ವ್ಯಾಯಾಮದಿಂದ ಮನೋರೋಗಕ್ಕೆ ಮುಕ್ತಿ

ಹೆಚ್ಚಿನವರು, ಆರೋಗ್ಯವೆಂದರೆ ದೈಹಿಕ ಆರೋಗ್ಯ ಎಂದಷ್ಟೇ ಭಾವಿಸಿದ್ದಾರೆ. ನಮ್ಮ ಸರ್ವತೋಮುಖ ಆರೋಗ್ಯದಲ್ಲಿ ಮಾನಸಿಕ ಮತ್ತು ಭಾವನಾತ್ಮಕ ಆರೋಗ್ಯವೂ ಸಹ ಮುಖ್ಯ. ಮನುಷ್ಯನ ದೇಹಕ್ಕೆ ಹೇಗೆ ಜ್ವರ ನೆಗಡಿ ಇನ್ನಿತರೆ ಬಾಧೆಗಳು ಕಾಡಿಸುತ್ತವೆ. ಅದೇ ರೀತಿ ಮನುಷ್ಯನ ಮೆದುಳು ಕೂಡ ಅನಾರೋಗ್ಯಕ್ಕೆ ತುತ್ತಾಗುತ್ತದೆ. ಇದನ್ನು ನಿರ್ಲಕ್ಷ್ಯಿಸಿದರೆ ಮುಂದೆ ತೊಂದರೆ ಅನುಭವಿಸಬೇಕಾಗುತ್ತದೆ. ಸೂಕ್ತ ಸಮಯದಲ್ಲಿ ಎಚ್ಚರ ವಹಿಸಿ ಚಿಕಿತ್ಸೆ ಪಡೆದು ಗುಣಪಡಿಸಿಕೊಳ್ಳಲೇಬೇಕು.

ಹಿಂದೆ ಮಾನಸಿಕ ಆರೋಗ್ಯಕ್ಕೆ ಹೆಚ್ಚು ಗಮನ ಹರಿಸುತ್ತಿರಲ್ಲಿಲ್ಲ. ಮೂಢನಂಬಿಕೆಯಿಂದ ಪೂಜೆ, ಹೋಮಗಳ ಮೊರೆ ಹೋಗುತ್ತಿದ್ದರು. ಕಾರಣ ದೈಹಿಕ ಅನಾರೋಗ್ಯದಂತೆ , ಮಾನಸಿಕ ಅನಾರೋಗ್ಯ ಕೂಡ ಸಹಜ ಎಂಬ ಅರಿವು ಜನರಿಗಿರಲಿಲ್ಲ, ನಿಜವಾಗಿ ಹೇಳಬೇಕೆಂದರೆ ಯಾವುದೇ ವ್ಯಕ್ತಿ ಶೇ. ನೂರರಷ್ಟು ಮಾನಸಿಕ ಆರೋಗ್ಯ ಹೊಂದಿರುವುದಿಲ್ಲ.

ಯೋಗ, ಪ್ರಾಣಾಯಾಮ, ಧ್ಯಾನ, ಉತ್ತಮ ಜೀವನ ಶೈಲಿ ಮಾಡುವುದರ ಮೂಲಕ ಮಾನಸಿಕ ಸ್ಥಿತಿ ಕಾಪಾಡಿಕೊಳ್ಳಬಹುದು. ನಿಮ್ಮನ್ನು ಕಾಡುವ ಒತ್ತಡವನ್ನು ನೀಗಿಸಿ ಕಿರಿಕಿರಿಯನ್ನುಂಟು ಮಾಡುವ ಅಂಶಗಳನ್ನು ಮನಸ್ಸಿನಿಂದ ಹೊರಹಾಕುವ ತಾಕತ್ತು ವ್ಯಾಯಾಮಕ್ಕಿದೆ.

ಹೌದು, ನಿಯಮಿತವಾಗಿ ವ್ಯಾಯಾಮ ಮಾಡುವುದರಿಂದ ಮಾನಸಿಕ ಕಾಯಿಲೆಗಳಿಂದ ದೂರವಿರಬಹುದು ಏಕೆಂದರೆ ಇದರಿಂದ ಹಲವು ಮಾನಸಿಕ ಹಾಗೂ ದೈಹಿಕ ಲಾಭಗಳಿವೆ. ಅದರಲ್ಲೂ ಮಾನಸಿಕ ಕಾಯಿಲೆಗಳು ಬಾರದಂತೆ ತಡೆಯಲು ವ್ಯಾಯಾಮ ಸಹಕಾರಿ ಎನ್ನುತ್ತವೇ ಅನೇಕ ಅಧ್ಯಯನಗಳು.

ವಾರದಲ್ಲಿ 4-5 ದಿನ ಸುಮಾರು 45 ಗಂಟೆಗಳ ಕಾಲ ವ್ಯಾಯಾಮ ಮಾಡುವವರಿಗೆ ಹೋಲಿಸಿದರೆ ವ್ಯಾಯಾಮ ಅಥವಾ ದೈಹಿಕ ಚಟುವಟಿಕೆಗಳಿಲ್ಲದ ವ್ಯಕ್ತಿಗಳು ಬಹುಬೇಗ ತೊಂದರೆಗೆ ಒಳಗಾಗುತ್ತಾರೆ. ಒತ್ತಡ, ಖಿನ್ನತೆಯ ಕಾರಣಗಳಿಂದ ಉಂಟಾಗುವ ಮಾನಸಿಕ ರೋಗಗಳು ಇವರಲ್ಲಿ ಹೆಚ್ಚು.

ಮಾರ್ನಿಂಗ್ ವಾಕ್, ರನ್ ನಿಮ್ಮ ಮನಸ್ಸು ಮತ್ತು ದೇಹವನ್ನು ಉಲ್ಲಸಿತಗೊಳಿಸುತ್ತದೆ. ವ್ಯಾಯಾಮವು ದೇಹದ ಮತ್ತು ಮಾನಸಿಕ ಆರೋಗ್ಯಕ್ಕೆ ಪ್ರಮುಖವಾದ ಪಾತ್ರವನ್ನು ವಹಿಸುತ್ತದೆ. ಕೆಲವು ವ್ಯಾಯಾಮಗಳು ದೇಹವನ್ನು ಬಲಪಡಿಸಿದರೆ ಇನ್ನು ಕೆಲವು ಖಾಯಿಲೆಗಳನ್ನು ದೂರ ಮಾಡುತ್ತವೆ. ಮಾನಸಿಕ ಆರೋಗ್ಯ ವರ್ಧನೆಗೆ ಯೋಗವಂತೂ ಬಹಳ ಪ್ರಯೋಜನಕಾರಿ.