ಕಿವಿ ನೋವಿಗೆ ಮನೆ ಮದ್ದು

ಕಿವಿ ನೋವು ಬಂತೆಂದರೆ ತುಂಬ ಕಿರಿಕಿರಿ ಮತ್ತು ಅಸಹನೀಯ. ಹಾಗಂತ ಅದಕ್ಕೆ ಆಸ್ಪತ್ರೆಗೆ ಓಡಬೇಕೆಂದಿಲ್ಲ. ಮನೆಮದ್ದಿನ ಮೂಲಕ ಕಿವಿನೋವಿಗೆ ಮುಕ್ತಿ ಪಡೆದುಕೊಳ್ಳಬಹುದು.

ಸಿಪ್ಪೆ ಸುಲಿದ ಬೆಳ್ಳುಳ್ಳಿಯನ್ನು ಚೆನ್ನಾಗಿ ಕತ್ತರಿಸಿ, ಎಳ್ಳಿನ ಎಣ್ಣೆಯಿಂದ ಬಿಸಿ ಮಾಡಿ. ಬಿಸಿ ಎಣ್ಣೆ ತಣಿದ ನಂತರ 2-3 ಹನಿಯನ್ನು ಕಿವಿಯೊಳಗೆ ಹಾಕಿದರೆ ಕಿವಿ ನೋವು ವಾಸಿಯಾಗುತ್ತದೆ.

ಬೆಳ್ಳುಳ್ಳಿಯನ್ನು ಹರಳೆಣ್ಣೆಯಲ್ಲಿ ಹುರಿದು, ಆರಿದ ನಂತರ ಕಿವಿಗೆ ಒಂದೊಂದೇ ಹನಿ ಬಿಡುತ್ತಿದ್ದರೆ ಸಹ ಕಿವಿನೋವು ಕಡಿಮೆಯಾಗುವುದು.

ಈರುಳ್ಳಿ ರಸವನ್ನು ಬಿಸಿ ಮಾಡಿ, ಆರಿಸಿ ಕೆಲವು ಹನಿಗಳನ್ನು ಕಿವಿಯೊಳಗೆ ಬಿಟ್ಟುಕೊಳ್ಳಿ. ದಿನದಲ್ಲಿ 2-3 ಸಲ ಹೀಗೆ ಮಾಡಿ.

ನೇರವಾಗಿ ಕಿವಿಯೊಳಗೆ ಕೆಲವು ಹನಿ ಶುಂಠಿ ರಸ ಹಾಕಿ ಅಥವಾ ಅಥವಾ ಶುಂಠಿಯನ್ನು ಆಲಿವ್‌ ಎಣ್ಣೆಯಲ್ಲಿ ಹಾಕಿ 10 ನಿಮಿಷ ಬಿಟ್ಟು ಕೆಲವು ಹನಿಯನ್ನು ಕಿವಿಯಲ್ಲಿ ಹಾಕಿ.

ಅಡುಗೆ ಉಪ್ಪನ್ನು ನೀರಿನಲ್ಲಿ ಕರಗಿಸಿ ಉಗುರು ಬೆಚ್ಚಗೆ ಮಾಡಿ ಕಿವಿಗೆ ಬಿಡುವುದರಿಂದ ಯಾವುದೇ ಕೀಟ ಒಳಗೆ ಹೋಗಿದ್ದರೂ ಹೊರಬರುವುದು, ಇಲ್ಲವೇ ಅಲ್ಲಿಯೇ ಸಾಯುವುದು.

ಸ್ವಲ್ಪ ಓಂಕಾಳನ್ನು ಒಂದು ಚಮಚ ಕೊಬ್ಬರಿ ಎಣ್ಣೆಯೊಂದಿಗೆ ಕುದಿಸಿ, ಬೆಚ್ಚನೆಯ ಎಣ್ಣೆಯನ್ನು ಕಿವಿಗೆ ತೊಟ್ಟು ತೊಟ್ಟಾಗಿ ಬಿಡುವುದರಿಂದ ಕಿವಿಯಲ್ಲಿ ಉಂಟಾದ ಕಜ್ಜಿ, ಕುರ ವಾಸಿಯಾಗುವುದು.

ಕಿವಿ ಹುಣ್ಣಾದಾಗ, ಸೋರುತ್ತಿರುವಾಗ ತುಳಸಿ ಎಲೆಯ ರಸವನ್ನು ತೆಗೆದು, ಕಿವಿಯೊಳಗೆ ಹಿಂಡುತ್ತಿದ್ದರೆ ಕಿವಿನೋವು ಕಡಿಮೆಯಾಗುವುದು.

ಬಾಣಂತಿಯರು ಬೆಳ್ಳುಳ್ಳಿಯ ಚೂರುಗಳನ್ನು ಹತ್ತಿಯಲ್ಲಿ ಸುತ್ತಿ, ಕಿವಿಯಲ್ಲಿ ಇಟ್ಟುಕೊಂಡಂರೆ ಶೀತದಿಂದ ಕಿವಿ ಕಿವುಡಾಗುವುದು ತಪ್ಪುತ್ತದೆ.

ಹಸಿ ಮೂಲಂಗಿಯನ್ನು ಸೇವಿಸುವುದರಿಂದಲೂ ಕಿವಿಗೆ ಸಂಬಂಧಪಟ್ಟ ಕಾಯಿಲೆ ಬರುವ ಸಾಧ್ಯತೆ ಕಡಿಮೆಯಾಗುತ್ತದೆ.