ಮಧುಮೇಹಿಗಳು ಜೋಳ ತಿನ್ನಬಹುದೇ?

ಒಮ್ಮೆ ಮಧುಮೇಹ ಬಂದ ಮೇಲೆ ಆರೋಗ್ಯಕರ ಆಹಾರಕ್ರಮ, ವ್ಯಾಯಾಮ ಪಾಲಿಸುವುದು ಬಹುಮುಖ್ಯ. ಆಹಾರಕ್ರಮದಲ್ಲಿ ಸ್ವಲ್ಪ ಹೆಚ್ಚು ಕಡಿಮೆಯಾದರೂ ದೇಹದಲ್ಲಿ ಸಕ್ಕರೆಯಂಶದಲ್ಲಿ ವ್ಯತ್ಯಾಸ ಉಂಟಾಗುವುದು.

ಮಧುಮೇಹದಿಂದ ಬಳಲುತ್ತಿರುವವರಲ್ಲಿ ಭಾರತ ವಿಶ್ವದಲ್ಲಿ ಎರಡನೇಯ ಸ್ಥಾನದಲ್ಲಿದೆ. ಮಧುಮೇಹವನ್ನು ನಿಯಂತ್ರಣದಲ್ಲಿಡಲು ಆರೋಗ್ಯಕರ ಜೀವನಶೈಲಿ ಅಳವಡಿಸಿಕೊಳ್ಳಬೇಕು.

ಮಧುಮೇಹಿಗಳಲ್ಲಿ ಕೆಲವರು ದೇಹದಲ್ಲಿ ಸಕ್ಕರೆಯಂಶವನ್ನು ಹೆಚ್ಚಿಸುವ ಆಹಾರವನ್ನು ದೂರವಿಟ್ಟರೆ ಮತ್ತೆ ಕೆಲವರು ತುಂಬಾ ಪಥ್ಯ ಪಾಲಿಸುತ್ತಾರೆ. ಈ ರೀತಿಯ ಆಹಾರಶೈಲಿಯಿಂದ ತುಂಬಾ ಬೋರಾಗುವುದು.

ಮಧುಮೇಹ ಬಂದರೆ ಜೋಳ ಒಳ್ಳೆಯದಲ್ಲ ಎಂದು ಅದನ್ನು ತಿನ್ನದೆ ಇರುತ್ತಾರೆ. ಆದರೆ ಅಧಿಕ ನಾರಿನಂಶವಿರುವ ಜೋಳ ತಿಂದರೆ ದೇಹದಲ್ಲಿ ಸಕ್ಕರೆಯಂಶ ಒಮ್ಮಲೇ ಹೆಚ್ಚಾಗುವುದಿಲ್ಲ. ಆದ್ದರಿಂದ ಮಿತ ಪ್ರಮಾಣದಲ್ಲಿ ಜೋಳವನ್ನು ತಿನ್ನಬಹುದು.

ಜೋಳದಲ್ಲಿ ವಿಟಮಿನ್ ಸಿ, ವಿಟಮಿನ್ ಬಿ ಹಾಗೂ ಇತರ ಪೋಷಕಾಂಶಗಳಿದ್ದು, ಇದರಲ್ಲಿ ಕಡಿಮೆ ಕೊಬ್ಬಿನಂಶ ಹಾಗೂ ಅತ್ಯಧಿಕ ನಾರಿನಂಶವಿದೆ. ಅಮೆರಿಕದ ಮಧುಮೇಹ ಸಂಸ್ಥೆಯು ಜೋಳವನ್ನು ಮಿತಿಯಲ್ಲಿ ತಿನ್ನುವುದರಿಂದ ಯಾವುದೇ ಅಪಾಯ ಉಂಟಾಗುವುದಿಲ್ಲ ಎಂದಿದೆ.

ಮಧುಮೇಹಿಗಳು ಗ್ಲೈಸೆಮಿಕ್ ಇಂಡೆಕ್ಸ್ 55ಕ್ಕಿಂತ ಕಡಿಮೆ ಇರುವ ಆಹಾರ ಸೇವಿಸಬೇಕು. ಹಾಗೆ ನೋಡಿದರೆ ಜೋಳದ ಗ್ಲೈಸೆಮಿಕ್ ಇಂಡೆಕ್ಸ್ 52 ಇದ್ದು, ಜೋಳದಿಂದ ಮಾಡಿದ ಆಹಾರ ಪದಾರ್ಥಗಳನ್ನು ತಿನ್ನಬಹುದು. ಆದರೆ ಕಾರ್ನ್‌ ಫ್ಲೇಕ್ಸ್‌ನಂತಹ ಆಹಾರಗಳನ್ನು ತಿನ್ನಬಾರದು, ಏಕೆಂದರ ಇದರಲ್ಲಿ ಸಕ್ಕರೆ ಬಳಸುವುದರಿಂದ ಗ್ಲೈಸೆಮಿಕ್ ಇಂಡೆಕ್ಸ್ 81ರಷ್ಟು ಇರುತ್ತದೆ.

ಜೋಳ ಆರೋಗ್ಯಕ್ಕೆ ಒಳ್ಳೆಯದು ಎಂದು ಅಧ್ಯಯನ ಹೇಳಿದೆ. ಜೋಳ ಜೀರ್ಣಕ್ರಿಯೆಗೆ, ತೂಕ ಇಳಿಕೆಗೆ ಸಹಕಾರಿ.