ಕೊರೊನಾ ತಡೆಗಟ್ಟಲು ಮನೆಯಲ್ಲೇ ತಯಾರಿಸಿದ ಮಾಸ್ಕ್ ಧರಿಸಿ

ಒಂದು ವಿಶ್ಲೇಷಣೆಯ ಪ್ರಕಾರ ನಮ್ಮ ಇಡೀ ಭಾತದ ಜನಸಂಖ್ಯೆಯ ಶೇಖಡಾ 80 ರಷ್ಟು ಮಂದಿ ಮಾಸ್ಕ್ ಧರಿಸಲು ಮುಂದಾದರೆ, ಕೊರೊನಾ ವೈರಸ್ ಸಾಂಕ್ರಾಮಿಕ ಕಾಯಿಲೆಯ ಹರಡುವಿಕೆಯನ್ನು ತಕ್ಷಣವೇ ನಿಲ್ಲಿಸಬಹುದು ಎಂದು ಪ್ರಿನ್ಸಿಪಾಲ್ ಸೈಂಟಿಫಿಕ್ ಅಡ್ವೈಸರಿ ( ಪಿ ಎಸ್ ಎ ) ಯ ಕಚೇರಿ ಕೇಂದ್ರ ಸರ್ಕಾರಕ್ಕೆ ಮಂಗಳವಾರದಂದು ಸಲಹೆ ನೀಡಿದೆ. ಮನೆಯಲ್ಲೇ ತಯಾರು ಮಾಡಬಹುದಾದ ಮತ್ತು ಮರುಬಳಕೆ ಮಾಡಬಹುದಾದ ಮಾಸ್ಕ್ ಗಳ ಕುರಿತು ಕೈಪಿಡಿಯೊಂದನ್ನೂ ಸಹ ನಮ್ಮ ಕೇಂದ್ರ ಸರ್ಕಾರಕ್ಕೆ ಈ ಕಚೇರಿ ನೀಡಿದೆ.

ಮಾಸ್ಕ್ ಗಳನ್ನು ಧರಿಸುವುದು ಈ ಸಂಧರ್ಭದಲ್ಲಿ ಎಷ್ಟು ಮುಖ್ಯ ಎಂಬುದನ್ನು ಒತ್ತಿ ಹೇಳುತ್ತಾ ಪಿ ಎಸ್ ಎ ನ ಕಚೇರಿಯ ವಕ್ತಾರರಾದ ಕೆ. ವಿಜಯ್ ರಾಘವನ್ " ನಮ್ಮ ಭಾರತದಲ್ಲಿ ವಿಶೇಷವಾಗಿ ಹೆಚ್ಚಿನ ಜನ ದಟ್ಟಣೆ ಇರುವ ಪ್ರದೇಶಗಳಲ್ಲಿ ಜನರು ಮಾಸ್ಕ್ ಗಳನ್ನು ಧರಿಸುವುದನ್ನು ಶಿಫಾರಸ್ಸು ಮಾಡಲಾಗಿದೆ " ಎಂದು ತಿಳಿಸಿದರು.

ವಿಶ್ವ ಆರೋಗ್ಯ ಸಂಸ್ಥೆಯ ಮಾರ್ಗದರ್ಶನಗಳಂತೆ ಸಿದ್ದಪಡಿಸಿರುವ ಪಿ ಎಸ್ ಎ ನ ಕೈಪಿಡಿಯಲ್ಲಿ " ಆಗಾಗ ಆಲ್ಕೋಹಾಲ್ ಅಂಶ ಹೊಂದಿದ ಸ್ಯಾನಿಟೈಸರ್ ಅಥವಾ ಸೋಪು ಮತ್ತು ನೀರಿನಿಂದ ಕನಿಷ್ಠ 20 ಸೆಕೆಂಡುಗಳ ಕಾಲ ಶುಚಿಯಾಗಿ ಕೈ ತೊಳೆದುಕೊಳ್ಳುವುದರ ಜೊತೆ ಮಾಸ್ಕ್ ತೊಟ್ಟರೆ ಮಾತ್ರ ಅದು ಕರೋನ ವೈರಸ್ ವಿರುದ್ಧ ಪರಿಣಾಮಕಾರಿಯಾಗಿ ಹೋರಾಡುವ ಕೆಲಸ ಮಾಡಬಲ್ಲುದು. ಮಾಸ್ಕ್ ಧರಿಸಿದರೆ ಅದನ್ನು ಹೇಗೆ ಬಳಸಬೇಕು ಮತ್ತು ವಿಲೇವಾರಿ ಮಾಡಬೇಕು ಎಂಬುದನ್ನೂ ಕೂಡ ನೀವು ತಿಳಿದಿರಬೇಕು." ಎಂದು ತಿಳಿಸಲಾಗಿದೆ.

ಪಿ ಎಸ್ ಎ ಕಚೇರಿ ಸಿದ್ದಪಡಿಸಿ ನೀಡಿರುವ ಕೈಪಿಡಿ ಜನರಿಗೆ ಮನೆಯಲ್ಲಿ ಅವರೇ ಒಂದು ಹತ್ತಿಯ ಬಟ್ಟೆ, ಕತ್ತರಿ ಮತ್ತು ಹೊಲಿಗೆ ಯಂತ್ರದ ಮೂಲಕ ಮಾಸ್ಕ್ ತಯಾರು ಮಾಡಿಕೊಂಡು ಬಳಸುವ ರೀತಿಯನ್ನು ಸುಲಭವಾಗಿ ತಿಳಿಸುತ್ತದೆ.