ಸಿಹಿ ತಿನ್ನುವ ಬಯಕೆಯೇ? ತಪ್ಪು ನಿಮ್ಮದ್ದಲ್ಲ!

ಸಿಹಿ ಪದಾರ್ಥಗಳನ್ನು ತಿನ್ನುವ ಬಯಕೆಯನ್ನು ಹತ್ತಿಕ್ಕಲು ಸಾಧ್ಯವಾಗುತ್ತಿಲ್ಲವೇ? ಹೆಚ್ಚು ಸಿಹಿ ಪದಾರ್ಥಗಳನ್ನು ತಿಂದರೆ ಒಳ್ಳೆಯದಲ್ಲ ಎಂದು ಗೊತ್ತಿದ್ದರೂ ಬಾಯಿ ಚಪಲಕ್ಕೆ ಬಿದ್ದು ತಿನ್ನುತ್ತಿದ್ದೀರಾ? ಹಾಗಾದರೆ ಅದು ನಿಮ್ಮ ತಪ್ಪಲ್ಲ ಬಿಡಿ, ನಿಮ್ಮ ಲಿವರ್‌ ಮಾಡುತ್ತಿರುವ ಸಮಸ್ಯೆ ಅದು.

ಕೋಪನ್‌ಹೇಗನ್‌ನ ವಿಶ್ವವಿದ್ಯಾನಿಲಯದಲ್ಲಿ ನಡೆಸಿದ ಸಂಶೋಧನೆಯು FGF21 ಜೀನ್ (ಹಾರ್ಮೋನ್) ಇರುವ ವ್ಯಕ್ತಿಗಳಿಗೆ ಸಿಹಿ ತಿನ್ನುವ ಬಯಕೆಯನ್ನು ಹತ್ತಿಕ್ಕಲು ಸಾಧ್ಯವಾಗುವುದಿಲ್ಲ ಎಂದು ಹೇಳಿದೆ.

ಲಿವರ್‌ ಈ ಹಾರ್ಮೋನ್‌ ಅನ್ನು ಉತ್ಪತ್ತಿ ಮಾಡುತ್ತದೆ. ಈ ಹಾರ್ಮೋನ್‌ ಇರುವವರಿಗೆ ತುಂಬಾ ಸಿಹಿ ಪದಾರ್ಥಗಳನ್ನು ತಿನ್ನಬೇಕೆನಿಸುತ್ತಾ ಇರುತ್ತದೆ.

ಈ ಹಾರ್ಮೋನ್‌ ನಮ್ಮ ದೇಹದ ಜೀರ್ಣಕ್ರಿಯೆಯ ಮೇಲೆ ಪರಿಣಾಮ ಬೀರಿ ಒಬೆಸಿಟಿ ಅಥವಾ ಟೈಪ್ 2 ಡಯಾಬಿಟಿಸ್‌ ಸಮಸ್ಯೆಗಳನ್ನು ತರಬಹುದೆಂದು ಸಂಶೋಧನೆಯೂ ಹೇಳಿದೆ.

ಎಲ್ಲರೂ ಸಿಹಿ ತಿನ್ನಲು ಇಷ್ಟಪಡುತ್ತೇವೆ. ಆದರೆ ಬೇಡ ಎಂದು ನಿರ್ಧರಿಸಿದರೆ ತಿನ್ನದೇ ಕೂಡ ಇರಬಹುದು. ಆದರೆ ಯಾವಾಗ ಸಿಹಿ ತಿನ್ನುವ ನಮ್ಮ ಬಯಕೆಯನ್ನು ನಮ್ಮಿಂದ ನಿಯಂತ್ರಿಸಲೂ ಸಾಧ್ಯವಾಗುವುದಿಲ್ಲವೋ ಕೂಡಲೇ ವೈದ್ಯರನ್ನು ಕಂಡು ಒಬೆಸಿಟಿ ಹಾಗೂ ಟೈಪ್‌ 2 ಮಧುಮೇಹವನ್ನು ನಿಯಂತ್ರಿಸಲು ಏನು ಮಾಡಬೇಕೆಂದು ಸಲಹೆ ಪಡೆಯುವುದು ಒಳ್ಳೆಯದು.