ಬಾತ್‌‌ರೂಮ್‌ನಲ್ಲಿ ವಯಸ್ಸಾದವರು ಜಾರಿ ಬೀಳದಂತೆ ನೋಡಿಕೊಳ್ಳುವ 8 ಮಾರ್ಗಗಳು

ಒಂದು ಮನೆಯಲ್ಲಿ ದೊಡ್ಡವರು, ಚಿಕ್ಕವರು, ವಯಸ್ಸಾದವರು ಎಲ್ಲರೂ ಇರುತ್ತಾರೆ. ಒಂದು ಕುಟುಂಬದ ಸಂಪೂರ್ಣ ನೆಮ್ಮದಿ, ಸಂತೋಷ ಹಾಗೂ ಆರೋಗ್ಯ ಎಲ್ಲರಿಂದಲೂ ಸಿಗುತ್ತದೆ ಎನ್ನುವುದರಲ್ಲಿ ಕಿಂಚಿತ್ತೂ ಲೋಪವಿಲ್ಲ. ವಯಸ್ಸಾದವರ ವಿಚಾರವಾಗಿ ಈಗಿನ ಕಾಲದಲ್ಲಿ ಬಹಳಷ್ಟು ತಾತ್ಸಾರಗಳು, ದೌರ್ಜನ್ಯಗಳು ನಮ್ಮ ಕಣ್ಣ ಮುಂದೆಯೇ ನಡೆಯುತ್ತಿವೆ.

ಇದನ್ನು ನೋಡಿಯೂ ಕೂಡ ನೋಡದಂತೆ ಕೆಲವು ಬಾರಿ ಸಂದರ್ಭ ನಮ್ಮ ಕೈ ಕಟ್ಟಿ ಹಾಕಿರುತ್ತದೆ. ಆದರೆ ಇಂದಿನ ಕುಟುಂಬದ ಸದ್ಯದ ಸ್ಥಿತಿ ಚೆನ್ನಾಗಿರಲು ಇಂದಿನ ವಯಸ್ಸಾದವರ ಅಂದಿನ ಶ್ರಮ ಎಷ್ಟಿರಬೇಕು ಎಂಬುದನ್ನು ಪ್ರತಿಯೊಬ್ಬರೂ ಆಲೋಚನೆ ಮಾಡಬೇಕು. ವಯಸ್ಸಾದವರ ಆರೋಗ್ಯದ ಕಾಳಜಿ ಸದ್ಯ ಮನೆಯ ಜವಾಬ್ದಾರಿ ಹೊತ್ತಿರುವ ಯಜಮಾನ ಅಥವಾ ಯಜಮಾನಿಯ ಕೆಲಸ.

ಒಬ್ಬ ವ್ಯಕ್ತಿಗೆ ವಯಸ್ಸಾಗುತ್ತಿದ್ದಂತೆ ಆತನ ದೇಹದ ಅಂಗಾಂಗಗಳು ನಿಧಾನವಾಗಿ ತಮ್ಮ ಕಾರ್ಯ ಕ್ಷಮತೆಯಲ್ಲಿ ಕ್ಷೀಣಿಸುತ್ತಾ ಬರುತ್ತವೆ. ತಾವು ವಯಸ್ಕರಾಗಿ ಇದ್ದಾಗ ತುಂಬಾ ಗಟ್ಟಿಮುಟ್ಟಾದ ಮೂಳೆಗಳು ವಯಸ್ಸಾದ ಮೇಲೆ ದುರ್ಬಲವಾಗುತ್ತವೆ. ಹಾಗಾಗಿ ಸ್ವಲ್ಪ ಎಡವಿ ಜಾರಿ ಬಿದ್ದರೂ ಕೂಡ ದೇಹದ ಯಾವುದಾದರೂ ಭಾಗದಲ್ಲಿ ಮೂಳೆಗಳು ಮುರಿದುಕೊಳ್ಳುವ ಸಾಧ್ಯತೆ ಹೆಚ್ಚಾಗಿರುತ್ತದೆ.

ಹಾಗಾಗಿ ಇದರ ಬಗ್ಗೆ ಮನೆಯಲ್ಲಿರುವ ಇತರ ಸದಸ್ಯರು ಮೊದಲು ಹೆಚ್ಚಿನ ಗಮನ ವಹಿಸಬೇಕು ತಮಗಾಗಿ ಶ್ರಮಿಸಿದ ಅವರ ಆರೋಗ್ಯದ ಬಗ್ಗೆ ಹೆಚ್ಚು ಜಾಗರೂಕತೆಯಿಂದ ಇದ್ದರೆ ಇಡೀ ಮನೆ ಸಂಪೂರ್ಣವಾಗಿ ಖುಷಿಯಿಂದ ಕೂಡಿರುತ್ತದೆ.

ಬಾತ್ರೂಮ್ ಟಾಯ್ಲೆಟ್ ಇರುವ ಜಾಗದಲ್ಲಿ ಯಾವಾಗಲೂ ತೇವಾಂಶ ಇರುವ ಕಾರಣದಿಂದ ವಯಸ್ಸಾದವರು ಅಲ್ಲಿ ನಡೆದಾಡುವ ಸಂದರ್ಭದಲ್ಲಿ ಸ್ವಲ್ಪ ಎಚ್ಚರಿಕೆಯಿಂದ ಇರಬೇಕು. ಇದಕ್ಕಾಗಿ ಮನೆಯಲ್ಲಿನ ಸದಸ್ಯರು ಯಾವ - ಯಾವ ಅನುಕೂಲತೆಗಳನ್ನು ವಯಸ್ಸಾದವರಿಗೆ ಆಗಿ ಮಾಡಿಕೊಡಬೇಕು ಎಂಬುದನ್ನು ಈ ಲೇಖನದಲ್ಲಿ ತಿಳಿದುಕೊಳ್ಳಬಹುದು.

ಸ್ಲಿಪ್ ಆಗದಂತಹ ಫ್ಲೋರ್ ಮತ್ತು ಶವರ್ ಮ್ಯಾಟ್ ಗಳನ್ನು ಖರೀದಿಸಿ
ಸಾಮಾನ್ಯವಾಗಿ ಬಚ್ಚಲು ಮನೆ ಎಂದ ಮೇಲೆ ಅದು ನೀರು ಹರಿಯುವ ಜಾಗ ಆಗಿರುವುದರಿಂದ ಸಾಕಷ್ಟು ಜಾರುತ್ತದೆ ಮತ್ತು ಪ್ರಮುಖವಾಗಿ ವಯಸ್ಸಾದವರಿಗೆ ಮತ್ತು ಗರ್ಭಿಣಿಯರಿಗೆ ಇದರಿಂದ ಸಾಕಷ್ಟು ತೊಂದರೆ ಉಂಟಾಗುವುದು ಸಹಜ.

ಹಾಗಾಗಿ ಸ್ನಾನ ಮಾಡುವ ಸಂದರ್ಭಕ್ಕೆ ಸರಿಯಾಗಿ ಅಳವಡಿಸಿಕೊಳ್ಳಬಹುದಾದ ಟೆಂಪರ್ವರಿ ನಾನ್ - ಸ್ಲಿಪ್ ಕಾರ್ಪೆಟ್ ಮ್ಯಾಟ್ ಗಳನ್ನು ಖರೀದಿಸಿ ಬಚ್ಚಲು ಮನೆಯಲ್ಲಿ ಅಥವಾ ಸಿಂಕ್ ಗಳು ಇರುವ ಜಾಗದಲ್ಲಿ ಬಾತ್ ಟಬ್ ಗಳ ಒಳ ಭಾಗದಲ್ಲಿ ಅಳವಡಿಸಬಹುದು. ಬೇಕೆಂದರೆ ಶಾಶ್ವತವಾಗಿ ಕೂಡ ಅದನ್ನು ಅಲ್ಲೇ ಇರಲು ಬಿಡಬಹುದು. ಇದರಿಂದ ಸಾಕಷ್ಟು ಅನುಕೂಲವಾಗಲಿದೆ.

ಕೇವಲ ಬಾತ್ರೂಮ್ ಫ್ಲೋರ್ ಮಾತ್ರವಲ್ಲದೆ ಬಾತ್ ಟಬ್ ಗಳಿಗೆ ಸಹ ಇದನ್ನು ಅನ್ವಯಿಸುವುದರಿಂದ ಬಹಳ ಕಡಿಮೆ ಖರ್ಚಿನಲ್ಲಿ ಸಾಕಷ್ಟು ಮುಂಜಾಗ್ರತಾ ಕ್ರಮಗಳನ್ನು ತೆಗೆದುಕೊಂಡಂತಹ ಅನುಭವ ನಿಮ್ಮದಾಗುತ್ತದೆ.

ಹಿಡಿದುಕೊಳ್ಳಲು ಗೋಡೆಗೆ ಗ್ರಾಬ್ ಬಾರ್ ಹಾಕಿ
ಇದು ಸಹ ತುಂಬಾ ಅನುಕೂಲಕರವಾದ ವಿಶೇಷವಾಗಿ ವಯಸ್ಸಾದವರು ಜಾರಿ ಬೀಳುವ ಸಂದರ್ಭದಲ್ಲಿ ತಕ್ಷಣಕ್ಕೆ ಕೈಗೆ ಸಿಗುವಂತೆ ಹಿಡಿದುಕೊಳ್ಳುವ ಸ್ಟೀಲ್ ಬಾರ್. ಗೋಡೆಗೆ ಹಾಕಿರುವ ಗ್ರಬ್ ಬಾರ್ ವಯಸ್ಸಾದವರು ಸ್ನಾನ ಮಾಡುವ ಸಂದರ್ಭದಲ್ಲಿ ಜಾರಿ ಬೀಳುವ ಸಾಧ್ಯತೆ ಇರುವುದರಿಂದ ತಕ್ಷಣಕ್ಕೆ ಹಿಡಿದುಕೊಳ್ಳಲು ಅವಶ್ಯವಾಗಿರುತ್ತದೆ. ರಕ್ತದ ಒತ್ತಡ ಕಡಿಮೆ ಇರುವವರೆಗೂ ಕೂಡ ಬಾತ್ರೂಮ್ ನಲ್ಲಿ ಜಾರಿ ಬೀಳುವ ಸಾಧ್ಯತೆ ಇರುವುದರಿಂದ ಪ್ರತಿಯೊಬ್ಬರ ವಿಚಾರದಲ್ಲೂ ಇದನ್ನು ಮರೆಯುವಂತಿಲ್ಲ.

ಮಕ್ಕಳೂ ಕೂಡ ಯಾವುದೇ ಕ್ಷಣದಲ್ಲಿ ತಮ್ಮ ತುಂಟಾಟಗಳಿಂದ ಬಾತ್ ರೂಮ್ ನಲ್ಲಿ ಜಾರಿ ಬೀಳಬಹುದು. ಪ್ರಮುಖವಾಗಿ ವಯಸ್ಸಾದವರು ಬಾತ್ರೂಮ್ ಗೆ ಹೋಗುವ ಜಾಗದಲ್ಲಿ ಗ್ರಾಬ್ ಬಾರ್ ಇನ್ಸ್ಟಾಲ್ ಮಾಡಿದರೆ ಒಳ್ಳೆಯದು. ಬೀಳುವಂತಹ ಸಂದರ್ಭ ಎದುರಾದ ತಕ್ಷಣದಲ್ಲಿ ಇದನ್ನು ಹಿಡಿದುಕೊಳ್ಳುವುದರಿಂದ ಆಗುವ ಅನಾಹುತದಿಂದ ತಪ್ಪಿಸಿಕೊಳ್ಳಬಹುದು.

ರೈಸ್ ಮಾಡಿದ ಟಾಯ್ಲೆಟ್ ಸೀಟ್ ಇನ್ಸ್ಟಾಲ್ ಮಾಡಿ
ನಾವು ಸಾಧಾರಣವಾಗಿ ನಮ್ಮ ಮನೆಗಳಲ್ಲಿ ಬಹಳ ಹಿಂದಿನ ಕಾಲದಿಂದ ಕೆಳಗಡೆ ಕುಳಿತುಕೊಂಡು ಮೂತ್ರ ವಿಸರ್ಜನೆ ಅಥವಾ ಮಲ ವಿಸರ್ಜನೆ ಮಾಡಲು ಅನುಕೂಲವಾದಂತಹ ಟಾಯ್ಲೆಟ್ ಸೀಟ್ ಹಾಕಿರುತ್ತೇವೆ. ಇದು ವಯಸ್ಸಾದವರಿಗೆ ಸಾಕಷ್ಟು ಕಷ್ಟವಾಗುತ್ತದೆ.

ಹಾಗಾಗಿ ಈಗಿನ ಪಾಶ್ಚಿಮಾತ್ಯ ಸಂಸ್ಕೃತಿಯ ಪ್ರಕಾರ ರೈಸ್ ಮಾಡಿದ ಟಾಯ್ಲೆಟ್ ಸೀಟ್ ಗಳು ಎಲ್ಲ ಕಡೆ ಲಭ್ಯವಿವೆ. ಹಾಗಾಗಿ ವಯಸ್ಸಾದವರು ಇರುವ ಮನೆಗಳಲ್ಲಿ ಇಂತಹ ಟಾಯ್ಲೆಟ್ ಸೀಟ್ ಹಾಕುವುದು ಒಳ್ಳೆಯದು. ಪಕ್ಕದಲ್ಲಿ ಗೋಡೆಗೆ ಒಂದು ಸ್ಟೀಲ್ ಬಾರ್ ಅಥವಾ ಸೇಫ್ಟಿ ರೈಲ್ ಹಾಕುವುದರಿಂದ ಅದನ್ನು ಹಿಡಿದುಕೊಂಡು ಮೇಲೆ ಎದ್ದೇಳಲು ವಯಸ್ಸಾದವರಿಗೆ ತುಂಬಾ ಸಹಾಯವಾಗುತ್ತದೆ.

ಶವರ್ ಚೇರ್ ಹಾಕಬಹುದು
ವಯಸ್ಸಾದವರಿಗೆ ತಾವು ನಡೆದಾಡುವ ಅಥವಾ ನಿಂತುಕೊಳ್ಳುವ ಸಂದರ್ಭದಲ್ಲಿ ದೇಹದ ಸಮತೋಲನ ತಪ್ಪುವ ಸಾಧ್ಯತೆ ಹೆಚ್ಚಾಗಿರುತ್ತದೆ. ಅದರಲ್ಲೂ ಬಚ್ಚಲು ಮನೆಗಳಲ್ಲಿ ಒಂದು ವೇಳೆ ಸ್ನಾನ ಮಾಡುವ ಸಂದರ್ಭದಲ್ಲಿ ಈ ರೀತಿಯ ದೇಹದ ಸಮತೋಲನ ತಪ್ಪಿದರೆ ಇದ್ದಕ್ಕಿದ್ದಂತೆ ಜಾರಿ ಬೀಳುವ ಪ್ರಮೇಯ ಎದುರಾಗುತ್ತದೆ.

ಈ ಸಮಯದಲ್ಲಿ ಎಂತಹ ಅನಾಹುತ ಬೇಕಾದರೂ ನಡೆಯಬಹುದು. ಹಾಗಾಗಿ ನಿಮ್ಮ ಪ್ರೀತಿಯ ತಂದೆ, ತಾಯಿ, ಅಜ್ಜ ಅಥವಾ ಅಜ್ಜಿ ಯಾವುದೇ ದೈಹಿಕ ನ್ಯೂನತೆಗಳಿಗೆ ಗುರಿಯಾಗಬಾರದು ಎಂದರೆ ಸ್ನಾನ ಮಾಡುವ ಸಂದರ್ಭದಲ್ಲಿ ಅವರು ಕುಳಿತುಕೊಳ್ಳುವಂತೆ ಅನುಕೂಲವಾಗಲು ಒಂದು ಚೇರ್ ಇನ್ಸ್ಟಾಲ್ ಮಾಡುವ ಪರಿಪಾಠ ನಿಮ್ಮದಾಗಲಿ. ಚೇರ್ ಕಾಲುಗಳಿಗೆ ರಬ್ಬರ್ ಟಿಪ್ ಗಳಿದ್ದರೆ ಇನ್ನೂ ಒಳ್ಳೆಯದು. ಇದು ಬಚ್ಚಲು ಮನೆಯಲ್ಲಿ ಅವರು ಜಾರುವುದರಿಂದ ತಪ್ಪಿಸುತ್ತದೆ.

ಬೇಕಾದ ವಸ್ತುಗಳು ಕೈಗೆ ಸಿಗುವಂತೆ ಇಡಿ
ವಯಸ್ಸಾದವರಿಗೆ ಸ್ನಾನ ಮಾಡುವ ಸಂದರ್ಭದಲ್ಲಿ ಅಗತ್ಯವಾಗಿ ಬೇಕಾದ ಸೋಪು ಮತ್ತು ಶಾಂಪು, ಟವಲ್, ಹಾಕಿಕೊಳ್ಳುವ ಬಟ್ಟೆಗಳು ಎಲ್ಲವನ್ನೂ ಅವರ ಕೈಗೆ ಸುಲಭವಾಗಿ ಸಿಗುವಂತೆ ಹತ್ತಿರದಲ್ಲೇ ಇಡಿ. ಒಂದು ವೇಳೆ ಬಚ್ಚಲು ಮನೆಯಲ್ಲಿ ಶವರ್ ಸೌಲಭ್ಯ ಇಲ್ಲದೆ ಹೋದರೆ ಬಕೆಟ್ ಗೆ ಅವರು ಸ್ನಾನ ಮಾಡುವಂತೆ ಅನುಕೂಲಕರವಾಗುವ ಉಗುರು ಬೆಚ್ಚಗಿನ ನೀರನ್ನು ತುಂಬಿ ಅವರು ಕುಳಿತುಕೊಳ್ಳುವ ಚೇರ್ ಪಕ್ಕದಲ್ಲಿ ಇಟ್ಟು ಬನ್ನಿ.

ಬಾತ್‌ರೂಂಗೆ ಸುಂದರ ಸ್ಪರ್ಶ

ರೆಮೋವೆಬಲ್ ಶವರ್ ಹೆಡ್ ಇನ್ಸ್ಟಾಲ್ ಮಾಡಿ
ವಯಸ್ಸಾದವರಿಗೆ ನಿಂತುಕೊಂಡು ಸ್ನಾನ ಮಾಡುವುದಕ್ಕಿಂತ ಸುಲಭವಾಗಿ ಚೇರ್ ಮೇಲೆ ಕುಳಿತುಕೊಂಡು ಸ್ನಾನ ಮಾಡುವ ಅಭ್ಯಾಸ ಹೆಚ್ಚು ಅನುಕೂಲಕರ ಆಗಿರುವುದರಿಂದ ಶವರ್ ಹ್ಯಾಂಡಲ್ ಸುಲಭವಾಗಿ ಅವರಿಗೆ ಕೈಗೆ ಹಿಡಿದುಕೊಳ್ಳುವಂತೆ ರಿಮೂವೇಬೆಲ್ ಶವರ್ ಹೆಡ್ ಇನ್ಸ್ಟಾಲ್ ಮಾಡಿ. ಇದರಿಂದ ಸ್ನಾನ ಮಾಡುವ ಸಂದರ್ಭದಲ್ಲಿ ಅವರಿಗೆ ಹೆಚ್ಚು ನಿಯಂತ್ರಣ ಸಿಕ್ಕಂತೆ ಆಗುತ್ತದೆ.

ಸುರಕ್ಷತಾ ಮಾನದಂಡಗಳ ಬಗ್ಗೆ ತಿಳಿದುಕೊಳ್ಳಿ
ನೀವು ಒಂದು ವೇಳೆ ಇತ್ತೀಚಿಗೆ ನಿಮ್ಮ ಮನೆಯನ್ನು ಆಧುನಿಕ ರೂಪು - ರೇಷೆಗಳಿಗೆ ತಕ್ಕಂತೆ ಬದಲಾಯಿಸಿದ್ದರೆ, ಅದು ನಿಮ್ಮ ಮನೆಯಲ್ಲಿರುವ ವಯಸ್ಸಾದವರಿಗೆ ಯಾವ ರೀತಿ ಸೂಕ್ತವಾಗುತ್ತದೆ ಎಂಬುದನ್ನು ಮೊದಲು ಆಲೋಚನೆ ಮಾಡಿ. ಒಂದು ವೇಳೆ ನಿಮಗೆ ತಿಳಿಯದಿದ್ದರೆ ಪ್ರಾಥಮಿಕ ಆರೋಗ್ಯ ಚಿಕಿತ್ಸಾ ವೈದ್ಯರನ್ನು ಒಮ್ಮೆ ಸಂಪರ್ಕಿಸಿ ವಯಸ್ಸಾದವರಿಗೆ ಮಾಡಬೇಕಾದ ಸುರಕ್ಷತೆಯ ಅನುಕೂಲಗಳ ಬಗ್ಗೆ ಮೊದಲೇ ಕೇಳಿ ತಿಳಿದುಕೊಳ್ಳಿ ಮತ್ತು ಅದರಂತೆ ಅಗತ್ಯವಾದ ಮಾರ್ಪಾಡು ಮಾಡಿ.

ವಯಸ್ಸಾದವರ ಆರೈಕೆಗೆ ಒಬ್ಬರನ್ನು ನೇಮಿಸಿ
ಕೇವಲ ಸ್ಥಾನ ಮಾಡುವ ಸಂದರ್ಭದಲ್ಲಿ ಮಾತ್ರವಲ್ಲದೆ ವಯಸ್ಸಾದವರು ಬಾತ್ರೂಮ್ ಬಳಿ ಹೋದಾಗ ಅವರನ್ನು ಕೈ ಹಿಡಿದುಕೊಂಡು ಕರೆದುಕೊಂಡು ಹೋಗಿ ಬರಲು ಒಬ್ಬ ಅನುಕೂಲಕರ ವ್ಯಕ್ತಿಯನ್ನು ನೇಮಕ ಮಾಡಿ.

ಅವರು ನಿಮ್ಮ ಮನೆಯ ವಯಸ್ಸಾದವರ ಬಗ್ಗೆ ಸಂಪೂರ್ಣ ಕಾಳಜಿ ವಹಿಸುವಂತಹವರಾಗಿರಬೇಕು. ಪ್ರತಿ ಕ್ಷಣದಲ್ಲೂ ಅವರ ಜೊತೆಯಲ್ಲೇ ಇದ್ದು ಹೆಚ್ಚು ಕಾಳಜಿ ವಹಿಸುವಂತಹವರಾಗಿರಬೇಕು. ಒಂದು ಮನೆಯ ಸಂತೋಷ ಸಂಪೂರ್ಣವಾಗಿ ಮನೆಯಲ್ಲಿನ ಎಲ್ಲಾ ಕುಟುಂಬದ ಸದಸ್ಯರಿಂದ ಉಂಟಾಗುತ್ತದೆ ಎಂಬುದರಲ್ಲಿ ಯಾವುದೇ ಆಶ್ಚರ್ಯವಿಲ್ಲ.

ಅದರಲ್ಲಿ ವಯಸ್ಸಾದವರು ಕೂಡ ಸೇರಿದ್ದಾರೆ ಎಂದು ಹೇಳಬಹುದು. ಹಾಗಾಗಿ ವಯಸ್ಸಾದವರ ಬಗ್ಗೆ ಈಗಿನ ಸಮಯದಲ್ಲಿ ತುಂಬಾ ಕಾಳಜಿ ತೋರಿಸುವುದು ಅತ್ಯಂತ ಮುಖ್ಯವಾಗಿದೆ. ಮನೆಯಲ್ಲಿ ಕೆಲವು ಸಣ್ಣ - ಪುಟ್ಟ ಬದಲಾವಣೆಗಳನ್ನು ಮಾಡಿಕೊಂಡು ವಯಸ್ಸಾದ ಹಿರಿಯರಿಗೆ ಅನುಕೂಲವಾಗುವಂತಹ ಈ ಮೇಲಿನ ಬಾತ್ರೂಮ್ ಟಿಪ್ಸ್ ಗಳನ್ನು ಅನುಸರಿಸುವುದರಿಂದ ವಯಸ್ಸಾದವರ ಆರೋಗ್ಯವನ್ನು ಅಚ್ಚುಕಟ್ಟಾಗಿ ಕಾಪಾಡಬಹುದು.