ಕೊರೊನಾ ವೈರಸ್: ಮನೆಯಲ್ಲಿಯೇ ಮಾಸ್ಕ್ ತಯಾರಿಸುವುದು ಹೇಗೆ?

ಪ್ರಪಂಚದಾದ್ಯಂತ ಕೊರೊನಾ ವೈರಸ್ ಹರಡಿರುವುದರಿಂದ ಮಾಸ್ಕ್ ಗಳು ಹಾಗೂ ಸ್ಯಾನಿಟೈಸರ್‌ಗಳ ಕೊರತೆ ಉಂಟಾಗುತ್ತಿದೆ. ಮುಖವಾಡಗಳ / ಮಾಸ್ಕ್ ಪೂರೈಕೆಯು ಸಾಕಷ್ಟು ಪ್ರಮಾಣದಲ್ಲಿ ಇಲ್ಲದೆ ಇರುವುದರಿಂದ ಮನೆಯಲ್ಲಿಯೇ ಮಾಸ್ಕ್ ತಯಾರಿಸಿಕೊಳ್ಳಲು ಸರ್ಕಾರ ಆದೇಶ ನೀಡುತ್ತಿದೆ. ಪ್ರಪಂಚದಾದ್ಯಂತ ಹೆಚ್ಚುತ್ತಿರುವ ಕೊರೋನಾ ವೈರಸ್‍ನಿಂದ ರಕ್ಷಣೆ ಪಡೆಯಲು ಪ್ರತಿಯೊಬ್ಬರು ಸಹ ಕಡ್ಡಾಯವಾಗಿ ಮಾಸ್ಕ್ ಧರಿಸಬೇಕಿದೆ. ಇಲ್ಲವಾದರೆ ರೋಗಿಯ ಸಂವಹನ, ಉಸಿರಾಟ, ಕೆಮ್ಮು, ಸ್ಪರ್ಶ, ಸೀನು ಹಾಗೂ ಒಡನಾಟದಿಂದ ಬಹುಬೇಗ ಹರಡುವುದು. ಮಾಸ್ಕ್ ಧರಿಸುವುದರ ಮೂಲಕ ರೋಗಾಣುಗಳು ನೇರವಾಗಿ ಉಸಿರು ಮತ್ತು ಬಾಯಿಯ ಒಳಗೆ ಪ್ರವೇಶಿಸುವುದನ್ನು ತಡೆಯಬಹದು.

ಪೂರೈಕೆಯಲ್ಲಿ ಅಭಾವ
ಉಸಿರಾಟಕ್ಕೆ ರಕ್ಷಣೆಯನ್ನು ನೀಡುವ ಮುಖವಾಡಗಳು ಗಾಳಿಯಲ್ಲಿ ಇರುವ ಸೋಂಕು ಮತ್ತು ವೈರಸ್‍ಗಳಿಂದ ರಕ್ಷಣೆ ನೀಡುತ್ತವೆ. ಸೋಂಕಿತ ವ್ಯಕ್ತಿಗಳು ಮತ್ತು ಸೋಂಕು ರಹಿತ ವ್ಯಕ್ತಿಗಳು ಸಾಮಾಜಿಕ ಸ್ಥಳಗಳಿಗೆ ಹೋಗುವಾಗ ಕಡ್ಡಾಯವಾಗಿ ಮುಖವಾಡವನ್ನು/ ಮಾಸ್ಕ್ ಅನ್ನು ಧರಿಸಬೇಕು. ಆಗ ಸುರಕ್ಷತೆಯು ಹೆಚ್ಚುವುದು. ಜೊತೆಗೆ ರೋಗವು ನಿಯಮಿತವಾಗಿ ಕಡಿಮೆಯಾಗುವುದು ಎಂದು ಹೇಳಲಾಗುತ್ತದೆ. ಸದ್ಯ ಭಾರತದಲ್ಲಿ ಜನಸಂಖ್ಯೆ ಅತಿಯಾಗಿ ಇರುವುದರಿಂದ ಎಲ್ಲರಿಗೂ ಮಾಸ್ಕ್ ಒದಗಿಸುವಷ್ಟು ಪೂರೈಕೆಯನ್ನು ಹೊಂದಿಲ್ಲ. ಹಾಗಾಗಿ ಪ್ರತಿಯೊಬ್ಬರು ಸಹ ಮನೆಯಲ್ಲಿಯೇ ಮುಖವಾಡವನ್ನು ತಯಾರಿಸುವುದು ಕಲಿತರೆ ಮಾಸ್ಕ್ ಸಮಸ್ಯೆ ಮುಕ್ತವಾಗುವುದು.

ಫೇಸ್ ಮಾಸ್ಕ್ ಹುಡುಕಾಟ
ನೀವು ಸಹ ನಿಮಗೆ ಹಾಗೂ ನಿಮ್ಮವರಿಗಾಗಿ ಮಾಸ್ಕ್/ ಮುಖವಾಡದ ಹುಡುಕಾಟದಲ್ಲಿ ಇದ್ದರೆ ಈ ಮುಂದೆ ವಿವರಿಸಲಾದ ಪರಿಯಲ್ಲಿ ಮುಖವಾಡವನ್ನು ಸಿದ್ಧಪಡಿಸಿ. ಆಗ ಅದನ್ನು ಕಡಿಮೆ ಬೆಲೆಯಲ್ಲಿ ಪಡೆದು, ಪುನಃ ಪುನಃ ತೊಳೆದುಕೊಂಡು ಬಳಸಬಹುದು. ಪ್ರತಿಯೊಬ್ಬರಿಗೂ ಸಹಾಯವಾಗುವಂತೆ ಹಾಗೂ ಸುಲಭವಾಗಿ ಮುಖವಾಡವನ್ನು ಸಿದ್ಧಪಡಿಸುವ ವಿಧಾನವನ್ನು ಕಲಿತರೆ ಅಗತ್ಯ ಇರುವಷ್ಟು ಮುಖವಾಡವನ್ನು ನೀವೇ ಮನೆಯಲ್ಲಿ ತಯಾರಿಸುವುದುರ ಮೂಲಕ ಮುನ್ನೆಚ್ಚರಿಕಾ ಕ್ರಮವನ್ನು ಕೈಗೊಳ್ಳಬಹುದು. ಹಾಗಾದರೆ ಮುಖವಾಡ ತಯಾರಿಸುವ ಹಂತ ಹಂತವಾದ ವಿಧಾನವನ್ನು ಪರಿಶೀಲಿಸೋಣ ಬನ್ನಿ...

ಬೇಕಾಗುವ ಸಾಮಾಗ್ರಿಗಳು
1. ಬಳಸಿರುವ ಅಥವಾ ಬಳಸದೇ ಇರುವ ಹತ್ತಿ ಬಟ್ಟೆ.
2. ನಾಲ್ಕು ತುಂಡು ಬಟ್ಟೆಯ ದಾರ ಅಥವಾ ರಬ್ಬರ ದಾರ.
3. ಕತ್ತರಿ
4. ಹೊಲಿಗೆ ಯಂತ್ರ ಅಥವಾ ಸೂಜಿ ದಾರ.

* ತಾಯರಿಸುವ ಮುನ್ನ
- ಮುಖವಾಡಕ್ಕಾಗಿ ಬಳಸುವ ಕಾಟನ್ ಬಟ್ಟೆಯನ್ನು ಕಡ್ಡಾಯವಾಗಿ 5 ನಿಮಿಷಗಳ ಕಾಲ ಒಂದು ಪಾತ್ರೆಗೆ ಹಾಕಿ, ಕುದಿಯಲು ಬಿಡಿ.
- ಬಟ್ಟೆ ರೋಗಾಣುಗಳಿಂದ ಶುದ್ಧವಾಗಲು ಕುದಿಸುವ ನೀರಿಗೆ ಸ್ವಲ್ಪ ಉಪ್ಪನ್ನು ಬೆರೆಸಿರಬೇಕು.
- ಉಪ್ಪು ಬೆರೆತ ನೀರಿನಲ್ಲಿ ಕುದಿಸಿದ ಬಳಿಕ, ಸ್ವಲ್ಪ ಸಮಯ ಆರಲು ಬಿಡಿ.
- ವಯಸ್ಕರಿಗೆ ಮುಖವಾಡ ತಯಾರಿಸಲು 9 ಇಂಚು ಉದ್ದ ಹಾಗೂ 7 ಇಂಚು ಅಗಲದ ಬಟ್ಟೆಯನ್ನು ಆಯ್ಕೆ ಮಾಡಬೇಕು. ಮಕ್ಕಳಿಗಾದರೆ 7 ಇಂಚ್ ಉದ್ದ ಹಾಗೂ 5 ಇಂಚ್ ಅಗಲದ ಬಟ್ಟೆ ಬೇಕಾಗುವುದು.
- ಸೂಕ್ತ ಉದ್ದ ಅಳತೆಯ ನಾಲ್ಕು ಕಟ್ಟುವ ದಾರ ಅಥವಾ ರಬ್ಬರ್/ ಇಲೇಸ್ಟಿಕ್ ಬೇಕಾಗುವುದು.

* ತಯಾರಿಸುವ ವಿಧಾನ
- ಮೊದಲು ಆಯ್ಕೆ ಮಾಡಿಕೊಂಡ ಬಟ್ಟೆಯನ್ನು ತೆಗೆದುಕೊಳ್ಳಿ. ನಂತರ 1.5 ಷ 5 ಅಳತೆಯ ದಾರವನ್ನು ಪೈಪಿಂಗ್ ಮಾಡುವ ಹಾಗೆ ಹೊಲಿಯಿರಿ.
- ನಂತರ ಕೆಳಮುಖದಲ್ಲಿ ಮೂರು ನೆರಿಗೆ ಬರುವ ಹಾಗೆ ಹೊಲಿಯಬೇಕು.
- ಬಳಿಕ ಕೆಳಭಾಗದ ಬಟ್ಟೆಯ ತುದಿಯಲ್ಲಿಯೂ ಇನ್ನೊಂದು ದಾರ ಅಥವಾ ಇಲೇಸ್ಟಿಕ್‍ಅನ್ನು ಜೋಡಿಸಬೇಕು.
- ಮಾಸ್ಕ್ ನ ನೆರಿಗೆ ಅಗಲವಾಗಿ, ಮೂರು ನೆರಿಗೆ ಮಾತ್ರ ಇರುವಂತೆ ಹೊಲಿಯಬೇಕು.
- ನಂತರ ಮುಖಕ್ಕೆ ಕಟ್ಟಿಕೊಳ್ಳಲು ಅನುಕೂಲವಾಗುವಂತೆ ಸ್ವಲ್ಪ ದಪ್ಪದಾದ ದಾರವನ್ನು ಜೋಡಿಸಬೇಕು.
- ಈಗ ನಿಮಗೆ ಬೇಕಾದ ಮಾಸ್ಕ್ ಸುಲಭವಾಗಿ ಸಿದ್ಧ ಮಾಡಿರುವುದನ್ನು ಪರಿಶೀಲಿಸಬಹುದು.

* ಕೈಯಲ್ಲಿ ತಯಾರಿಸಿದ ಮಾಸ್ಕ್ ಬಳಸುವ ಮುನ್ನೆಚ್ಚರಿಕಾ ಕ್ರಮಗಳು
- ಒಮ್ಮೆ ಸಿದ್ಧಪಡಿಸಿದ ಮುಖವಾಡ/ ಮಾಸ್ಕ್ ಅನ್ನು ಶುದ್ಧವಾಗಿ ತೊಳೆದುಕೊಂಡು ಬಳಸಬೇಕು.
- ಮಾಸ್ಕ್ ಧರಿಸುವ ಮುನ್ನ ಕೈಗಳನ್ನು ಚೆನ್ನಾಗಿ ತೊಳೆದುಕೊಂಡು, ಮುಖವಾಡವನ್ನು ಧರಿಸಬೇಕು.
- ಬೆವರು ಹಾಗೂ ಧೂಳಿನಿಂದ ಮಾಸ್ಕ್ ಬಹುಬೇಗ ಕೊಳೆಯಾಗುವುದು. ಅಂತಹ ಸಮಯದಲ್ಲಿ ಮುಖವಾಡವನ್ನು ಸೋಪ್‍ಗಳಿಂದ ಸ್ವಚ್ಛವಾಗಿ ತೊಳೆದು, ಒಣಗಿಸಿಕೊಳ್ಳಬೇಕು. ನಂತರ ಬಳಸುವುದನ್ನು ರೂಢಿಸಿಕೊಳ್ಳಬೇಕು.
- ಸ್ವಚ್ಛವಿಲ್ಲದ ಮಾಸ್ಕ್ ಗಳನ್ನು ಎಂದಿಗೂ ಧರಿಸಬಾರದು. ಆದಷ್ಟು ಸ್ವಚ್ಛತೆಯ ಬಗ್ಗೆ ಗಮನ ಹರಿಸಬೇಕು.
- ತೊಳೆದು, ಒಣಗಿಸಿದ ಮಾಸ್ಕ್ ಆಗಿದ್ದರೂ ನೀವು ಬಳಸುವ ಮುನ್ನ ಐದು ನಿಮಿಷಗಳ ಕಾಲ ಇಸ್ತ್ರೀಯಿಂದ ಬಿಸಿಮಾಡಿ. ಯಾವುದೇ ರೋಗಾಣು ಉಳಿದಿದ್ದರೂ ಸಾಯುವುದು.
- ಹೆಚ್ಚಾಗಿ ತಯಾರಿಸಿಕೊಂಡ ಅಥವಾ ಉಳಿದಿರುವ ಮಾಸ್ಕ್‍ಗಳನ್ನು ಸ್ವಚ್ಛವಾದ ಕವರ್ ಒಳಗೆ ಶೇಖರಿಸಿ ಇಡಿ.
- ಮಾಸ್ಕ್ ತಯಾರಿಸಲು ಶುದ್ಧವಾದ ಹತ್ತಿ ಬಟ್ಟೆಯನ್ನೇ ಆಯ್ಕೆ ಮಾಡಿ. ಇದು ಗಾಳಿಯು ಸುಲಭವಾಗಿ ಪಾಸಾಗುವಂತೆ ಮಾಡುವುದು. ಜೊತೆಗೆ ಬೆವರು ಅಥವಾ ಕೊಳೆಯಾದರ ಕಿರಿಕಿರಿ ಉಂಟಾಗದು. ಬದಲಿಗೆ ಸುಲಭವಾಗಿ ತೊಳೆದು ಮರು ಬಳಕೆ ಮಾಡಬವಹುದು.