ವೇಗವಾಗಿ ತಿನ್ನುತ್ತೀರಾ? ಮೈ ತೂಕ ಹೆಚ್ಚುವುದು

ಟೈಮ್‌ ಇಲ್ಲ ಅಂತ ಬಾಯಿಗೆ ಆಹಾರವನ್ನು ತುರುಕುವ ಅಭ್ಯಾಸವೇ? ಹಾಗಾದರೆ ನಿಮ್ಮ ಆರೋಗ್ಯ ಕೆಡುವುದು ಪಕ್ಕ. ನಾವು ತಿನ್ನುವುದಕ್ಕೆ ಎಷ್ಟು ಸಮಯ ತೆಗೆದುಕೊಳ್ಳುತ್ತೇವೆ ಎನ್ನುವುದರ ಮೇಲೆ ನಮ್ಮ ಆರೋಗ್ಯದ ಗುಟ್ಟು ಅಡಗಿದೆ ಎಂದು ಸಂಶೋಧನೆ ಹೇಳಿದೆ.

ಜಪಾನಿನ ಸಂಶೋಧಕರು ಕಳೆದ 5 ವರ್ಷಗಳಿಂದ ಅಧ್ಯಯನ ಮಾಡಿ, ಆಹಾರ ತಿನ್ನಲು ತೆಗೆದುಕೊಳ್ಳುವ ಸಮಯ ನಮ್ಮ ಆರೋಗ್ಯದ ಮೇಲೆ ಹೇಗೆ ಪ್ರಭಾವ ಬೀರುತ್ತದೆ ಎಂದು ವಿವರಿಸಿದ್ದಾರೆ. ಈ ಸಂಶೋಧನೆಯಲ್ಲಿ 1,083 ಅಭ್ಯರ್ಥಿಗಳು ಭಾಗವಹಿಸಿದ್ದರು.

ಯಾರು ಆಹಾರವನ್ನು ವೇಗವಾಗಿ ತಿನ್ನುತ್ತಾರೋ ಅವರಲ್ಲಿ ಮೆಟಾಬೋಲಿಕ್‌ ಸಿಂಡ್ರೋಮ್‌ ಕಾಣಿಸುತ್ತದೆ ಎಂದು ಅಧ್ಯಯನ ಹೇಳಿದೆ.

ತಿನ್ನಲು ತೆಗೆದುಕೊಳ್ಳುವ ಸಮಯಕ್ಕೂ, ಮೈ ತೂಕಕ್ಕೂ ಸಂಬಂಧವಿದೆ
ವೇಗವಾಗಿ ತಿನ್ನುವಾಗ ಎಷ್ಟು ಆಹಾರ ಹೊಟ್ಟೆ ಸೇರಿತು ಎಂಬ ಗಮನವಿರುವುದಿಲ್ಲ. ಅಲ್ಲದೆ ಸರಿಯಾಗಿ ಜಗಿಯದೆ ಹಾಗೇ ನುಂಗುತ್ತೇವೆ. ಇದರಿಂದ ಜೀರ್ಣಕ್ರಿಯೆಗೆ ತೊಂದರೆ ಉಂಟಾಗುವುದು. ವೇಗವಾಗಿ ತಿನ್ನುವುದರಿಂದ ದೇಹದಲ್ಲಿ ಇನ್ಸುಲಿನ್‌ ಅಸಮತೋಲನ ಉಂಟಾಗುವುದು.

ಇನ್ನು ವೇಗವಾಗಿ ತಿನ್ನುವವರ ಮೈ ತೂಕ ಹೆಚ್ಚುವುದು ಎಂದು ಅಧ್ಯಯನ ಹೇಳಿದೆ. ಆಹಾರವನ್ನು ನಿಧಾನಕ್ಕೆ ಜಗಿದು ತಿಂದರೆ ಜೀರ್ಣಕ್ರಿಯೆಗೆ ಒಳ್ಳೆಯದು. ಇನ್ನು ವೇಗವಾಗಿ ತಿಂದರೆ ಆಹಾರದ ರುಚಿ ಕೂಡ ಅನುಭವಿಸಲು ಸಾಧ್ಯವಿಲ್ಲ. ನಿಧಾನಕ್ಕೆ ಆಹಾರ ಸೇವನೆ ಮಾಡುವುದರಿಂದ ಮನಸ್ಸಿಗೆ ತೃಪ್ತಿ ಅನಿಸುವುದು.