ಹಿಪ್ನೊಥೆರಪಿಯಿಂದ ತೂಕ ಇಳಿಕೆ ಸಾಧ್ಯವೇ!

ತೂಕ ಇಳಿಸಲು ನೂರೆಂಟು ವಿಧಾನಗಳನ್ನು ಅನುಸರಿಸಿ ಆಯಿತು, ಇನ್ನೇನಿದೆ ಹೊಸದು ಅನ್ನುವವರಿಗಾಗಿ ಇದೀಗ ಹಿಪ್ನೊಥೆರಪಿ ಬಂದಿದೆ.

ಹಿಪ್ನೊಟಿಸಮ್‌ ಮಾಡುವ ಮೂಲಕ ವ್ಯಕ್ತಿಯ ಅಂತರಂಗದ ಗುಟ್ಟುಗಳನ್ನು ಹೊರ ತೆಗೆವ ವಿಧಾನವನ್ನು ನಾವು ಸಿನಿಮಾಗಳಲ್ಲಿ ನೋಡಿದ್ದೇವೆ. ಅದೇ ವಿಧಾನವನ್ನು ತೂಕ ಇಳಿಸುವುದಕ್ಕೂ ಅನ್ವಯಿಸುತ್ತಾರೆ. ಇದರಲ್ಲಿ ಹಿಪ್ನೊಟಿಸಮ್‌ನ ಮೂಲಕ ವಿಶೇಷವೇನನ್ನೂ ಮಾಡುವುದಿಲ್ಲ; ನಿಮ್ಮ ದೇಹ ಹೇಗಿರಬೇಕು ಎಂಬುದನ್ನು ಸುಪ್ತಾವಸ್ಥೆಯಲ್ಲಿದ್ದಾಗ ಮನಸ್ಸಿಗೆ ತಿಳಿಸಿಕೊಡುತ್ತಾರಷ್ಟೇ. ಇದರಿಂದ ಹೊರಬಂದ ಬಳಿಕ ಮನಸ್ಸು ಇದನ್ನು ಪಾಲಿಸುತ್ತದೆ ಎಂಬುದು ಇದರ ಸಾರ.

ಆದರೆ, ಈ ವಿಧಾನ ಎಷ್ಟು ಪರಿಣಾಮಕಾರಿ ಎಂಬುದರ ಬಗ್ಗೆ ಹೆಚ್ಚಿನ ಅಧ್ಯಯನಗಳು ನಡೆದಿಲ್ಲ. 'ಇಂಟರ್‌ನ್ಯಾಷನಲ್‌ ಜರ್ನಲ್‌ ಆಫ್‌ ಕ್ಲಿನಿಕಲ್‌ ಅಂಡ್‌ ಎಕ್ಸ್‌ಪರಿಮೆಂಟಲ್‌ ಹಿಪ್ನೊಸಿಸ್‌'ನಲ್ಲಿ ಪ್ರಕಟವಾದ ವರದಿಯ ಪ್ರಕಾರ ಹಲವು ಮಹಿಳೆಯರು ತಾವು ಇದಕ್ಕೆ ಒಳಗಾದ ಬಳಿಕ ಅದು ತಮ್ಮ ಡಯೆಟ್‌ ಮತ್ತು ತೂಕ ಇಳಿಸುವಿಕೆಯಲ್ಲಿ ಪರಿಣಾಮ ಬೀರಿದೆ ಎಂದಿದ್ದಾರೆ. ಬ್ರಿಟಿಷ್‌ ಸಂಶೋಧನೆಯೊಂದರ ಪ್ರಕಾರ ಹಿಪ್ನೊಥೆರಪಿ ಹಾಗೂ ಹೊಟ್ಟೆ ತುಂಬಿ ಭಾವನೆಯನ್ನು ಉಂಟುಮಾಡುವ ಪೆಪ್ಟೈಡ್‌ಗಳ ಉತ್ಪಾದನೆಗೂ ನೇರ ಸಂಬಂಧವಿದೆಯಂತೆ.

ಹಿಪ್ನೊಥೆರಪಿಯ ಮುನ್ನ ಹಿಪ್ನೊಥೆರಪಿಸ್ಟ್‌ಗಳು ನಿಮ್ಮ ದೇಹದ ಪ್ರಕೃತಿ, ವೇಯ್ಟ್‌ ಲಾಸ್‌ ಗೋಲ್‌, ಆಹಾರ ಸೇವನೆಯ ನಿಮ್ಮ ವೀಕ್ನೆಸ್‌ ಇತ್ಯಾದಿಗಳನ್ನು ತಿಳಿದುಕೊಳ್ಳುತ್ತಾರೆ. ಹಿಪ್ನೊಟಿಸಮ್‌ ವೇಳೆಯಲ್ಲಿ ನಿಮ್ಮ ಮನಸ್ಸಿನಲ್ಲಿ ಆರೋಗ್ಯಕರ ಆಹಾರ ಸೇವನೆ, ವೇಯ್ಟ್‌ ಲಾಸ್‌ಗೆ ಪೂರಕವಾದ ಧ್ವನಿಯೊಂದು ನೆಲೆಗೊಳ್ಳುವಂತೆ ಮಾಡುತ್ತಾರೆ. ಇದು ನಾಲಿಗೆಯ ದೌರ್ಬಲ್ಯಕ್ಕೆ ಒಳಗಾಗಿ ಅನಾರೋಗ್ಯಕರ ಆಹಾರ ಸೇವಿಸದಂತೆ ತಡೆಯುತ್ತದೆ, ತೂಕವಿಳಿಸುವ ದಾರಿಯಲ್ಲಿ ಉತ್ತಮ ನಿರ್ಧಾರಗಳನ್ನು ಕೈಗೊಳ್ಳಲು ಪ್ರಚೋದಿಸುತ್ತದೆ. ಹಾಗೆಂದು ವಿವಿಧ ತಿಂಡಿತಿನಿಸುಗಳ ಬಗ್ಗೆ ಸೆಳೆತ ಇರುವುದಿಲ್ಲವೆಂದಲ್ಲ, ಆದರೆ ಆ ಸೆಳೆತಕ್ಕೆ ತಕ್ಕಂತೆ ದೇಹ ನಡೆದುಕೊಳ್ಳುವುದಿಲ್ಲ. ಆದರೆ, ಈ ವಿಧಾನ ಎಷ್ಟು ಪರಿಣಾಮಕಾರಿ ಎಂಬ ಬಗ್ಗೆ ಹೆಚ್ಚಿನ ಅಧ್ಯಯನಗಳು ನಡೆದಿಲ್ಲ.