ಕೂಲ್‌ ಕಾಣಲು ಸ್ಮೋಕ್‌ ಮಾಡುತ್ತಿರುವ ಯುವಪೀಳಿಗೆ!

ಧೂಮಪಾನ ಇಂದು ಇಪ್ಪತ್ತರಿಂದ ಮೂವತ್ತರ ಹರೆಯದವರಲ್ಲೂ ಕಾಮನ್‌. ವಿಶೇಷವೆಂದರೆ ಈ ವಯಸ್ಸಿನ ತರುಣರು ತಾವು ಕೂಲ್‌ ಆಗಿ ಕಾಣಬೇಕೆಂದು ಸ್ಮೋಕ್‌ ಮಾಡುತ್ತಾರಂತೆ.

ಇಪ್ಪತರಿಂದ ಮೂವತ್ತೈದು ವಯಸ್ಸಿನ ಶೇ.23ರಷ್ಟು ಪುರುಷರು ಈ ಅಭಿಪ್ರಾಯ ವ್ಯಕ್ತಪಡಿಸಿದ್ದರೆ ಅದಕ್ಕಿಂದ ಹಿರಿಯ ಪುರುಷರಿಗೆ ಧೂಮಪಾನ ಮಾಡುವುದು ಒಂದು ವೈಯಕ್ತಿಕ ಅಭ್ಯಾಸ. ಹೀಗೆಂದು ಇನ್ಶೂರೆನ್ಸ್‌ ಸಂಸ್ಥೆಯೊಂದು ಮಾಡಿದ ಸಮೀಕ್ಷೆಯಲ್ಲಿ ಅಭಿಪ್ರಾಯ ವ್ಯಕ್ತವಾಗಿದೆ.

20ರಿಂದ 35 ವರ್ಷ ವಯಸ್ಸಿನ ತರುಣರು ತಮ್ಮ ಸ್ಮೋಕಿಂಗ್‌ ಅಭ್ಯಾಸದ ಬಗ್ಗೆ ಯಾವ ಮುಚ್ಚುಮರೆ ಮಾಡಲೂ ಇಷ್ಟಪಟ್ಟಿಲ್ಲ. ತಾವು ಧೂಮಪಾನ ಮಾಡುವ ಫೋಟೋವನ್ನು ಸೋಶಿಯಲ್‌ ಮೀಡಿಯಾದಲ್ಲಿ ಹಾಕುವುದಕ್ಕೂ ಹಿಂಜರಿಯುವುದಿಲ್ಲ ಎಂದು ಈ ಗುಂಪಿನ ಶೇ.15ರಷ್ಟು ಯುವಕರು ಹೇಳಿದ್ದರೆ 35ರಿಂದ 50 ವರ್ಷ ಗುಂಪಿನ ಶೇ.23ರಷ್ಟು ಜನ ತಮ್ಮ ಈ ಅಭ್ಯಾಸವನ್ನು ಬಹಿರಂಗಗೊಳಿಸುವುದನ್ನು ಅಷ್ಟಾಗಿ ಇಷ್ಟಪಟ್ಟಿಲ್ಲ. ಕಿರಿಯ ಗುಂಪಿನವರು ದಿನಕ್ಕೆ ಸರಾಸರಿ ಏಳು ಸಿಗರೇಟ್‌ ಸೇದಿದರೆ ಹಿರಿಯ ಗುಂಪಿನವರು ಸರಾಸರಿ ಐದು ಸಿಗರೇಟ್‌ಗೆ ಸೀಮಿತರಾಗಿರುವುದು ವಿಶೇಷ.

ಬದುಕಿನಲ್ಲಿನ ಕೆಲವು ಘಟನೆಗಳು ಸಿಗರೇಟ್‌ ಸೇದುವಿಕೆಯ ಮೇಲೂ ಪರಿಣಾಮ ಬೀರುತ್ತೆ ಎಂಬುದನ್ನು ಈ ಸಮೀಕ್ಷೆ ಹೊರತಂದಿದೆ. ಶೇ.37ರಷ್ಟು ಜನರು ಕೆಲಸ ಸಿಕ್ಕ ಬಳಿಕ ಧೂಮಪಾನ ಹೆಚ್ಚಿಸಿದ್ದರೆ ವಿವಾಹವಾದ ಬಳಿಕ, ಕುಂಠಿತವಾಗುವ ಆರೋಗ್ಯ, ಮಕ್ಕಳಾಗುವಿಕೆ ಇತ್ಯಾದಿ ವೈಯಕ್ತಿಕ ಬದುಕಿನ ಬೆಳವಣಿಗೆಗಳು ಧೂಮಪಾನವನ್ನು ಕಡಿಮೆ ಮಾಡುತ್ತವೆ ಎನ್ನಲಾಗಿದೆ. ವಿಶೇಷವೆಂದರೆ 26-50ರ ವಯಸ್ಸಿನ ಮಹಿಳೆಯರು ತಾವು ಭಾವನಾತ್ಮಕವಾಗಿ ತಳಕ್ಕಿಳಿದಾಗ ಸ್ಮೋಕ್‌ ಮಾಡುತ್ತೇವೆ ಎಂದಿದ್ದಾರಂತೆ.