ಆರೋಗ್ಯಕರ ನಿದ್ರೆಯ ಸೂತ್ರ

ನಿದ್ರೆ ಸಮಸ್ಯೆ ವ್ಯಾಪಕವಾಗಿದ್ದು, ಗಂಭೀರ ಕಾಯಿಲೆಗಳಿಗೂ ಕಾರಣವಾಗುತ್ತಿವೆ. ಆದ್ದರಿಂದ ಉತ್ತಮ ನಿದ್ರೆಯ ಮಾರ್ಗಗಳನ್ನು ಕಂಡುಕೊಳ್ಳುವ ಅಗತ್ಯವಿದೆ. ಮಲಗಿದ ತಕ್ಷಣ ನಿದ್ರೆ ಬರುವುದಿಲ್ಲ ಎಂದ ಮಾತ್ರಕ್ಕೆ ನೀವು ನಿದ್ರೆ ಬರುವ ಔಷಧದ ಮೊರೆ ಹೋಗಬೇಕಿಲ್ಲ. ಜೀವನಶೈಲಿ ಬದಲಾವಣೆ ಮೂಲಕ ಸಾಮಾನ್ಯ ನಿದ್ರೆ ಸಮಸ್ಯೆಗಳಿಂದ ಹೊರ ಬರಬಹುದು.

ಬದಲಾದ ಜೀವನಶೈಲಿ, ಅಸಮತೋಲನ ಆಹಾರ ಪದ್ಧತಿ, ಕಾರ‍್ಯ ಸ್ಥಳದ ಒತ್ತಡ, ವೈಯಕ್ತಿಕ ಬದುಕಿನ ಏಳುಬೀಳುಗಳು ನಿದ್ರೆ ಸಮಸ್ಯೆ ಉಂಟು ಮಾಡಬಹುದು. ಹಲವಾರು ಮಂದಿ ನೆಮ್ಮದಿಯ ನಿದ್ರೆಗೆ ಸೂಕ್ತ ಸೂತ್ರವನ್ನು ಕಂಡು ಕೊಳ್ಳುವುದಿಲ್ಲ. ನಿದ್ರಾಹೀನತೆ ತಮ್ಮನ್ನು ಕಾಡುತ್ತಿರುವ ಸಮಸ್ಯೆ ಎಂಬುದನ್ನು ತಿಳಿದಿರುವುದಿಲ್ಲ. ಆದ್ರೆ ನಿದ್ರೆಯ ವ್ಯತ್ಯಯ ಮಾನಸಿಕ ಹಾಗೂ ದೈಹಿಕ ಆರೋಗ್ಯದ ಮೇಲೆ ಕೂಡ ಪರಿಣಾಮ ಬೀರುತ್ತದೆ. ನಿದ್ರಾಹೀನತೆಯಿಂದ ಮಾನಸಿಕ ಖಿನ್ನತೆ, ರಕ್ತದ ಒತ್ತಡ, ಬೊಜ್ಜು ಮತ್ತಿತರ ಸಮಸ್ಯೆ ಕಾಣಿಸಿಕೊಳ್ಳಬಹುದು. ಆದ್ದರಿಂದ ನಿದ್ರಾಹೀನತೆ ಉಂಟಾಗದಂತೆ ನಿಮ್ಮ ಜೀವನಶೈಲಿಯನ್ನು ಬದಲಿಸಿಕೊಳ್ಳಿ.

ಹೀಗೆ ಮಾಡಿ

ಸಾಧ್ಯವಾದಷ್ಟು ಕೆಫೀನ್‌ ಅಂಶವಿರುವ ಪದಾರ್ಥ ಸೇವಿಸಬೇಡಿ.

ಮಲಗುವ ಆರು ತಾಸಿನ ಮೊದಲು ಧೂಮಪಾನ ಹಾಗೂ ಮದ್ಯಪಾನ ಮಾಡಬೇಡಿ.

ಮಲಗುವ ಮುಂಚೆ ಹೊಟ್ಟೆತುಂಬ ತಿನ್ನಬೇಡಿ.

ನಿದ್ರೆ ಬಾರದಿದ್ದರೆ ಕೆಟ್ಟ ಯೋಚನೆ ಮಾಡುವ ಬದಲು ಒಳ್ಳೆಯ ಸಂಗೀತ ಕೇಳಿ, ಪುಸ್ತಕ ಓದಿ.

ನಿದ್ರೆ ಸಮಯದಲ್ಲಿ ಕೊಠಡಿ ಕತ್ತಲಾಗಿರುವಂತೆ ನೋಡಿಕೊಳ್ಳಿ.

ಸಾಧ್ಯವಾದರೆ ಹಗಲು ನಿದ್ರೆ ಮಾಡುವುದನ್ನು ತಪ್ಪಿಸಿ.

ಸಡಿಲ ಉಡುಪು ಧರಿಸಿ. ಹಿತವಾದ ಭಂಗಿಯಲ್ಲಿ ಮಲಗಿ.

ಉತ್ತಮ ಗುಣಮಟ್ಟದ ನಿದ್ರೆಯನ್ನು ಉತ್ತೇಜಿಸಲು ವ್ಯಾಯಾಮ ಅತ್ಯಗತ್ಯ.

ಇತ್ತೀಚೆಗೆ ನಿದ್ರೆಯನ್ನು ಉತ್ತೇಜಿಸುವ ವಿಭಿನ್ನ ನೈಸರ್ಗಿಕ ಸದ್ದುಗಳನ್ನೊಳಗೊಂಡ ಆ್ಯಪ್‌ಗಳು ಕೂಡ ಇವೆ. ಅವುಗಳ ಪ್ರಯೋಜನ ಪಡೆಯಿರಿ.