ಸ್ವಯಂ ಉದ್ಯೋಗದಲ್ಲಿದ್ದರೆ ಮಾನಸಿಕ ಆರೋಗ್ಯ

ಆಫೀಸಲ್ಲಿ ಕೆಲಸ ಮಾಡುವ ಎಲ್ಲರೂ ಒತ್ತಡ ಎನ್ನುವ ಮಾರಿಯ ಬಲಿಪಶುಗಳು. ಒಬ್ಬನ ಸಮಸ್ಯೆ ಇದಲ್ಲ. ಕಚೇರಿಯಲ್ಲಿ ಹೆಚ್ಚಾಗುತ್ತಿರುವ ಕೆಲಸದ ಭಾರ, ಕಚೇರಿಯೊಳಗಿನ ಸಣ್ಣಪುಟ್ಟ ರಾಜಕೀಯ, ರುಚಿಗೆಟ್ಟ ಕ್ಯಾಂಟೀನ್ ಊಟ, ಆ ಕೆಲಸ ಮಾಡು, ಈ ಕೆಲಸ ಮಾಡು ಎಂದು ಸೂಚಿಸುವ ಬಾಸ್- ಹೀಗೆ ಒಂದಲ್ಲ ಎರಡಲ್ಲ ನೂರೆಂಟು ಕಾರಣಗಳು ನಿಮ್ಮಲ್ಲಿ ಒತ್ತಡಕ್ಕೆ ಕಾರಣವಾಗುತ್ತವೆ.

ಆಫೀಸಿನ ಒತ್ತಡ ವೈಯಕ್ತಿಕ ಸಂಬಂಧ ಹಾಳುಗೆಡವುವ ಸಾಧ್ಯತೆ ಇದೆ. ಅದೇ ರೀತಿ ವೈಯಕ್ತಿಕ ಸಂಬಂಧಗಳು ಕಚೇರಿ ಕೆಲಸದ ಮೇಲೂ ಪರಿಣಾಮ ಬೀರಲು ಪ್ರಯತ್ನಿಸುತ್ತದೆ.
ಹೀಗೆ ಇನ್ನೊಬ್ಬರ ಕೈ ಅಡಿಯಲ್ಲಿ ಕೆಲಸ ಮಾಡುತ್ತಿದ್ದೇವೆ ಎಂದರೆ ನಿಜಕ್ಕೂ ಅಲ್ಲಿ ಒತ್ತಡ, ಭಯ ಮತ್ತೀತರ ಸಮಸ್ಯೆಗಳಿದ್ದೇ ಇರುತ್ತವೆ.

ಇದರಿಂದೆಲ್ಲ ನೀವು ಮುಕ್ತರಾಗಿರಬೇಕೆಂದರೆ ಏನು ಮಾಡಬೇಕು? ಅದಕ್ಕಿರುವುದೊಂದೇ ಪರಿಹಾರ ಸ್ವಯಂ ಉದ್ಯೋಗ.

ಹೌದು, ನೀವು ಮಾಡುವ ಕೆಲಸ ಹಾಗೂ ಆರೋಗ್ಯಕ್ಕೆ ಒಂದಕ್ಕೊಂದು ಸಂಬಂಧವಿದೆ. ಅದರಲ್ಲೂ ನೀವು ಸ್ವಂತ ಉದ್ಯೋಗದಲ್ಲಿದ್ದೀರ ಅಂದರೆ ನಿಮ್ಮ ಮಾನಸಿಕ ಆರೋಗ್ಯ ಉತ್ತಮವಾಗಿರುತ್ತದೆಯಂತೆ. ಯಾವುದೋ ಕಂಪನಿಗಳಲ್ಲಿ ಯಾರದ್ದೋ ಕೈ ಕೆಳಗೆ ಕೆಲಸ ಮಾಡುವಾಗ ಉಂಟಾಗುವ ಒತ್ತಡ ಸೃಷ್ಟಿಸುವ ಆರೋಗ್ಯ ಸಮಸ್ಯೆ ಇಲ್ಲಿ ಕಂಡುಬರುವುದಿಲ್ಲ. ಒಟ್ಟಾರೆ ಸ್ವಂತ ಉದ್ಯೋಗ ನೆಮ್ಮದಿ ನೀಡುವುದರ ಜತೆ ಆತ್ಮವಿಶ್ವಾಸವನ್ನು ಹೆಚ್ಚಿಸುತ್ತದೆ. ಇದು ಮಾನಸಿಕ ಸಮತೋಲನವನ್ನು ಕಾಪಾಡಲು ನೆರವಾಗುತ್ತದೆ ಎನ್ನುತ್ತಾರೆ ತಜ್ಞರು.