ತನ್ನ ಸರ್ವಸ್ವವನ್ನೂ ಧಾರೆಯೆರೆಯುವ ತಂದೆಗೆ ಸ್ಪೆಷಲ್ ಸರ್ಪ್ರೈಸ್ ನೀಡಿ!

ಫಾದರ್ಸ್ ಡೇ ದಿನ ನಿಮ್ಮ ಪ್ರೀತಿಯ ತಂದೆಗೆ ನಿಮ್ಮ ಕುಟುಂಬಕ್ಕೆ ಇದುವರೆಗೂ ಅವರು ಮಾಡಿದ ನಿಸ್ವಾರ್ಥ ಸೇವೆಗೆ ಪ್ರತಿಫಲವಾಗಿ ಅವರಿಗೆ ನೆನಪಿನಲ್ಲಿ ಉಳಿಯುವಂತಹ ಒಂದು ಉಡುಗೊರೆಯನ್ನು ಕೊಡಲು ನಿಮ್ಮ ಮನಸ್ಸು ಎಂದಿನಿಂದಲೋ ಹಾತೊರೆಯುತ್ತಿತ್ತು ಎಂಬುದು ನಮಗೆ ಚೆನ್ನಾಗಿ ಗೊತ್ತಿದೆ. ಆದರೆ ಈಗ ಅದಕ್ಕೆ ಸಮಯ ಕೂಡಿ ಬಂದಿದೆ ಎಂದು ಹೇಳಬಹುದು.

ಸಾಮಾನ್ಯವಾಗಿ ನಮ್ಮ ಮನೆಯ ಮುಖ್ಯ ಪಿಲ್ಲರ್ ಎಂದರೆ ಅದು ನಮ್ಮ ತಂದೆ ಮತ್ತು ತಾಯಿ. ದುಡಿಮೆಯ ವಿಚಾರದಲ್ಲಿ ತಂದೆ ಸಹಾಯಕ್ಕೆ ಬಂದರೆ ಕುಟುಂಬ ನಿರ್ವಹಣೆಯ ವಿಚಾರದಲ್ಲಿ ತಾಯಿಯ ನಿಸ್ವಾರ್ಥ ಸೇವೆ ಗಣನೆಗೆ ಬರುತ್ತದೆ.

ಆದರೆ ಹಲವಾರು ಸಂದರ್ಭಗಳಲ್ಲಿ ನಮಗೆ ತಾಯಿಯೇ ಮುಖ್ಯವಾಗುತ್ತಾರೆ. ತನ್ನ ಕುಟುಂಬದ ಬಗ್ಗೆ ಅಪಾರವಾದ ಪ್ರೀತಿಯನ್ನು ಹೊಂದಿ ಅದನ್ನು ಎಲ್ಲಿಯೂ ತೋರಿಸಿಕೊಳ್ಳದೇ ಮನಸ್ಸಿನಲ್ಲೇ ನನ್ನ ಕುಟುಂಬ ನಾಳೆ ದಿನ ಇನ್ನೊಬ್ಬರ ಮುಂದೆ ತಲೆ ತಗ್ಗಿಸಬಾರದು ಎಂದು ತನ್ನ ಸರ್ವಸ್ವವನ್ನೂ ದುಡಿಮೆಯ ರೂಪದಲ್ಲಿ ಧಾರೆಯೆರೆಯುವ ತಂದೆಗೆ ಇಂದಿನ ದಿನ ನಮ್ಮ ಶಿರಸಾಷ್ಟಾಂಗ ಗೌರವ ಸಲ್ಲಿಸಲೇಬೇಕು.

ನಿಮ್ಮ ತಂದೆಗೆ ಕೊಟ್ಟರೆ ಇಂತಹ ಗಿಫ್ಟ್ ಕೊಡಬೇಕು!!

ನಮ್ಮ ಕಣ್ಣಿಗೆ ಕೇವಲ ತಂದೆಯ ಕೋಪ, ನಿಷ್ಕೃಷ್ಟ ಮನಸ್ಸು ಕಾಣುವುದೇ ವಿನಃ ನಮ್ಮ ಬಗೆಗಿನ ಮಾನಸಿಕ ತಳಮಳ, ಚಡಪಡಿಕೆ, ಕಾತುರ ಕಣ್ಣಿಗೆ ಕಾಣುವುದಿಲ್ಲ ಮತ್ತು ಅದನ್ನು ಅವರು ತಮ್ಮ ಮನಸ್ಸಿನಲ್ಲಿ ಇಟ್ಟುಕೊಂಡಿರುತ್ತಾರೆಯೇ ವಿನಃ ನಮ್ಮ ಮುಂದೆ ಎಂದಿಗೂ ತೋರಿಸಿಕೊಳ್ಳುವುದಿಲ್ಲ.

ಕೆಲಸದಿಂದ ನಿವೃತ್ತಿ ಹೊಂದಿದ ನಮ್ಮ ತಂದೆಗೆ ಇಂದು ಆರಾಮಾಗಿರಬೇಕಾದ ಪಟ್ಟ ಸಿಕ್ಕಿದೆ ಎಂದು ನಾವು ಮನಸ್ಸಿನಲ್ಲೇ ಅಂದುಕೊಳ್ಳುತ್ತೇವೆ. ಆದರೆ ಅವರ ನಿಜವಾದ ಮಾನಸಿಕ ಯೋಚನೆಗಳು ನಮಗೆ ಅರ್ಥವಾಗುವುದಿಲ್ಲ. ಜೊತೆಗೆ ನಾವೂ ಕೂಡ ನಮ್ಮ ಕೆಲಸಗಳಲ್ಲಿ ಬ್ಯುಸಿ ಇರುವುದರಿಂದ ನಮ್ಮ ತಂದೆಯ ಆರೋಗ್ಯದ ಸಮೇತ ಈ ಎಲ್ಲಾ ವಿಚಾರಗಳನ್ನು ಮರೆತೇ ಬಿಡುತ್ತೇವೆ.

ಆದರೆ ಈ ಭಾನುವಾರ ಅದಕ್ಕೆಲ್ಲಾ ತೆರೆಬಿದ್ದಿದೆ. ಏಕೆಂದರೆ ನಾವೂ ಫ್ರೀ, ಅವರೂ ಫ್ರೀ. ಹಾಗಾಗಿ ನಮ್ಮ ತಂದೆಯ ಜೊತೆ ಆರಾಮವಾಗಿ ಕುಳಿತು ಮಾತನಾಡಲು, ಕಷ್ಟ ಸುಖ ವಿಚಾರಿಸಲು ಅವರ ಆರೋಗ್ಯದ ಬಗ್ಗೆ ಕಾಳಜಿ ತೋರಲು ಇದೊಂದು ಸುಸಮಯ.

ಇಂತಹ ಸೊಗಸಾದ ಸಂದರ್ಭದಲ್ಲಿ ನಮಗೂ ಮತ್ತು ಅವರಿಗೂ ಕಡೆವರೆಗೂ ಜ್ಞಾಪಕದಲ್ಲಿ ಉಳಿಯುವಂತಹ ಯಾವುದಾದರೂ ಗಿಫ್ಟ್ ಕೊಟ್ಟರೆ ಹೇಗಿರುತ್ತದೆ ಅಲ್ಲವೇ. ಇದು ಖಂಡಿತ ಅವರಿಗೆ ಸರ್ಪ್ರೈಸ್ ಆಗುವುದು ಮಾತ್ರವಲ್ಲದೆ, ನನ್ನ ಕುಟುಂಬದವರು ನನ್ನ ಬಗ್ಗೆ ಇಷ್ಟು ಕಾಳಜಿ ಇಟ್ಟುಕೊಂಡಿದ್ದಾರೆ ಎಂದು ಮನಸ್ಸಿನಲ್ಲೇ ಸಾಕಷ್ಟು ಖುಷಿ ಪಡುತ್ತಾರೆ. ಇದೊಂದು ಅವರ ಜೀವನದಲ್ಲಿ ಅಚ್ಚಳಿಯದ ನೆನಪಾಗಿ ಉಳಿಯುವುದಂತೂ ಖಂಡಿತ.ಹಾಗಾದರೆ ಫಾದರ್ಸ್ ಡೇ ದಿನ ಅಂತಹ ಯಾವ ಯಾವ ಗಿಫ್ಟ್ ಗಳನ್ನು ಕೊಡಬಹುದು ಎಂಬುದನ್ನು ಈಗ ನೋಡೋಣ.

ತಂದೆ ಆರೋಗ್ಯವಾಗಿರಬೇಕೆಂದರೆ, ನೀವು ಈ ಕೆಲಸಗಳನ್ನು ಮಾಡಲೇಬೇಕು!

ವರ್ಕೌಟ್ ಹೆಡ್ಫೋನ್ ಗಳು
ವಯಸ್ಸಾದವರಿಗೆ ತಮ್ಮ ದೇಹದ ಆರೋಗ್ಯವನ್ನು ಸುಸ್ಥಿತಿಯಲ್ಲಿ ಕಾಪಾಡಿಕೊಳ್ಳಲು ವ್ಯಾಯಾಮ ಅತಿ ಮುಖ್ಯ. ಹಾಗಾಗಿ ಪ್ರತಿ ದಿನವೂ ನಿಮ್ಮ ತಂದೆ ವ್ಯಾಯಾಮ ಮಾಡುವ ಅಭ್ಯಾಸ ಇಟ್ಟುಕೊಂಡಿರುತ್ತಾರೆ.

ಆದರೆ ಎಂಥವರಿಗಾದರೂ ವ್ಯಾಯಾಮ ಕೆಲವು ದಿನಗಳು ಕಳೆದ ನಂತರ ಬೋರು ಹೊಡೆಯುತ್ತದೆ. ಇದೇ ಕಾರಣ ನೆಪಮಾಡಿ ಕೊಂಡು ನಿಮ್ಮ ತಂದೆ ವ್ಯಾಯಾಮವನ್ನು ಬಿಟ್ಟು ಬಿಡುವ ಸಾಧ್ಯತೆ ಇರುತ್ತದೆ. ಹಾಗಾಗಿ ಅವರಿಗೆ ವ್ಯಾಯಾಮ ಮಾಡಲು ಒಂದು ಸ್ಪೂರ್ತಿಯ ಅವಶ್ಯಕತೆ ಇರುತ್ತದೆ.

ಆ ಸ್ಫೂರ್ತಿಯನ್ನು ನೀವು ಅವರಿಗೆ ವ್ಯಾಯಾಮ ಮಾಡುವ ಸಮಯದಲ್ಲಿ ಅದ್ಭುತವಾದ ಸುಮಧುರ ಸಂಗೀತವನ್ನು ಆಲಿಸುವಂತೆ ಅನುವು ಮಾಡಿಕೊಡಬಹುದು. ಅದುವೇ ವರ್ಕೌಟ್ ಹೆಡ್ಫೋನ್ ಗಳ ಮುಖಾಂತರ.

ಸಾಧ್ಯವಾದಷ್ಟು ಬೆವರು ವಿರೋಧಿ ಹೆಡ್ ಫೋನ್ ಗಳನ್ನು ಅಥವಾ ಇಯರ್ ಫೋನ್ ಗಳನ್ನು ಖರೀದಿಸಿ ಅವರಿಗೆ ಈ ಸಮಯದಲ್ಲಿ ಸರ್ಪ್ರೈಸ್ ಗಿಫ್ಟ್ ನೀಡಬಹುದು.

ಇದು ಖಂಡಿತ ಅವರಿಗೆ ನೀವು ಗಿಫ್ಟ್ ಕೊಟ್ಟಾಗ ಮಾತ್ರ ನೆನಪಿನಲ್ಲಿ ಉಳಿಯುವುದಲ್ಲದೇ, ಇಡೀ ಅವರ ಜೀವಮಾನದ ತುಂಬಾ ವ್ಯಾಯಾಮ ಮಾಡಲು ಮುಂದಾದಂತಹ ಸಮಯದಲ್ಲೆಲ್ಲಾ ನೀವು ಮತ್ತು ನಿಮ್ಮ ಗಿಫ್ಟ್ ಜ್ಞಾಪಕಕ್ಕೆ ಬಂದು ಸದಾ ಖುಷಿಯಾಗಿರುತ್ತಾರೆ.

ಹಾರ್ಟ್ ರೇಟ್ ಮಾನಿಟರ್
ಪ್ರಮುಖವಾಗಿ ಮಹಿಳೆಯರಿಗೆ ಹೋಲಿಸಿದರೆ ಪುರುಷರಿಗೆ ಹೃದಯದ ತೊಂದರೆ ಮತ್ತು ಹೃದಯಕ್ಕೆ ಸಂಬಂಧ ಪಟ್ಟ ಮಾರಕ ಆರೋಗ್ಯ ಸಮಸ್ಯೆಗಳು ವಿಪರೀತವಾಗಿರುತ್ತವೆ. ಅದರಲ್ಲೂ ಮನೆಯಲ್ಲಿ ಇರುವ ವಯಸ್ಸಾದ ತಂದೆಗೆ ತಮ್ಮ ಕುಟುಂಬದ ಬಗ್ಗೆ ಹೆಚ್ಚು ಕಾಳಜಿ ಇರುವುದರಿಂದ ಸದಾ ನಿಮ್ಮ ಬಗ್ಗೆಯೇ ಯೋಚನೆ ಮಾಡುತ್ತಿರುತ್ತಾರೆ.

ಇದರಿಂದ ಅವರ ಹೃದಯ ಬಡಿತ ಸಾಕಷ್ಟು ಹೆಚ್ಚಾಗುತ್ತದೆ. ಇದರಿಂದ ಅವರ ರಕ್ತದ ಒತ್ತಡ ಕೂಡ ಹೆಚ್ಚಾಗುತ್ತದೆ. ಹಾಗಾಗಿ ಹೃದಯವನ್ನು ಮಾನಿಟರ್ ಮಾಡುವಂತಹ ಒಂದು ಸಾಧನದ ಅವಶ್ಯಕತೆ ನಿಮ್ಮ ತಂದೆಗೆ ಇರುತ್ತದೆ. ನೀವು ಈ ಫಾದರ್ಸ್ ಡೇ ಸಮಯವನ್ನು ಸದುಪಯೋಗ ಮಾಡಿಕೊಂಡು ಅವರಿಗೆ ಹಾರ್ಟ್ ರೇಟ್ ಮಾನಿಟರ್ ಗಿಫ್ಟ್ ಕೊಡಬಹುದು.

ಹಾರ್ಟ್ ರೇಟ್ ಮಾನಿಟರ್ ಅವರ ದೇಹದಲ್ಲಿ ಕ್ಯಾಲೋರಿಗಳ ಸ್ಥಿತಿ, ಉಸಿರಾಟದ ಮಟ್ಟ, ಜಾಗಿಂಗ್ ಮಾಡುವಾಗ ಓಡಿದಂತಹ ವೇಗ ಮತ್ತು ವ್ಯಾಪ್ತಿ ಪ್ರದೇಶ ಎಲ್ಲವನ್ನೂ ಸರಿಯಾದ ರೀತಿಯಲ್ಲಿ ಡಿಜಿಟಲ್ ಡಿಸ್ಪ್ಲೇ ಮೂಲಕ ತಿಳಿಸಿಕೊಡುತ್ತದೆ. ಇದರಿಂದ ಅವರ ಸದ್ಯದ ದೇಹ ಸ್ಥಿತಿ ಮತ್ತು ಆರೋಗ್ಯ ಸ್ಥಿತಿ ಹೇಗಿದೆ ಎಂಬುದು ತಿಳಿಯುತ್ತದೆ. ಹಾಗಾಗಿ ಇಂತಹ ಒಂದು ಮೌಲ್ಯಯುತವಾದ ಗಿಫ್ಟ್ ಅನ್ನು ನೀವು ಸರ್ಪ್ರೈಸ್ ಆಗಿ ಅವರಿಗೆ ಕೊಡಬಹುದು.

ಫಿಟ್ನೆಸ್ ಔಟ್ ಫಿಟ್
ತಂದೆಯ ಆರೋಗ್ಯದ ವಿಚಾರದಲ್ಲಿ ಮಕ್ಕಳು ಹೆಚ್ಚಿನ ಗಮನ ವಹಿಸಬೇಕಾಗುತ್ತದೆ. ಅವರು ದಿನ ನಿತ್ಯ ಹಾಕಿಕೊಳ್ಳುವ ಬಟ್ಟೆಯಿಂದ ಹಿಡಿದು ಅವರ ಆಹಾರ ಪದ್ಧತಿ, ಜೀವನ ಶೈಲಿ ಇತ್ಯಾದಿಗಳ ಬಗ್ಗೆ ಹೆಚ್ಚಿನ ಗಮನ ಕೊಡಬೇಕು.

ಮುಖ್ಯವಾಗಿ ವ್ಯಾಯಾಮ ಮಾಡುವ ಸಮಯದಲ್ಲಿ ಅವರು ಹಾಕಿಕೊಳ್ಳುವ ಟ್ರ್ಯಾಕ್ ಪ್ಯಾಂಟ್, ಸ್ವೇಟ್ ಶರ್ಟ್, ಶಾರ್ಟ್ಸ್, ಶೂಸ್, ಅವರು ವ್ಯಾಯಾಮಕ್ಕಾಗಿ ಉಪಯೋಗಿಸುವ ಡಂಬಲ್ಸ್, ಪುಲ್ ಅಪ್ ಬಾರ್ ಇತ್ಯಾದಿಗಳ ಬಗ್ಗೆ ಮುಂಜಾಗ್ರತೆ ವಹಿಸಿ ಅವರ ಅವಶ್ಯಕತೆಗೆ ತಕ್ಕಂತೆ ಇವುಗಳನ್ನು ಖರೀದಿ ಮಾಡಿಕೊಡುವ ಆಲೋಚನೆಯನ್ನು ಈ ಸಮಯದಲ್ಲಿ ಮಾಡಬಹುದು