ಮಾವಿನ ಹಣ್ಣು ತಿಂದರೆ ತೂಕ ಹೆಚ್ಚುವುದೇ?

ಹಣ್ಣುಗಳ ರಾಜ ಎಂದೆನಿಸಿರುವ ಮಾವಿನ ಹಣ್ಣು ತನ್ನ ಬಣ್ಣ ಹಾಗೂ ಸುವಾಸನೆಯಿಂದಲೇ ತನ್ನತ್ತ ಆಕರ್ಷಿಸುತ್ತದೆ. ವಿವಿಧ ಬಗೆಯ ಮಾವಿನ ಹಣ್ಣುಗಳ ರುಚಿಯನ್ನು ಈಗ ನೋಡದಿದ್ದರೆ ಮತ್ತೆ ಒಂದು ವರ್ಷ ಕಾಯ ಬೇಕಾಗುತ್ತದೆ.

ಕೆಲವರಿಗೆ ಮಾವಿನ ಹಣ್ಣು ತಿನ್ನಬೇಕೆಂದೆನಿಸುವುದು, ಆದರೆ ಎಲ್ಲಿ ದಪ್ಪಗಾಗುತ್ತೇವೋ ಎಂಬ ಭಯದಲ್ಲಿ ಮಾವಿನ ಹಣ್ಣು ದೂರವಿಡುತ್ತಾರೆ. ಮಾವಿನ ಹಣ್ಣು ತಿಂದರೆ ದಪ್ಪಗಾಗುತ್ತೇವೆ ಎನ್ನುವುದು ಎಷ್ಟು ನಿಜ ಎಂದು ನೋಡೋಣ ಬನ್ನಿ:

ಅತ್ಯುತ್ತಮ ಡಯಟ್‌ ಅಂದರೆ ಅದರಲ್ಲಿ ಸೀಸನ್‌ ಫುಡ್ ಇರಲೇಬೇಕು. ಇದು ಮಾವಿನ ಹಣ್ಣಿನ ಸೀಸನ್. ಮಾವಿನ ಹಣ್ಣು ರುಚಿಯ ಜತೆಗೆ ಹಲವಾರು ಪೋಷಕಾಂಶಗಳನ್ನು ಹೊಂದಿದೆ. ಈ ಹಣ್ಣನ್ನು ತಿನ್ನುವುದರಿಂದ ಆರೋಗ್ಯ ವೃದ್ಧಿಸುವುದೇ ಹೊರತು ಯಾವುದೇ ತೊಂದರೆ ಉಂಟಾಗುವುದಿಲ್ಲ.

ಮಾವಿನ ಹಣ್ಣಿನಲ್ಲಿ ಸ್ವಲ್ಪ ಕ್ಯಾಲೋರಿ ಅಂಶವಿದೆ, ಆದರೆ ಇದನ್ನು ಡಯಟ್‌ನಲ್ಲಿ ಸೇರಿಸಿದರೆ ದೇಹದ ತೂಕ ಹೆಚ್ಚುವುದಿಲ್ಲ, ಕಾರಣ ಇದರಲ್ಲಿ ನಾರಿನಂಶ ಕೂಡ ಇದೆ.

ಮಾವಿನ ಹಣ್ಣಿನಿಂದ ಜ್ಯೂಸ್, ರಸಾಯನ ಮತ್ತಿತರ ಸಿಹಿ ಪದಾರ್ಥಗಳನ್ನು ಮಾಡಿ ತಿಂದರೆ ತೂಕ ಹೆಚ್ಚಾಗುವ ಸಾಧ್ಯತೆ ಇದೆ, ಆದರೆ ಹಾಗೇ ತಿಂದರೆ ಮೈ ತೂಕವೇನು ಹೆಚ್ಚುವುದಿಲ್ಲ ಬದಲಿಗೆ ಆರೋಗ್ಯ ವೃದ್ಧಿಯಾಗುವುದು.