ಸ್ತನ ಕ್ಯಾನ್ಸರ್‌ ನಿವಾರಣೆಗೆ ಯೋಗ

ಒಂದು ದಶಕದ ಹಿಂದೆ 50 ವರ್ಷ ಮೀರಿದ ಮಹಿಳೆಯರಲ್ಲಿ ಸ್ತನ ಕ್ಯಾನ್ಸರ್ ಹೆಚ್ಚಾಗಿತ್ತು. ಆದರೆ ಈಗ ವಯಸ್ಸಾದ ಮಹಿಳೆಯರಿಗಿಂತಲೂ ಯುವತಿಯರನ್ನೇ ಸ್ತನ ಕ್ಯಾನ್ಸರ್ ಹೆಚ್ಚು ಭಾದಿಸುತ್ತಿದೆ.

ಹೆಚ್ಚಿದ ನಗರೀಕರಣ, ಪಾಶ್ಚಾತ್ಯ ಸಂಸ್ಕೃತಿಯ ಅನುಕರಣೆ ಮತ್ತು ಗರ್ಭಧಾರಣೆಯ ಮನಸ್ಥಿತಿಯಲ್ಲಿ ಆದ ಬದಲಾವಣೆಯಿಂದಾಗಿ ಸ್ತನ ಕ್ಯಾನ್ಸರ್ ಪ್ರಮಾಣ ಹೆಚ್ಚುತ್ತಿದೆ. ಇತರ ಕ್ಯಾನ್ಸರ್ ಪ್ರಕರಣಗಳಿಗಿಂತಲೂ ಸ್ತನ ಕ್ಯಾನ್ಸರ್‌ನಿಂದ ಸಾಯುವವರ ಸಂಖ್ಯೆ ಹೆಚ್ಚಿದೆ.

ಜೀವನ ಶೈಲಿ ಇದಕ್ಕೆ ಮುಖ್ಯ ಕಾರಣ. ಬೊಜ್ಜುತನ, ಕಡಿಮೆ ದೈಹಿಕ ಚಟುವಟಿಕೆ, ಧೂಮಪಾನ, ಮದ್ಯಪಾನದಲ್ಲಿ ಹಚ್ಚಳ, ತಡವಾಗಿ ಗರ್ಭ ಧರಿಸುವುದು, ಕಡಿಮೆ ಎದೆಹಾಲುಣಿಸುವುದು, ಸಂಸ್ಕರಿತ ಆಹಾರವನ್ನು ಹೆಚ್ಚು ಸೇವಿಸುವುದು ಅಲ್ಲದೇ ವಾತಾವರಣದಲ್ಲಿರುವ ವಿಷಯುಕ್ತ ಅಂಶಗಳು ಸ್ತನ ಕ್ಯಾನ್ಸರ್‌ಗೆ ಕಾರಣಗಳಾಗಿವೆ

ಯೋಗ

ಸ್ತನ ಕ್ಯಾನ್ಸರ್‌ನಿಂದ ನರಳುತ್ತಿರುವ ಅಥವಾ ಅದಕ್ಕೆ ಚಿಕಿತ್ಸೆ ಪಡೆಯುತ್ತಿರುವ ಮಹಿಳೆಯರು ಯೋಗ ಮಾಡುವುದರಿಂದ ಒಂದಿಷ್ಟು ರಿಲ್ಯಾಕ್ಸ್‌ ಆಗುವುದರ ಜತೆ ಚಿಕಿತ್ಸೆಯ ನೋವು, ಸುಸ್ತು ನಿವಾರಿಸಿಕೊಳ್ಳಬಹುದು ಎಂದಿದೆ ಅಧ್ಯಯನ.

ಚಿಕಿತ್ಸೆಯ ಸಂದರ್ಭದಲ್ಲಿ ಮಾನಸಿಕ ಹಾಗೂ ದೈಹಿಕ ನೋವು ಸಾಕಷ್ಟು ಕಾಡುತ್ತದೆ. ಆದರೆ ಒಂದು ರೀತಿಯ ಧನಾತ್ಮಕ ದೃಷ್ಟಿಕೊಣವನ್ನಿಟ್ಟುಕೊಂಡು ಕ್ಯಾನ್ಸರ್‌ ಎದುರುಸಲು ಯೋಗ ಸಹಾಯ ಮಾಡುವುದಲ್ಲದೆ ಈ ಸಂದರ್ಭದಲ್ಲಿ ಉತ್ಕೃಷ್ಟ ಬದುಕನ್ನು ಕಳೆಯಲು ಸಹಾಯ ಮಾಡುತ್ತದೆ ಎಂಬುದು ಸ್ತನ ಕ್ಯಾನ್ಸರ್‌ ಪೀಡಿತ ಮಹಿಳೆಯರು ಹಾಗೂ ಯೋಗದ ಮೇಲೆ ಮಾಡಲಾದ ಪ್ರಯೋಗದಿಂದ ತಿಳಿದು ಬಂದಿದೆ.