ಮುಟ್ಟಿಗೂ ಮಧುಮೇಹಕ್ಕೂ ಇದೆ ಸಂಬಂಧ

ಸ್ತೀಯ ಜೀವನಚಕ್ರದಲ್ಲಿ ಮುಟ್ಟು ಬಹಳ ಮಹತ್ವದ ಪಾತ್ರವನ್ನು ವಹಿಸುತ್ತದೆ. ಮುಟ್ಟಿನ ಜತೆ ದೈಹಿಕ ಮತ್ತು ಮಾನಸಿಕ ಆರೋಗ್ಯಕ್ಕೆ ಹತ್ತಿರದ ನಂಟಿರುತ್ತದೆ. ಋತುಚಕ್ರ, ಮುಟ್ಟು ಮುಗಿದ ಮೇಲೆ ಸಹ ದೈಹಿಕ ಮತ್ತು ಮಾನಸಿಕವಾಗಿ ಹಲವು ಬದಲಾವಣೆಗಳಾಗುತ್ತದೆ. ನೈಸರ್ಗಿಕವಾಗಿ ಮುಟ್ಟು ನಿಂತು ಹೋಗುವುದನ್ನು ಮೆನೋಪಾಸ್ ಎನ್ನುತ್ತೇವೆ. ಸುಮಾರು 46 ರಿಂದ 48 ನೇ ವಯಸ್ಸಿನಲ್ಲಿ ಭಾರತೀಯ ಮಹಿಳೆಯರಲ್ಲಿ ಮೆನೋಪಾಸ್ ಶುರುವಾಗುತ್ತದೆ. ಅದಾಗ್ಯೂ ವೈದ್ಯಕೀಯ ಮತ್ತು ಜೀವನಶೈಲಿಯ ಆಧಾರದ ಮೇಲೆ ಮಹಿಳೆಯರಲ್ಲಿ ಬೇಗ ಅಥವಾ ನಿಧಾನವಾಗಿ ಮುಟ್ಟು ನಿಲ್ಲುತ್ತದೆ. ಕೆಲವರಿಗೆ 41 ರಿಂದ 50 ರ ವಯಸ್ಸಿನ ಅಂತರದೊಳಗೆ ಮುಟ್ಟು ನಿಲ್ಲಬಹುದು.

ಆದರೆ ಅವಧಿಗೂ ಮುನ್ನ ಅಂದರೆ 40 ವರ್ಷಕ್ಕೂ ಮುನ್ನ ಋತುಬಂಧಕ್ಕೆ ಒಳಗಾದರೆ ಅಂತಹ ಮಹಿಳೆಯರನ್ನು ಟೈಪ್‌ 2 ಮಧುಮೇಹ ಕಾಡಲಿದೆಯಂತೆ.

50ರ ಆಸುಪಾಸಿನಲ್ಲಿ ಮುಟ್ಟು ನಿಲ್ಲುವ ಮಹಿಳೆಯರಿಗೆ ಹೋಲಿಸಿದರೆ ಇವರಲ್ಲಿ ಮಧುಮೇಹದ ಸಮಸ್ಯೆ ಅತ್ಯಧಿಕವಾಗಿರುತ್ತದೆ. ಏಕೆಂದರೆ ಇವರಲ್ಲಿ ಇನ್ಸುಲಿನ್‌ ಉತ್ಪಾದನೆ ಕುಂಠಿತವಾಗುತ್ತದೆ ಎಂದಿದೆ ಅಧ್ಯಯನ. ಶೇ.50ರಷ್ಟು ಮಹಿಳೆಯರು ಮುಟ್ಟು ನಿಂತಿರುವ ಸಂಬಂಧ ಮಧುಮೇಹ ಸಮಸ್ಯೆಯನ್ನು ಎದುರಿಸುತ್ತಾರಂತೆ.

ಅಷ್ಟೇ ಅಲ್ಲ ಅನಿಯಮಿತ ಋತುಚಕ್ರ ಟೈಪ್‌ 2 ಮಧುಮೇಹದೊಂದಿಗೆ ಸಂಬಂಧ ಹೊಂದಿರಬಹುದು ಎಂದು ಎಚ್ಚರಿಸಿದೆ ಸಂಶೋಧನೆ. ಸಾಮಾನ್ಯವಾಗಿ ಅನಿಯಮಿತ ಋತುಚಕ್ರದಲ್ಲಿ ಪಿಸಿಒಸಿ ಸಮಸ್ಯೆ ಕಾಣಿಸುತ್ತದೆ. ಇದು ಇನ್ಸುಲಿನ್‌ ಸಮತೋಲನದ ಮೇಲೆ ಪ್ರಭಾವ ಬೀರಲಿದ್ದು, ಮಧುಮೇಹ ಸಮಸ್ಯೆಗೆ ಕಾರಣವಾಗಲಿದೆ. ಅಷ್ಟೆ ಅಲ್ಲ, ಫ್ಯಾಟಿ ಲಿವರ್‌ ಸಮಸ್ಯೆ, ಬಂಜೆತನ, ಕ್ಯಾನ್ಸರ್‌ ಸಾಧ್ಯತೆ ಕೂಡ ಇದೆ ಎನ್ನಲಾಗಿದೆ. ಆದ್ದರಿಂದ ಅನಿಯಮಿತ ಮುಟ್ಟನ್ನು ನಿರ್ಲಕ್ಷಿಸದೆ ಆರಂಭದಲ್ಲೇ ಎಚ್ಚರ ವಹಿಸಿ.