ಪ್ರೊಟೀನ್‌ ಹೆಚ್ಚು ತಿಂದರೂ ಆರೋಗ್ಯಕ್ಕೆ ಹಾನಿಕಾರಕ

ಆರೋಗ್ಯಕರ ದೇಹಕ್ಕೆ ಸಮತೋಲನ ಆಹಾರ ಸೇವನೆ ಬಹುಮುಖ್ಯ. ನಾವು ತಿನ್ನುವ ಆಹಾರದಲ್ಲಿ ಪ್ರೊಟೀನ್‌ ಕಡೆ ಹೆಚ್ಚಿನ ಗಮನ ಕೊಡಬೇಕು, ದೇಹದಲ್ಲಿ ಹಾನಿಯಾದ ಜೀವಕೋಶಗಳನ್ನು ಸರಿಪಡಿಸುವಲ್ಲಿ ಪ್ರೊಟೀನ್ ಪಾತ್ರ ಬಹುಮುಖ್ಯವಾದದ್ದು.

ಹಾಗಂತ ನಮ್ಮ ತಟ್ಟೆಯಲ್ಲಿ ಪ್ರೊಟೀನ್‌ ಅಂಶ ಅಧಿಕವಾದರೂ ಕಷ್ಟ. ಧಾನ್ಯಗಳು, ನಟ್ಸ್, ಬೀನ್ಸ್, ಮೀನು, ಮೊಟ್ಟೆ ಹಾಗೂ ಇತರ ಹಾಲಿನ ಉತ್ಪನ್ನಗಳಲ್ಲಿ ಪ್ರೊಟೀನ್‌ ಅಂಶವಿದೆ. ಇವುಗಳನ್ನು ಮಿತಿ ಮೀರಿ ತಿನ್ನುವುದರಿಂದ ಅಡ್ಡ ಪರಿಣಾಮ ಕೂಡ ಉಂಟಾಗುವುದು.

ದಿನಕ್ಕೆ ಪ್ರೊಟೀನ್‌ ಎಷ್ಟು ತೆಗದುಕೊಳ್ಳಬೇಕು?
ಆಹಾರದಲ್ಲಿ ಯಾವುದು ಹೆಚ್ಚಾಗಬಾರದು, ಎಲ್ಲವೂ ಸಮತೋಲನದಲ್ಲಿರಬೇಕು ಎಂಬ ಮಾತಿದೆ. ಡಿಆರ್‌ಎ(The Dietary Reference Intake) ಪ್ರಕಾರ ಮೈ ತೂಕಕ್ಕೆ ಅನುಗುಣವಾಗಿ ಪ್ರೊಟೀನ್‌ ತೆಗೆದುಕೊಳ್ಳಬೇಕು. ಒಂದು ಕೆಜಿ ತೂಕಕ್ಕೆ 0.8ಗ್ರಾಂ ಪ್ರೊಟೀನ್‌ ಅವಶ್ಯಕ.

ವೈದ್ಯರನ್ನು ಭೇಟಿಯಾಗಿ ನಿಮ್ಮ ದೇಹಕ್ಕೆ ಎಷ್ಟು ಪ್ರೊಟೀನ್ ಅವಶ್ಯಕ ಎಂದು ತಿಳಿದುಕೊಳ್ಳಿ.
ಪ್ರೊಟೀನ್‌ ಅಧಿಕ ತಿಂದರೆ ಉಂಟಾಗುವ ಅಡ್ಡ ಪರಿಣಾಮಗಳು

ಮೈ ತೂಕ ಹೆಚ್ಚುವುದು
ಅತ್ಯಧಿಕ ಪ್ರೊಟೀನ್‌ ತೆಗೆದುಕೊಂಡರೆ ಪ್ರೊಟೀನ್ ಅಂಶ ದೇಹದಲ್ಲಿ ಕೊಬ್ಬು ಆಗಿ ಪರಿವರ್ತನೆಯಾಗಿ ದೇಹದಲ್ಲಿ ಶೇಖರವಾಗುತ್ತದೆ. ಇದರಿಂದ ಮೈ ತೂಕ ಹೆಚ್ಚುವುದು.

ಅಂಗಾಂಗಳಿಗೆ ಹಾನಿಯಾಗುತ್ತದೆ
ನಮ್ಮ ದೇಹದಲ್ಲಿ ಪ್ರೊಟೀನ್ ಕಡಿಮೆಯಾದರೂ ಕಷ್ಟ, ಅಧಿಕವಾದರೂ ಕಷ್ಟ. ಪ್ರೊಟೀನ್‌ ಅಧಿಕವಾದರೆ ಕಿಡ್ನಿ ಸಮಸ್ಯೆ ಉಂಟಾಗುವುದು. ಪ್ರೊಟೀನ್‌ ಅಧಿಕ ತಿನ್ನುವುದರಿಂದ ಸೊಂಟದ ಸುತ್ತಳತೆ ಹೆಚ್ಚಾಗುವುದು.

ಅಲ್ಲದೆ ಪ್ರೊಟೀನ್‌ ಅಧಿಕವಾಗಿ ದೇಹವನ್ನು ಸೇರಿದರೆ ಅಮೋನಿಯಾ ಹಾಗೂ ಇತರ ಕಶ್ಮಲಗಳು ರಕ್ತವನ್ನು ಸೇರುವುದು. ಅಲ್ಲದೆ ಲಿವರ್‌ ಸಮಸ್ಯೆ ಕೂಡ ಬರುಬಹುದು.

ಜೀರ್ಣಕ್ರಿಯೆಗೆ ತೊಂದರೆಯಾಗುವುದು
ಪ್ರೊಟೀನ್ ಅಧಿಕವಾದರೆ ದೇಹಕ್ಕೆ ಜೀರ್ಣ ಮಾಡಿಕೊಳ್ಳಲು ಕಷ್ಟ. ಇದರಿಂದ ಮಲಬದ್ಧತೆ, ತಲೆಸುತ್ತು, ವಾಂತಿ, ಭೇದಿ, ಹೊಟ್ಟೆ ಉಬ್ಬುವಿಕೆ ಮುಂತಾದ ತೊಂದರೆ ಕಾಣಿಸಿಕೊಳ್ಳುವುದು.

ಕೊಲೆಸ್ಟ್ರಾಲ್‌ ಹೆಚ್ಚುವುದು
ಅತ್ಯಧಿಕ ಪ್ರೊಟೀನ್‌ ಡಯಟ್‌ ತೆಗೆದುಕೊಳ್ಳುವುದರಿಂದ ದೇಹದಲ್ಲಿ ಕೊಲೆಸ್ಟ್ರಾಲ್‌ ಪ್ರಮಾಣ ಹೆಚ್ಚಾಗುವುದು. ದೇಹದಲ್ಲಿ ಕೊಬ್ಬಿನಂಶ ಹೆಚ್ಚಾಗಿ ಕೆಟ್ಟ ಕೊಲೆಸ್ಟ್ರಾಲ್‌ ಆದ LDL ಹೆಚ್ಚಾಗಿ ಒಳ್ಳೆಯ ಕೊಲೆಸ್ಟ್ರಾಲ್‌ HDL ಪ್ರಮಾಣ ಕಡಿಮೆಯಾಗುವುದು.

ದೇಹದಲ್ಲಿ ನೀರಿನಂಶ ಕಡಿಮೆಯಾಗುವುದು
ದೇಹದಲ್ಲಿ ನೀರಿನಂಶ ಕಡಿಮೆಯಾದರೆ ಕಿಡ್ನಿ ಮೇಲೆ ಹೆಚ್ಚಿನ ಒತ್ತಡ ಬೀಳುವುದು.ಅಲ್ಲದೆ ಪ್ರೊಟೀನ್‌ ಅಂಶ ಹೆಚ್ಚಾಗಿ ನೀರಿನಂಶ ಕಡಿಮೆ ಆಗಾಗ ಬಾಯಾರಿಕೆಯಾಗುವುದು

ಆದ್ದರಿಂದ ಎಷ್ಟೇ ಆರೋಗ್ಯಕರವಾದ ಆಹಾರವಾಗಲಿ ಮಿತಿಯಲ್ಲಿ ತಿಂದರೆ ಆರೋಗ್ಯಕ್ಕೆ ಒಳ್ಳೆಯದು.