ್ಟಿನಲ್ಲಿ ಬ್ಲ್ಯಾಕ್ ಡೈಮಂಡ್ ಇತ್ತೀಚಿನ ದಿನಗಳಲ್ಲಿ ಚರ್ಚೆಯ ಹಣ್ಣಾಗಿರುವುದಂತೂ ಸುಳ್ಳಲ್ಲ.
To Read in English Click: What is Black Diamond Apple and is it healthy?