ಸಕ್ಕರೆ ಕಾಯಿಲೆ ಇರುವವರು ಸಕ್ಕರೆ ಬದಲು ಬೆಲ್ಲ ತಿನ್ನಬಹುದಾ?

ನಿಮಗೆ ಗೊತ್ತಿರಬಹುದು ಬೆಲ್ಲ ಮತ್ತು ಸಕ್ಕರೆಯನ್ನು ತಯಾರು ಮಾಡುವುದು ಕಬ್ಬಿನಿಂದ. ಹಾಗೆಂದ ಮೇಲೆ ಒಂದೇ ಮೂಲದಿಂದ ಬಂದ ಇವೆರಡು ಕೂಡ ಒಂದೇ ಅಲ್ಲದೆ ಮತ್ತೇನು? ಸಕ್ಕರೆ ಹೋಲಿಸಿದರೆ ಬೆಲ್ಲದಲ್ಲಿ ಅಪಾರ ಪ್ರಮಾಣದ ಪೌಷ್ಟಿಕ ಸತ್ವಗಳು ಸಿಗುತ್ತವೆ ಇದು ಮಧುಮೇಹ ಹೊಂದಿರುವ ಜನರಿಗೆ ತುಂಬಾ ಸಹಕಾರಿ ಎಂದೆಲ್ಲಾ ಹೇಳುತ್ತಾರೆ.

ಆದರೆ ಸಕ್ಕರೆ ತಿಂದಾಗ ಮಾತ್ರ ದೇಹದಲ್ಲಿ ರಕ್ತದ ಸಕ್ಕರೆ ಪ್ರಮಾಣ ಹೆಚ್ಚಾಗುತ್ತದೆ ಬೆಲ್ಲ ತಿಂದಾಗ ಹೀಗಾಗುವುದಿಲ್ಲ ಎಂದುಕೊಳ್ಳುವುದು ತಪ್ಪು. ಮಧುಮೇಹ ಹೊಂದಿದ ಜನರಿಗೆ ಇವೆರಡೂ ಸಹ ಡೇಂಜರ್.

• ಸಕ್ಕರೆ ಮತ್ತು ಬೆಲ್ಲ ಕಬ್ಬಿನಿಂದ ತಯಾರಾಗುವ ಕಾರಣ ಮತ್ತು ಸಕ್ಕರೆಯನ್ನು ಹೆಚ್ಚು ಸಂಸ್ಕರಿಸುವ ಕಾರಣದಿಂದ ಸಾಮಾನ್ಯವಾಗಿ ಅದರಲ್ಲಿರುವ ಪೌಷ್ಟಿಕ ಸತ್ವಗಳು ನಾಶವಾಗುತ್ತವೆ. ಆದರೆ ಬೆಲ್ಲದಲ್ಲಿ ಹಾಗಾಗುವುದಿಲ್ಲ.
• ಇದರಲ್ಲಿ ವೈಜ್ಞಾನಿಕವಾಗಿ ಮೆಗ್ನೀಷಿಯಂ, ಕ್ಯಾಲ್ಸಿಯಂ, ಜಿಂಕ್, ಕಬ್ಬಿಣ, ಪೊಟಾಶಿಯಂ, ಫಾಸ್ಪರಸ್, ತಾಮ್ರ ಇತ್ಯಾದಿಗಳು ಸಾಕಷ್ಟು ಅಡಗಿವೆ. ಸಕ್ಕರೆಗೆ ಹೋಲಿಸಿದರೆ ಬೆಲ್ಲ ಇಂತಹ ಪೌಷ್ಟಿಕ ಸತ್ವಗಳಲ್ಲಿ ಪರವಾಗಿಲ್ಲ ಎನ್ನಬಹುದು.
• ಆದರೆ ಗ್ಲೈಸೆಮಿಕ್ ಸೂಚ್ಯಂಕದ ವಿಚಾರಕ್ಕೆ ಬಂದರೆ ಬೆಲ್ಲ ಮತ್ತು ಸಕ್ಕರೆಯಲ್ಲಿ ಅಧಿಕ ಗ್ಲೈಸೆಮಿಕ್ ಸೂಚ್ಯಂಕ ಕಂಡುಬರುತ್ತದೆ. ಇದು ದೇಹ ಸೇರಿದಾಗ ಸಾಧಾರಣವಾಗಿ ರಕ್ತದಲ್ಲಿನ ಸಕ್ಕರೆ ಮಟ್ಟ ಹೆಚ್ಚಾಗುವುದು ಗ್ಯಾರಂಟಿ.
• ಬೆಲ್ಲದಲ್ಲಿ ಸುಕ್ರೋಸ್ ಅಂಶ ಹೆಚ್ಚಾಗಿರುತ್ತದೆ ಮತ್ತು ಸಕ್ಕರೆಯ ಸಂಯುಕ್ತ ಹೆಚ್ಚಿರುವುದರಿಂದ ಇದು ರಕ್ತದಲ್ಲಿ ಸಕ್ಕರೆ ಪ್ರಮಾಣ ಹೆಚ್ಚಾಗುವಂತೆ ಮಾಡುತ್ತದೆ.

ಮೊದಲೇ ಹೇಳಿದಂತೆ ಬೆಲ್ಲ ಮತ್ತು ಸಕ್ಕರೆ ಎರಡು ಒಂದೇ ಆಗಿರುವುದರಿಂದ ಮಧುಮೇಹ ಸಮಸ್ಯೆ ಹೊಂದಿದವರು ಎರಡರ ಬಗ್ಗೆಯೂ ಎಚ್ಚರಿಕೆ ವಹಿಸಬೇಕು.

• ಮನೆಯಲ್ಲಿ ಮೊದಲೇ ಯಾವುದಾದರೂ ಕಾರ್ಬೋಹೈಡ್ರೇಟ್ ಅಂಶ ಹೊಂದಿದ ಆಹಾರ ಪದಾರ್ಥಗಳನ್ನು ಸೇವನೆ ಮಾಡಿದ ಸಂದರ್ಭದಲ್ಲಿ ಸಕ್ಕರೆ ಮತ್ತು ಬೆಲ್ಲ ತಿನ್ನುವ ಬಗ್ಗೆ ಆಲೋಚನೆ ಮಾಡಬೇಕು.
• ಕೇವಲ ಸಣ್ಣ ಪ್ರಮಾಣದಲ್ಲಿ ಮಾತ್ರ ಬೆಲ್ಲವನ್ನು ಈ ಸಂದರ್ಭದಲ್ಲಿ ಸೇವನೆ ಮಾಡುವುದರಿಂದ ಆರೋಗ್ಯಕ್ಕೆ ಯಾವುದೇ ಹಾನಿ ಅಥವಾ ಅಡ್ಡ ಪರಿಣಾಮ ಇರುವುದಿಲ್ಲ.