ಕಹಿಬೇವಿಗಿದೆ ಸ್ತನ ಕ್ಯಾನ್ಸರ್‌ ಗುಣಪಡಿಸುವ ಶಕ್ತಿ

ಕಹಿಬೇವನ್ನು 'ಸರ್ವ ರೋಗ ನಿವಾರಿಣಿ' ಎಂದೇ ಕರೆಯುತ್ತಾರೆ. ಕಹಿ ಬೇವಿನ ಮರದ ಬೇರಿನಿಂದ ಹಿಡಿದು ಹೂ-ಕಾಯಿವರೆಗೆ ಹಲವಾರು ಔಷಧೀಯ ಗುಣಗಳನ್ನು ಹೊಂದಿದೆ. ನಮ್ಮಲ್ಲಿ ಪುರಾತನ ಕಾಲದಿಂದಲೂ ನಾನಾ ರೀತಿಯ ಕಾಯಿಲೆಗಳನ್ನು ಗುಣಪಡಿಸಲು ಬೇವನ್ನು ಬಳಸುತ್ತಾರೆ. ಇದೀಗ ಬೇವಿನಿಂದ ಸ್ತನ ಕ್ಯಾನ್ಸರ್‌ನಂಥ ಮಾರಕ ರೋಗವನ್ನು ಗುಣಪಡಸಬಹುದೆಂದು ವೈಜ್ಞಾನಿಕವಾಗಿ ಸಾಬೀತಾಗಿದೆ.

ಹೈದರಾಬಾದ್‌ ಮೂಲದ ‘ನೈಪರ್‌’ ಸಂಸ್ಥೆಯ ವಿಜ್ಞಾನಿಗಳು ಮಹಿಳೆಯರ ಪ್ರಾಣಕ್ಕೆ ಕುತ್ತು ತರುವ ಸ್ತನ ಕ್ಯಾನ್ಸರ್‌ಗೆ ‘ನಿಂಬೊಲೈಡ್‌’ ಎಂಬ ಹೊಸ ಔಷಧವೊಂದನ್ನು ಕಂಡುಹಿಡಿದಿದ್ದಾರೆ.

‘ನಿಂಬೊಲೈಡ್‌’ ಎಂಬುದು ಕಹಿ ಬೇವಿನ ಎಲೆಗಳು ಹಾಗೂ ಹೂವುಗಳಿಂದ ತಯಾರಿಸಿದ ರಾಸಾಯನಿಕ ಮಿಶ್ರಣವಾಗಿದ್ದು, ಸ್ತನ ಕ್ಯಾನ್ಸರ್‌ ಗುಣಪಡಿಸುವಲ್ಲಿ ಪರಿಣಾಮಕಾರಿಯಾಗಿ ಕೆಲಸ ಮಾಡಬಲ್ಲದು. ಸ್ತನ ಕ್ಯಾನ್ಸರ್‌ ಬೆಳವಣಿಗೆಗೆ ನಿಂಬೊಲೈಡ್‌ ಪರಿಣಾಮಕಾರಿಯಾಗಿ ಪ್ರತಿರೋಧವೊಡ್ಡುತ್ತದೆ ಎಂದು ನೈಪರ್‌ ವಿಜ್ಞಾನಿಗಳು ಕಂಡುಕೊಂಡಿದ್ದಾರೆ. ಪ್ರಸ್ತುತ, ವೈಜ್ಞಾನಿಕ ಪ್ರಯೋಗಗಳು ಹಾಗೂ ಹೆಚ್ಚಿನ ಅಧ್ಯಯನ ಪ್ರಗತಿಯಲ್ಲಿದೆ. ಈ ಸಂಶೋಧನೆ ಸಂಪೂರ್ಣ ಯಶಸ್ವಿಯಾದಲ್ಲಿ, ನಿಂಬೊಲೈಡ್‌ ಅತಿ ಅಗ್ಗದ ದರದ ಕ್ಯಾನ್ಸರ್‌ ನಿರೋಧಕ ಔಷಧ ಎನಿಸಿಕೊಳ್ಳಲಿದೆ.

ಈ ನಿಟ್ಟಿನಲ್ಲಿ ಇನ್ನೂ ಹೆಚ್ಚಿನ ಸಂಶೋಧನೆ ಕೈಗೊಂಡು ವೈದ್ಯಕೀಯ ಪ್ರಯೋಗಗಳನ್ನು ನಡೆಸಲು ಅಗತ್ಯವಿರುವ ಧನಸಹಾಯಕ್ಕಾಗಿ ಆಯುಷ್‌, ಜೈವಿಕ ತಂತ್ರಜ್ಞಾನ ಇಲಾಖೆ, ಮತ್ತಿತರ ವಿಜ್ಞಾನ ಮತ್ತು ತಂತ್ರಜ್ಞಾನ ಸಂಸ್ಥೆಗಳಿಗೆ ಭೇಟಿ ಕೊಟ್ಟು ಮನವಿ ಮಾಡಿಕೊಳ್ಳಲಾಗುತ್ತಿದೆ ಎಂದು ನ್ಯಾಷನಲ್‌ ಇನ್‌ಸ್ಟಿಟ್ಯೂಟ್‌ ಆಫ್‌ ಫಾರ್ಮಾಸ್ಯುಟಿಕಲ್‌ ಎಜುಕೇಶನ್‌ ಆ್ಯಂಡ್‌ ರಿಸರ್ಚ್‌ (ನೈಪರ್‌) ವಿಜ್ಞಾನಿ ಚಂದ್ರಯ್ಯ ಗೊಡುಗು ತಿಳಿಸಿದ್ದಾರೆ.