ಜ್ವರದಿಂದ ಚೇತರಿಸಿಕೊಳ್ಳಬೇಕೆಂದರೆ ಔಷಧಗಳ ಜೊತೆಗೆ ಸರಿಯಾದ ರೀತಿಯ ಆಹಾರ ಪದಾರ್ಥಗಳನ್ನು ಆರಿಸುವುದು ಅತ್ಯಗತ್ಯ. ಈ ಸಮಯದಲ್ಲಿ ಕರಿದ, ಕ್ರೀಂ ಮತ್ತು ಸಕ್ಕರೆ ಪದಾರ್ಥಗಳನ್ನು ಸೇವಿಸುವುದನ್ನು ತಪ್ಪಿಸಿ. ಬದಲಾಗಿ ಕೆಳಗೆ ನೀಡಿರುವ ಆಹಾರ ಪದಾರ್ಥಗಳನ್ನು ಸೇವಿಸಿ. ಇವು ಅತ್ಯುತ್ತಮ ಆಹಾರ ಮಾತ್ರವಲ್ಲದೆ, ಜ್ವರದಿಂದ ಹೋರಾಡಲು ನಿಮ್ಮ ದೇಹಕ್ಕೆ ಶಕ್ತಿಯನ್ನು ತುಂಬುತ್ತವೆ.
ಚಿಕನ್ ಸೂಪ್
ಜ್ವರದ ಸಮಯದಲ್ಲಿ ಚಿಕನ್ ಸೂಪ್ ಅನ್ನು ಹೆಚ್ಚು ಶಿಫಾರಸ್ಸು ಮಾಡಲಾಗುತ್ತದೆ. ಈ ಬಿಸಿ ಸೂಪ್’ನಲ್ಲಿರುವ ಪ್ರೋಟೀನ್ ಅಂಶವು ದೇಹಕ್ಕೆ ಶಕ್ತಿ ನೀಡುತ್ತದೆ.
ಬೇಕಾಗುವ ಪದಾರ್ಥಗಳು
500 ಗ್ರಾಂ ಸಣ್ಣಗೆ ಕಟ್ ಮಾಡಿಟ್ಟುಕೊಂಡ ಚಿಕನ್, 1-ಲೀಟರ್ ಚಿಕನ್ ಸ್ಟಾಕ್, 1 ಈರುಳ್ಳಿ, 1 ಕ್ಯಾರೆಟ್, 1 ಟೇಬಲ್ ಸ್ಪೂನ್ ಬೆಣ್ಣೆ, 2 ಸೆಲರಿ ಸ್ಟಿಕ್ಸ್, 1 ಟೇಬಲ್ ಸ್ಪೂನ್ ಪಾರ್ಸ್ಲಿ, 1 ಟೀ ಸ್ಪೂನ್ ಕಾರ್ನ್‌ಫ್ಲೋರ್, ರುಚಿಗೆ ತಕ್ಕಷ್ಟು ಕರಿ ಮೆಣಸು, ಉಪ್ಪು
ಮಾಡುವ ವಿಧಾನ
ಈರುಳ್ಳಿ, ಕ್ಯಾರೆಟ್, ಸೆಲರಿಯನ್ನು ನುಣ್ಣಗೆ ಕತ್ತರಿಸಿ. ಬಾಣಲೆಯಲ್ಲಿ ಬೆಣ್ಣೆಯನ್ನು ಬಿಸಿ ಮಾಡಿ, ಕತ್ತರಿಸಿಟ್ಟುಕೊಂಡ ತರಕಾರಿಗಳನ್ನು ಹಾಕಿ, ಸ್ವಲ್ಪ ಹೊತ್ತು ಬೇಯಿಸಿ. ಮತ್ತೊಂದು ಪಾತ್ರೆಯಲ್ಲಿ ಚಿಕನ್ ಬೇಯಿಸಿ. ಚಿಕನ್ ಬೆಂದ ನಂತರ ಇದಕ್ಕೆ ಬೇಯಿಸಿಟ್ಟುಕೊಂಡ ತರಕಾರಿ ಮಿಶ್ರಣ ಸೇರಿಸಿ. ನಂತರ 1 ಚಮಚ ನೀರಿನಲ್ಲಿ ಕಾರ್ನ್‌ಫ್ಲೋರ್ ಅನ್ನು ಚೆನ್ನಾಗಿ ಮಿಶ್ರಣ ಮಾಡಿ, ಇದಕ್ಕೆ ಸೇರಿಸಿ. 10 ನಿಮಿಷಗಳ ಕಾಲ ಪುನಃ ಬೇಯಿಸಿ. ರುಚಿಗೆ ತಕ್ಕಂತೆ ಉಪ್ಪು, ಕರಿಮೆಣಸು ಸೇರಿಸಿ. ಕೊನೆಯಲ್ಲಿ ನುಣ್ಣಗೆ ಕತ್ತರಿಸಿದ ಪಾರ್ಸ್ಲಿ ಜೊತೆ ಅಲಂಕರಿಸಿ, ಬಿಸಿ ಇರುವಾಗಲೇ ಬಡಿಸಿ.
ಬೇಸನ್ ಶಿರಾ
ಬೇಸನ್ ಶಿರಾ ಕಿಚ ಕಿಚ ಅನ್ನುವ ಗಂಟಲು ಕೆರೆತ ಶಮನಗೊಳಿಸುತ್ತದೆ, ನಿರ್ಬಂಧಿಸಿದ ಮೂಗು ತೆರೆಯುತ್ತದೆ ಮತ್ತು ಜ್ವರದಿಂದ ಪರಿಹಾರವನ್ನೂ ನೀಡುತ್ತದೆ.
ಬೇಕಾಗುವ ಪದಾರ್ಥಗಳು
1 ಟೇಬಲ್ ಸ್ಪೂನ್ ತುಪ್ಪ, 2 ಟೇಬಲ್ ಸ್ಪೂನ್ ಬೇಸನ್, 1 ಕಪ್ ಹಾಲು, 1 ಟೇಬಲ್ ಸ್ಪೂನ್ ಪುಡಿ ಬೆಲ್ಲ ಅಥವಾ ಕಂದು ಸಕ್ಕರೆ, ¼ ಟೀ ಸ್ಪೂನ್ ಕರಿಮೆಣಸು ಪುಡಿ, ಒಂದು ಚಿಟಿಕೆ ಅರಿಶಿನ.
ಮಾಡುವ ವಿಧಾನ
ಬಾಣಲೆಯಲ್ಲಿ ತುಪ್ಪವನ್ನು ಬಿಸಿ ಮಾಡಿ. ಬಿಸಿಯಾದ ನಂತರ ಬೇಸನ್ ಸೇರಿಸಿ, ಚೆನ್ನಾಗಿ ಮಿಶ್ರಣ ಮಾಡಿ. ಚಿನ್ನದ ಬಣ್ಣಕ್ಕೆ ತಿರುಗಲು ಪ್ರಾರಂಭಿಸಿದ ನಂತರ ಸುವಾಸನೆ ಬರುವವರೆಗೆ ಕೈಯ್ಯಾಡಿಸಿ. ಈಗ ಹಾಲನ್ನು ಸೇರಿಸಿ, ಉಂಡೆಯಾಗದಂತೆ ಕೈಯ್ಯಾಡಿಸುತ್ತಿರಿ. ನಂತರ ಕರಿಮೆಣಸು ಪುಡಿ, ಅರಿಶಿನ ಸೇರಿಸಿ ಕೈಯ್ಯಾಡಿಸಿ, ಸ್ವಲ್ಪ ಸಮಯ ಕುದಿಯಲು ಬಿಡಿ. ಬಿಸಿ ಇರುವಾಗಲೇ ಕುಡಿಯಿರಿ.
ಜ್ವರ ಬಂದಾಗ ಚಿಕನ್ ಸೇವನೆ ಮಾಡಬಹುದೇ?
ಬೇಯಿಸಿದ ಮೊಟ್ಟೆ
ಮೊಟ್ಟೆಗಳಲ್ಲಿನ ಪ್ರೋಟೀನ್ ಅಂಶವು ಶಕ್ತಿಯನ್ನು ನೀಡುತ್ತದೆ. ನಿಮ್ಮ ರೋಗ ನಿರೋಧಕ ಶಕ್ತಿಯನ್ನು ಬಲಪಡಿಸುತ್ತದೆ.
ಬೇಕಾಗುವ ಪದಾರ್ಥಗಳು
2 ಬೇಯಿಸಿದ ಮೊಟ್ಟೆ, 2 ಟೇಬಲ್ ಸ್ಪೂನ್ ಈರುಳ್ಳಿ, 2 ಟೇಬಲ್ ಸ್ಪೂನ್ ಟೊಮೆಟೊ, 2 ಟೇಬಲ್ ಸ್ಪೂನ್ ಕ್ಯಾಪ್ಸಿಕಂ, 2 ಚಿಟಿಕೆ ಕರಿಮೆಣಸು, 2 ಚಿಟಿಕೆ ಉಪ್ಪು.
ಮಾಡುವ ವಿಧಾನ
ಮೊಟ್ಟೆಯನ್ನು ಸಮಾನ ಭಾಗಗಳಾಗಿ ಕಟ್ ಮಾಡಿ. ಅದರ ಮೇಲೆ ಕರಿಮೆಣಸು ಮತ್ತು ಉಪ್ಪನ್ನು ಸಿಂಪಡಿಸಿ. ನಂತರ ಕತ್ತರಿಸಿದ ಈರುಳ್ಳಿ, ಟೊಮೆಟೊ ಮತ್ತು ಕ್ಯಾಪ್ಸಿಕಂ ಸೇರಿಸಿ. ಚೆನ್ನಾಗಿ ಮಿಶ್ರಣ ಮಾಡಿ ಸೇವಿಸಿ.
ಕಿಚಡಿ
ಕಿಚಡಿ ಆರೋಗ್ಯಕರ ಆಹಾರ. ಜ್ವರ ಬಂದಾಗ ಸೇವಿಸುವುದು ಒಳ್ಳೆಯದು. ಇದನ್ನು ತಯಾರಿಸುವುದು ತುಂಬಾ ಸುಲಭ .
ಬೇಕಾಗುವ ಪದಾರ್ಥಗಳು
½ ಕಪ್ ದಾಲ್, ½ ಕಪ್ ಅಕ್ಕಿ, ½ ಟೀಸ್ಪೂನ್ ಅರಿಶಿನ, ½ ಟೀಸ್ಪೂನ್ ಜೀರಾ, 1 ಬೇ ಎಲೆ, 2 ಲವಂಗ, 2 ಕಪ್ ನೀರು, ರುಚಿಗೆ ತಕ್ಕಂತೆ ಉಪ್ಪು.
ಮಾಡುವ ವಿಧಾನ
ಕುಕ್ಕರ್’ನಲ್ಲಿ ತುಪ್ಪವನ್ನು ಬಿಸಿ ಮಾಡಿ, ಅದರಲ್ಲಿ ಬೇ ಎಲೆ, ಲವಂಗ ಸೇರಿಸಿ. ಕೆಲವು ಸೆಕೆಂಡುಗಳ ಕಾಲ ಕೈಯ್ಯಾಡಿಸಿ. ಈಗ ಜೀರಿಗೆ ಸೇರಿಸಿ, ಅದು ಚಿಟಪಟ ಶಬ್ದ ಮಾಡಿದ ಮೇಲೆ ತೊಳೆದ ಬೇಳೆ ಮತ್ತು ಅಕ್ಕಿ ಸೇರಿಸಿ ಚೆನ್ನಾಗಿ ಮಿಶ್ರಣ ಮಾಡಿ. ಕೊನೆಯದಾಗಿ ಅರಿಶಿನ ಮತ್ತು ನೀರನ್ನು ಸೇರಿಸಿ. ಚೆನ್ನಾಗಿ ಮಿಶ್ರಣ ಮಾಡಿ. 3 ವಿಶಲ್ ಹೊಡೆದ ನಂತರ ಬೆಂದಿರುತ್ತದೆ, ಸವಿಯಿರಿ.
ರೋಗನಿರೋಧಕ ವ್ಯವಸ್ಥೆ ದುರ್ಬಲವಾಗಿದೆ ಎನ್ನುವುದರ ಲಕ್ಷಣಗಳಿವು
ಸೂಜಿ ಉಪ್ಪಿಟ್ಟು
ಸೂಜಿ ಉಪ್ಪಿಟ್ಟನ್ನು ಸುಲಭವಾಗಿ ಜೀರ್ಣಿಸಿಕೊಳ್ಳಬಹುದು. ಜ್ವರದ ಸಮಯದಲ್ಲಿ ಇದು ಸೂಕ್ತವಾದ ಆಹಾರವಾಗಿದೆ. ಇದು ನಿಮ್ಮ ದೇಹಕ್ಕೆ ಶಕ್ತಿಯನ್ನು ನೀಡುವ ಕಾರ್ಬ್‌’ಗಳನ್ನು ಹೊಂದಿರುತ್ತದೆ. ನೀವೂ ತರಕಾರಿಗಳನ್ನು ಸೇರಿಸಬಹುದು.
ಬೇಕಾಗುವ ಪದಾರ್ಥಗಳು
2 ಕಪ್ ನೀರು, 1 ಕಪ್ ಸೂಜಿ ರವೆ, 1 ಟೇಬಲ್ ಸ್ಪೂನ್ ಸಾಸಿವೆ, 10 ಕರಿಬೇವಿನ ಎಲೆಗಳು, 1 ಟೇಬಲ್ ಸ್ಪೂನ್ ಕಡಲೆಬೇಳೆ, 1/4 ಕಪ್ ಬೇಯಿಸಿದ ಬಟಾಣಿ ಮತ್ತು 1 ಕ್ಯಾರೆಟ್, 2 ಟೇಬಲ್ ಸ್ಪೂನ್ ತುಪ್ಪ ಮತ್ತು ರುಚಿಗೆ ತಕ್ಕಂತೆ ಉಪ್ಪು.
ಮಾಡುವ ವಿಧಾನ
ಬಾಣಲೆಯಲ್ಲಿ ತುಪ್ಪ ಬಿಸಿ ಮಾಡಿ. ಸಾಸಿವೆ, ಕರಿಬೇವಿನ ಎಲೆ, ಕಡಲೆಬೇಳೆ ಸೇರಿಸಿ. 1-2 ನಿಮಿಷಗಳ ಕಾಲ ಬೇಯಿಸಿ. ಈಗ ಕತ್ತರಿಸಿದ ಕ್ಯಾರೆಟ್ ಮತ್ತು ಬೇಯಿಸಿದ ಬಟಾಣಿ ಸೇರಿಸಿ, ಚೆನ್ನಾಗಿ ಬೆರೆಸಿ. ಈಗ ಸೂಜಿ ರವೆ ಸೇರಿಸಿ, ಮಿಶ್ರಣ ಮಾಡಿ. ಇನ್ನೊಂದು 3-4 ನಿಮಿಷಗಳ ಕಾಲ ಬೇಯಲು ಬಿಡಿ. ರವೆ ಚಿನ್ನದ ಬಣ್ಣಕ್ಕೆ ತಿರುಗಿದ ನಂತರ, ನೀರು ಸೇರಿಸಿ. ಉಂಡೆ ಉಂಡೆಯಾಗದಂತೆ ಕೈಯ್ಯಾಡಿಸಿ. ರುಚಿಗೆ ತಕ್ಕಂತೆ ಉಪ್ಪು ಸೇರಿಸಿ ಚೆನ್ನಾಗಿ ಮಿಶ್ರಣ ಮಾಡಿ. ಮಿಶ್ರಣ ಸ್ವಲ್ಪ ದಪ್ಪವಾಗುವವರೆಗೆ 4-5 ನಿಮಿಷ ಹೆಚ್ಚು ಮಧ್ಯಮ ಉರಿಯಲ್ಲಿ ಬೇಯಿಸಿ ಆಫ್ ಮಾಡಿ.
To Read in English Click: Eat these comfort foods during fever to feel better