ಪೋಷಕಾಂಶಗಳ ಆಗರ ಮೊಳಕೆ ಕಟ್ಟಿದ ಕಾಳು

ಬೇಳೆ-ಕಾಳುಗಳನ್ನು ಮೊಳಕೆ ಬರಿಸಿ ಸೇವಿಸುವ ಪದ್ಧತಿ ಅನಾದಿ ಕಾಲದಿಂದಲೂ ಇದೆ. ಆದರೆ ಇತ್ತೀಚಿನ ದಿನಗಳಲ್ಲಿ ಇದರ ಅರಿವು ಇರುವುದರಿಂದ ಬಳಕೆ ಕೂಡ ಹೆಚ್ಚಾಗಿದೆ.
ಮೊಳಕೆ ಹೊಂದಿರುವ ಕಾಳುಗಳು ಅಪಾರ ಪೋಷಕಾಂಶಗಳನ್ನು ಒಳಗೊಂಡಿರುತ್ತವೆ. ಸುಲಭವಾಗಿ ಜೀರ್ಣವಾಗುವ ಶಕ್ತಿ ಹೊಂದಿರುವ ಇವು ದೇಹಕ್ಕೆ ಅಗತ್ಯ ಪೋಷಣೆಯನ್ನು ನೀಡುತ್ತವೆ. ಮೊಳಕೆ ಕಾಳುಗಳಿಂದ ಉತ್ತಮ ವಿಟಮಿನ್‌ಗಳು ದೊರೆಯುತ್ತವೆ ವಿಟಮಿನ್‌ ಕೆ, ಸಿ ಮತ್ತು ಬಿ- ವಿಟಮಿನ್‌ಗಳು ದೊರಕುತ್ತವೆ. ಈ ವಿಟಮಿನ್‌ಗಳು ನಮ್ಮ ದೇಹದ ಜೀರ್ಣತೆಯಲ್ಲಿ ಹಾಗೂ ಪಚನ ಕ್ರಿಯೆಯಲ್ಲಿ ಪ್ರಮುಖ ಪಾತ್ರ ವಹಿಸಿ ಶಕ್ತಿಯನ್ನು ಬಿಡುಗಡೆ ಮಾಡುತ್ತದೆ.

ಮೊಳಕೆಯಲ್ಲಿನ ಹಲವು ವಿಟಮಿನ್‌ಗಳು ಹಾಗೂ ಮಿನರಲ್ಸ್‌ಗಳು ಪ್ರೊಟೀನ್‌ ಜತೆಗೂಡಿ ಉತ್ತಮ ಪ್ರೊಟೀನ್‌ ಬಿಡುಗಡೆ ಮಾಡುತ್ತದೆ. ಇದರಿಂದ ದೇಹದ ಜೀವಕೋಶಗಳ ರಿಪೇರಿ ಕೆಲಸಗಳು ಸರಾಗವಾಗಿ ನಡೆಯುತ್ತದೆ. ಮೊಳಕೆ ಬರಿಸುವುದರಿಂದ ಬೇಳೆ ಕಾಳುಗಳ ಪೋಷಕಾಂಶಗಳು ದ್ವಿಗುಣಗೊಳ್ಳುತ್ತವೆ.

ಸ್ಥೂಲ ದೇಹದವರು ಪಥ್ಯ ಆಹಾರ ಸೇವಿಸುವಾಗ ಮೊಳಕೆ ಕಾಳುಗಳನ್ನು ಆಹಾರದಲ್ಲಿ ಅಳವಡಿಸಿಕೊಂಡರೆ ತೂಕ ಇಳಿಯುವುದರ ಜತೆಗೆ ಆರೋಗ್ಯ ಕೂಡ ಉತ್ತಮಗೊಳ್ಳುತ್ತದೆ. ಸೋಡಿಯಂ ಕಡಿಮೆ ಇರುವುದರಿಂದ ಅಧಿಕ ರಕ್ತದೊತ್ತಡದ ತೊಂದರೆ ಇರುವವರು ಕೂಡ ತಮ್ಮ ಆಹಾರ ಕ್ರಮದಲ್ಲಿ ಮೊಳಕೆ ಕಾಳುಗಳನ್ನು ಅಳವಡಿಸಿಕೊಳ್ಳಬಹುದು. ಬೆಳೆಯುವ ಮಕ್ಕಳು ಹಾಗೂ ಹದಿಹರೆಯದವರ ಆರೋಗ್ಯಕ್ಕೆ ಮೊಳಕೆ ಕಾಳುಗಳು ಬಹಳ ಪ್ರಯೋಜನಕಾರಿ.

ಮೊಳಕೆಯಲ್ಲಿ ವಿಟಮಿನ್‌ಗಳು ಬೇಗ ಹಾಳಾಗುವುದರಿಂದ ತಾಜಾ ಇರುವಾಗಲೇ ಸೇವಿಸುವುದು ಉತ್ತಮ ಹಾಗೂ ಮೊಳಕೆಯನ್ನು ತಯಾರಿಸಲು ಬಳಸುವ ನೀರು ಶುದ್ಧವಾಗಿರಬೇಕು. ಇಲ್ಲದಿದ್ದರೆ ಕೆಟ್ಟ ಬ್ಯಾಕ್ಟೀರಿಯಾಗಳು ದೇಹಕ್ಕೆ ಸೇರಿ ಅನಾರೋಗ್ಯ ಉಂಟುಮಾಡುತ್ತದೆ. ಮೊಳಕೆ ಕಾಳುಗಳನ್ನು ಸಲಾಡ್‌ ರೂಪದಲ್ಲಿ ಬಳಸಬಹುದು. ಯಾವ ಆಹಾರದಲ್ಲೂ ಬೇಕಾದರೂ ಬಳಸಬಹುದು. ಸಾತ್ವಿಕ ಆಹಾರ ಸೇವನೆ ಉತ್ತಮ ಆರೋಗ್ಯದ ಬುನಾದಿ ಎಂಬುದು ನೆನಪಿರಲಿ.