ಕುಡಿಯುವ ನೀರಿನ ಬಾಟಲಿಯಿಂದಲೂ ಕಾಯಿಲೆ ಹರಡತ್ತೆ ಎಚ್ಚರ!

ನೀರು ಕುಡಿಯಲು ಪಕ್ಕದಲ್ಲೊಂದು ಬಾಟಲ್‌ ಇದ್ದರೆ ಅನುಕೂಲ. ಅದಕ್ಕಾಗಿ ಬಹುತೇಕರು ಬಗೆಬಗೆಯ ಬಾಟಲಿಗಳನ್ನು ಬಳಸುವುದೂ ಸಾಮಾನ್ಯ. ಆದರೆ ಈ ಬಾಟಲಿಗಳಿಂದಲೇ ನಿಮ್ಮ ಆರೋಗ್ಯ ಹಾಳಾಗಬಹುದು ಎನ್ನುತ್ತಾರೆ ತಜ್ಞರು. ಪ್ಲಾಸ್ಟಿಕ್‌, ಸ್ಟೀಲ್‌, ಕಾಪರ್‌ ಇತ್ಯಾದಿ ಬಾಟಲಿಗಳ ಗುಣಮಟ್ಟ ಏನೇ ಇದ್ದರೂ ಆರೋಗ್ಯ ಕೆಡುವ ಮೂಲ ಅಲ್ಲಿಯೇ ಇರಬಹುದು ಅನ್ನುತ್ತಾರವರು.

ನೀರು ಕುಡಿಯುವಾಗ ಸ್ವಲ್ಪ ನೀರನ್ನ ಸಿಪ್‌ ಮಾಡಿ ಪಕ್ಕಕ್ಕಿಡುವವರೇ ಅನೇಕರು. ಹೀಗೆ ಮಾಡುವಾಗ ಬಾಯಿಗೆ ಹೋದ ನೀರೇ ಮತ್ತೆ ಬಾಟಲಿಗೆ ಹೋಗಿರಬಹುದು. ಇದೇ ಬಾಟಲಿಗೆ ಮತ್ತೆ ಮರುದಿನ ನೀರು ತುಂಬಿಸಿಕೊಂಡು ಕುಡಿಯುವವರೂ ಉಂಟು. ಹೀಗೆ ಮಾಡುವುದರಿಂದಲೇ ಬಾಟಲಿಯಲ್ಲಿ ಕೀಟಾಣುಗಳ ಉತ್ಪನ್ನವಾಗುವ ಸಾಧ್ಯತೆ ಇದೆ ಎನ್ನುತ್ತಾರೆ ತಜ್ಞರು. ಅಂದರೆ, ಸ್ವಚ್ಛತೆಯ ಕಾರಣದಿಂದ ಆರೋಗ್ಯ ಹಾಳಾಗಬಹುದು ಎಂದಾಯಿತು.

ಬಾಟಲಿಯ ಒಳಭಾಗ ತೇವಯುಕ್ತವಾಗಿರುವುದರಿಂದ ಅದು ಬ್ಯಾಕ್ಟೀರಿಯಾದಂತಹ ಕೀಟಾಣುಗಳು ಬೆಳೆಯುವುದಕ್ಕೆ ಪೂರಕವಾಗುತ್ತದೆ. ಇದರಿಂದ ಅನಾರೋಗ್ಯವುಂಟಾಗಿ ವಾಂತಿ, ಅತಿಸಾರ ಇತ್ಯಾದಿ ಸಮಸ್ಯೆಗಳು ಕಾಡಬಹುದು.

ಬಾಟಲಿ ಯಾವುದೇ ಇರಲಿ, ಅದರ ಒಳಭಾಗ, ಸಿಪ್‌ ಮಾಡುವ ಅದರ ಕತ್ತಿನ ಭಾಗ, ಮುಚ್ಚಳ, ಸ್ಟ್ರಾ ಇತ್ಯಾದಿಗಳೆಲ್ಲವನ್ನೂ ಚೆನ್ನಾಗಿ ತೊಳೆದುಕೊಳ್ಳಬೇಕು. ಇದಕ್ಕಾಗಿ ಸೋಪ್‌ ವಾಟರ್‌ ಸಿದ್ಧಪಡಿಸಿಟ್ಟುಕೊಂಡು ಅದನ್ನು ಬಾಟಲಿಗೆ ಹಾಕಿ ಬ್ರಷ್‌ ಬಳಸಿ ಚೆನ್ನಾಗಿ ತೊಳೆಯಬೇಕು. ತೊಳೆದ ಬಳಿಕ ಬಾಟಲಿನಲ್ಲಿರುವ ನೀರಿನ ತೇವ ಒಣಗುವಂತೆ ನೋಡಿಕೊಳ್ಳಬೇಕು. ಇದರಿಂದ ಬಾಟಲಿನೊಳಕ್ಕೆ ಬ್ಯಾಕ್ಟೀರಿಯಾ ಮತ್ತೆ ಹೋಗುವ ಸಾಧ್ಯತೆ ಇರುವುದಿಲ್ಲ. ಈ ರೀತಿ ಪ್ರತಿದಿನವೂ ತೊಳೆದುಕೊಂಡು ಸ್ವಚ್ಛವಾಗಿಡುವುದರಿಂದ ಆರೊಗ್ಯವನ್ನು ಕಾಪಾಡಿಕೊಳ್ಳಬಹುದು.