ಮಕ್ಕಳಲ್ಲಿಉಂಟಾಗುವ ಅತಿಸಾರವನ್ನು ನಿರ್ಲಕ್ಷಿಸಬೇಡಿ

*ಡಾ.ಕರವೀರಪ್ರಭು ಕ್ಯಾಲಕೊಂಡ

ಪ್ರತಿ ವರ್ಷ ಇಡೀ ವಿಶ್ವದಲ್ಲಿ20 ಲಕ್ಷಕ್ಕೂ ಹೆಚ್ಚು ಐದು ವರ್ಷದೊಳಗಿನ ಮಕ್ಕಳು ಆಸ್ಪತ್ರೆಗೆ ದಾಖಲಾಗುತ್ತಿದ್ದು 6 ಲಕ್ಷ ಮಕ್ಕಳು ಸಾವನ್ನಪ್ಪುತ್ತಿದ್ದಾರೆ. ರೋಟಾ ವೈರಸ್‌ ಅತಿಸಾರದಿಂದ 300 ಮಕ್ಕಳಲ್ಲಿಒಂದು ಮಗು ಐದು ವರ್ಷ ತುಂಬುವ ಒಳಗೆ ಮರಣ ಹೊಂದುತ್ತದೆ.

ರೋಗದ ಲಕ್ಷಣಗಳು
ರೋಟಾ ವೈರಸ್‌ ಸೋಂಕಿನ ಆರಂಭ ಕಡಿಮೆ ಪ್ರಮಾಣದ ಭೇದಿಯಿಂದ ಆಗುತ್ತದೆ. ಮುಂದೆ ಅದು ಗಂಭೀರ ಸ್ವರೂಪಕ್ಕೆ ತಿರುಗಬಹುದು. ಸೂಕ್ತ ಸಮಯದಲ್ಲಿಚಿಕಿತ್ಸೆ ದೊರೆಯದಿದ್ದರೆ, ಶರೀರದಲ್ಲಿನೀರು ಮತ್ತು ಲವಣಾಂಶಗಳ ಕೊರತೆ ಉಂಟಾಗಬಹುದು. ವೈರಸ್‌ ದೇಹ ಸೇರಿದ 1-3 ದಿನಗಳಲ್ಲಿರೋಗ ಲಕ್ಷಣಗಳು ಕಾಣಿಸಿಕೊಳ್ಳುತ್ತವೆ. ಈ ಸೋಂಕಿನಿಂದ ತೀವ್ರ ಸ್ವರೂಪದ ಭೇದಿಯ ಜತೆಗೆ ಜ್ವರ ಮತ್ತು ವಾಂತಿಯೂ ಆಗುತ್ತದೆ. ಒಮ್ಮೊಮ್ಮೆ ಹೊಟ್ಟೆ ನೋವಾಗುವುದು. ಉಚ್ಚಾಟದಿಂದ ನಿರ್ಜಲೀಕರಣ ಉಂಟಾಗಿ ನಾಲಿಗೆ ಮತ್ತು ತುಟಿಗಳು ಒಣಗುತ್ತವೆ.

ಉಪಚಾರ
ರೋಟಾ ವೈರಸ್‌ ಭೇದಿಗೆ ನಿಶ್ಚಿತ ಚಿಕಿತ್ಸೆ ಇಲ್ಲ. ಇತರ ಭೇದಿ ರೋಗಗಳಂತೆ ಚಿಕಿತ್ಸೆ ಮಾಡಬೇಕಾಗುತ್ತದೆ. ಅದು ವಾಸ್ತವಿಕವಾಗಿ ಸಜಲೀಕರಣ ಚಿಕಿತ್ಸೆ. ದೇಹದಿಂದ ನಷ್ಟಗೊಂಡ ನೀರು ಮತ್ತು ಲವಣಾಂಶಗಳನ್ನು ಭರ್ತಿ ಮಾಡುವುದು ಬಹಳ ಮುಖ್ಯ. ಚಿಕಿತ್ಸೆ ಸಮಯದಲ್ಲಿ ಓಆರ್‌ಎಸ್‌ ಮತ್ತು 14 ದಿನಗಳವರೆಗೆ ಜಿಂಕ್‌ ಮಾತ್ರೆಗಳನ್ನು ಅಥವಾ ಸಿರಪ್‌ ಕೊಡಬೇಕು. ಭೇದಿ ತೀವ್ರ ಸ್ವರೂಪದಲ್ಲಿದ್ದರೆ ಅಂತಹ ಮಗುವನ್ನು ಆಸ್ಪತ್ರೆಗೆ ದಾಖಲಿಸಿ, ನೀರು ಮತ್ತು ಲವಣಾಂಶಗಳನ್ನು ರಕ್ತನಾಳಗಳ ಮೂಲಕ ನೀಡಬೇಕು. ರೋಟಾ ವೈರಸ್‌ ಲಸಿಕೆಯನ್ನು ಮಗು ಜನಿಸಿದ 6, 10 ಮತ್ತು 14ನೇ ವಾರದಲ್ಲಿಎರಡು ಹನಿಗಳನ್ನು ಮೂರು ಸಲ ಸಾರ್ವತ್ರಿಕ ಲಸಿಕಾ ಕಾರ್ಯಕ್ರಮದಡಿ ನೀಡಲಾಗುತ್ತದೆ.

ಯಾವಾಗ ಕೊಡಿಸಬೇಕು?
ಮಗುವಿಗೆ ನೆಗಡಿ, ಕೆಮ್ಮು, ಸ್ವಲ್ಪು ಮಟ್ಟದ ಜ್ವರ ಇತ್ಯಾದಿಗಳಾದಾಗ ರೋಟಾ ವೈರಸ್‌ ಲಸಿಕೆ ಕೊಡಬಹುದು. ಮಗುವಿಗೆ ಇತರ ಲಸಿಕೆಗಳ ಜತೆಗೆ ರೋಟಾ ವೈರಸ್‌ ಲಸಿಕೆಯನ್ನು ಕೊಡಿಸಬಹುದು. ಲಸಿಕೆ ಹಾಕುವುದನ್ನು ಮುಂದೂಡಲು ಯಾವುದೇ ಕಾರಣ ಬೇಕಾಗಿಲ್ಲ. ಮಗುವಿಗೆ ಗಂಭೀರ ರೋಗವಿದ್ದರೆ ಅಂಥ ಪರಸ್ಥಿತಿಗಳಲ್ಲಿಲಸಿಕೆ ನೀಡುವುದನ್ನು ಮುಂದೂಡಬಹುದು. ಮಗುವಿನ ಆರೋಗ್ಯ ಸಂಪೂರ್ಣ ಸುಧಾರಿಸುವವರೆಗೂ ರೋಟಾ ವೈರಸ್‌ ಲಸಿಕೆ ಕೊಡಬೇಡಿ. ಮಗುವಿಗೆ ಈ ಮೊದಲು ಲಸಿಕೆಯಿಂದ ಯಾವುದಾದರೂ ಗಂಭೀರ ಅಲರ್ಜಿ ಕ್‌ ರಿಯಾಕ್ಷನ್‌ ಆಗಿದ್ದರೆ, ಮಗುವಿಗೆ ಮೊದಲಿನಿಂದಲೇ ಗಂಭೀರ ಕರುಳು ರೋಗವಿದ್ದರೆ ಅಥವಾ ಹೊಟ್ಟೆಯ ಶಸ್ತ್ರಚಿಕಿತ್ಸೆಯಾಗಿದ್ದರೆ, ರೋಗ ನಿರೋಧಕ ಶಕ್ತಿಯ ಕೊರತೆಯ ಸ್ಥಿತಿಗಳಿದ್ದರೆ ತಜ್ಞರ ಸಲಹೆ ಅಗತ್ಯ.

ಅಡ್ಡ ಪರಿಣಾಮಗಳು
ರೋಟಾ ವೈರಸ್‌ ಲಸಿಕೆ ನೀಡಿದ ಬಳಿಕ ಕೆಲವು ಮಕ್ಕಳಲ್ಲಿತಾತ್ಕಾಲಿಕವಾಗಿ ವಾಂತಿ, ಭೇದಿ, ಕೆಮ್ಮು, ನೆಗಡಿ, ಕಿರಿಕಿರಿ ಮತ್ತು ದದ್ದು ಇತ್ಯಾದಿ ಆಗಬಹುದು. ರೋಟಾ ವೈರಸ್‌ ಲಸಿಕೆ ನೀಡಿದ ನಂತರ ಆಗಬಹುದಾದ ಅತ್ಯಂತ ಅಪರೂಪದ ಅಡ್ಡ ಪರಿಣಾಮ ಕರುಳಿನೊಳಗೆ ಕರುಳು ತೂರಿಕೊಳ್ಳುವಂತಹ ಸಮಸ್ಯೆ ಉಂಟಾಗಬಹುದು.