ಕ್ಯಾನ್ಸರ್‌ಗೆ ಪರಿಣಾಮಕಾರಿ ಔಷಧ ಕಂಡುಹಿಡಿದ ಇಸ್ರೇಲ್ ವಿಜ್ಞಾನಿಗಳು

ಜೆರುಸಲೇಂ: ಮನುಕುಲಕ್ಕೆ ಮಾರಕವಾಗಿ ಪರಿಣಮಿಸಿರುವ ಕ್ಯಾನ್ಸರ್‌ಗೆ ಇಸ್ರೇಲ್ ವಿಜ್ಞಾನಿಗಳು ಪರಿಣಾಮಕಾರಿ ಔಷಧ ಕಂಡುಹುಡುಕಿದ್ದಾರೆ.

ಕ್ಯಾನ್ಸರ್‌ಗೆ ಚಿಕಿತ್ಸೆ ನೀಡುವುದು ಇನ್ನೂ ಸವಾಲಾಗಿದ್ದು, ಜನರು ವಿವಿಧ ಚಿಕಿತ್ಸಾ ಕ್ರಮಗಳ ಮೊರೆ ಹೋಗುತ್ತಿದ್ದಾರೆ. ಆದರೆ ಇಸ್ರೇಲ್ ವಿಜ್ಞಾನಿಗಳ ತಂಡ ಕಂಡುಹಿಡಿದ ಔಷಧ, ಮುಂದಿನ ವರ್ಷದ ಆರಂಭದಿಂದ ರೋಗಿಗಳಿಗೆ ಲಭ್ಯವಾಗಲಿದೆ.

ಮುಟಾಟೊ ಹೆಸರಿನ ಕ್ರಾಂತಿಕಾರಿ ಕ್ಯಾನ್ಸರ್‌ ಚಿಕಿತ್ಸಾ ಔಷಧವನ್ನು ಅಕ್ಸಿಲರೇಟೆಡ್ ಇವೊಲ್ಯೂಶನ್ ಬಯೋಟೆಕ್ನಾಲಜೀಸ್ ಲಿ. ಅಭಿವೃದ್ಧಿಪಡಿಸಿದೆ. ಮುಟಾಟೊ ಎಂದರೆ, ಮಲ್ಟಿ ಟಾರ್ಗೆಟ್ ಟಾಕ್ಸಿನ್. ಅದು ಕ್ಯಾನ್ಸರ್‌ಗೆ ಕಾರಣವಾಗುವ ಅಂಶಗಳು ಮತ್ತು ಕ್ಯಾನ್ಸರ್‌ ಕೋಶಗಳನ್ನು ಮಾತ್ರ ಗುರಿಯಾಗಿಸಿ, ನೇರವಾಗಿ ಅದರ ಮೇಲೆಯೇ ದಾಳಿ ನಡೆಸುತ್ತದೆ.


ಉಳಿದಂತೆ ಆರೋಗ್ಯವಂತ ಕೋಶಗಳಿಗೆ ಯಾವುದೇ ಹಾನಿಯೆಸಗುವುದಿಲ್ಲ. ಈಗಾಗಲೇ ಕ್ಯಾನ್ಸರ್‌ಗೆ ಚಿಕಿತ್ಸೆ ಮತ್ತು ಔಷಧಿ ಕುರಿತು ಹಲವು ಕ್ರಮಗಳು ಬಂದಿದ್ದರೂ, ಅವು ಅಷ್ಟೊಂದು ಪರಿಣಾಮಕಾರಿಯಾಗಿಲ್ಲ.

ಆದರೆ ಎಇಬಿಐನ ಸಿಇಒ ಡಾ. ಮೊರಾದ್ ಪ್ರಕಾರ, ಕ್ಯಾನ್ಸರ್‌ಗೆ ಕಾರಣವಾಗುವ ಕೋಶಗಳ ಮೇಲೆ ಔಷಧ ಪ್ರಭಾವ ಬೀರುತ್ತದೆ. ಹೀಗಾಗಿ ಉಳಿದ ಕೋಶಗಳಿಗೆ ಹಾನಿಯಾಗುವುದಿಲ್ಲ. ಮುಂದಿನ ವರ್ಷ ರೋಗಿಗಳಿಗೆ ಇದು ಲಭ್ಯವಾಗಲಿದೆ.