ಸಾಮಾನ್ಯವಾಗಿ ಎಲ್ಲರೂ ಆಗೊಮ್ಮೆ ಈಗೊಮ್ಮೆ ಗೊರಕೆ ಹೊಡೆಯುತ್ತಾರೆ, ಆದರೆ ಕೆಲವರಿಗೆ ಇದು ದೀರ್ಘಕಾಲದ ಸಮಸ್ಯೆಯಾಗಿರಬಹುದು. ದಾಂಪತ್ಯದಲ್ಲಿ ಗೊರಕೆ ಬಿರುಕು ತಂದ ಉದಾಹರಣೆಗಳೂ ಇವೆ.
ಹಾಗಾದರೆ ಈ ರೀತಿ ಗೊರಕೆ ಬರುವುದಕ್ಕೆ ಕಾರಣವೇನು, ಇದನ್ನು ಮನೆಯಲ್ಲೇ ಹೇಗೆ ಕಡಿಮೆ ಮಾಡುವುದು ಹೇಗೆ ಎನ್ನುವ ಬಗ್ಗೆ ಆಯುರ್ವೇದ ವೈದ್ಯರಾದ ಡಾ. ಶರದ್ ಕುಲಕರ್ಣಿ ಮಾಹಿತಿ ನೀಡಿದ್ದಾರೆ ಇಲ್ಲಿದೆ ನೋಡಿ.
ಗೊರಕೆ ಬರುವುದು ಇದೇ ಕಾರಣಕ್ಕೆ
- ದೇಹದಲ್ಲಿ ಅತಿಯಾದ ತೂಕವಿದ್ದವರು ಹೆಚ್ಚು ಗೊರಕೆ ಹೊಡೆಯುತ್ತಾರೆ.
- ಪುರುಷರಲ್ಲಿ ಹೆಚ್ಚು
- ಆಲ್ಕೋಹಾಲ್ ಸೇವನೆ, ರಾತ್ರಿ ನಿದ್ದೆಗೆಡುವುದರಿಂದ
- ಮೂಗು ಕಟ್ಟುವುದು ಅಥವಾ ಸೈನಸ್ ಸಮಸ್ಯೆ
- ಅನುವಂಶೀಕವಾಗಿಯೂ ಗೊರಕೆ ಸಮಸ್ಯೆ ಕಾಡಬಹುದು
- ಬಾಯಿಯ ಕುಹರ ಮತ್ತು ಮೂಗಿನ ಹೊಳ್ಳೆ ಚಿಕ್ಕದಿದ್ದರೆ
- ನೇರವಾಗಿ ಮಲಗಿದರೆ
- ಥೈರಾಯ್ಡ್ ಅಥವಾ ಹೈಪೋಥೈರಾಯ್ಡ್ ಸಮಸ್ಯೆ ಇದ್ದರೆ ಬೊಜ್ಜಿನಿಂದ ಗೊರಕೆ ಸಮಸ್ಯೆ ಕಾಡುತ್ತದೆ.
- ಮಧುಮೇಹ ಮತ್ತು ಹೈಪರ್ಟೆನ್ಷನ್ ಇದ್ದವರಿಗೂ ಕೂಡ ಗೊರಕೆ ಕಾಣಿಸಿಕೊಳ್ಳುತ್ತದೆ
- ಮೂಗಿನ ಮೂಳೆಗಳು ಸೊಟ್ಟವಿದ್ದರೂ ಕೆಲವೊಮ್ಮೆ ಗೊರಕೆ ಹೊಡೆಯಲು ಕಾರಣವಾಗುತ್ತದೆ.
ಮಲಗುವ ಭಂಗಿ
ಸಾಮಾನ್ಯವಾಗಿ ಗೊರಕೆ ಬರುವುದು ನೇರವಾಗಿ ಮಲಗಿದಾಗ ಮಾತ್ರ. ಹೀಗಾಗಿ ಮಲಗುವ ಭಂಗಿಯನ್ನು ಬದಲಿಸಿದರೆ ಗೊರಕೆ ಸಮಸ್ಯೆಯನ್ನು ನಿವಾರಿಸಬಹುದು. ಬಲಭಾಗ ಮತ್ತು ನೇರವಾಗಿ ಮಲಗುವುದಕ್ಕಿಂತ ಎಡ ಮಗ್ಗುಲಿನಲ್ಲಿ ಮಲಗಿದರೆ ಗೊರಕೆಯನ್ನು ಕಡಿಮೆ ಮಾಡಬಹುದು ಎಂದು ಸಲಹೆ ನೀಡುತ್ತಾರೆ ಡಾ. ಶರದ್.
ಆಯುರ್ವೇದ ಮದ್ದು
ಗೊರಕೆ ಸಮಸ್ಯೆಯನ್ನು ನಿವಾರಿಸಲು ನಸ್ಯ ಚಿಕಿತ್ಸೆ ಪಡೆಯಬಹುದು. ಅಥವಾ ಮನೆಯಲ್ಲಿಯೇ ಮಲಗುವ ಮುನ್ನ ಮೂಗಿನ ಹೊಳ್ಳೆಗಳಿಗೆ ಉಗುರು ಬೆಚ್ಚಗೆ ಮಾಡಿರುವ ಎಳ್ಳೆಣ್ಣೆಯನ್ನು ಹಾಕುವ ಮೂಲಕ ಪ್ರತಿಮರಾಮರ್ಶನವನ್ನು ಮಾಡಿಕೊಳ್ಳಬಹುದು.
ಇದರಿಂದ ಗೊರಕೆ ಸಮಸ್ಯೆ ನಿವಾರಣೆಯಾಗುವುದಲ್ಲದೆ, ಉತ್ತಮವಾಗಿ ನಿದ್ದೆಯೂ ಬರುತ್ತದೆ. ಆದರೆ ಈ ಅಭ್ಯಾಸವನ್ನು ಅನೇಕ ದಿನಗಳವರೆಗೆ ಮಾಡಬೇಕಾಗುತ್ತದೆ. ಆಗ ಮಾತ್ರ ಫಲಿತಾಂಶ ಪಡೆಯಲು ಸಾಧ್ಯ.
ದೇಹದ ಅತಿಯಾದ ತೂಕವನ್ನು ಕಡಿಮೆ ಮಾಡಿಕೊಳ್ಳುವುದು
ಗೊರಕೆ ಬೊಜ್ಜಿನ ಸಮಸ್ಯೆಯಿಂದಲೂ ಕಾಣಿಸಿಕೊಳ್ಳುವ ಕಾರಣ ದೇಹದ ತೂಕ ಹೆಚ್ಚಿದ್ದರೆ ಅದನ್ನು ಕಡಿಮೆ ಮಾಡಿಕೊಳ್ಳಬೇಕು. ಅದಕ್ಕಾಗಿ ದಿನನಿತ್ಯ ಪ್ರಾಣಾಯಾಮ, ಯೋಗ, ವ್ಯಾಯಾಮದಂತಹ ದೈಹಿಕ ಚಟುವಟಿಕೆಗಳನ್ನು ಅಭ್ಯಾಸದಲ್ಲಿ ಇಟ್ಟುಕೊಳ್ಳುವುದು ಉತ್ತಮ
ಜಲನೇತಿಯ ಅಭ್ಯಾಸ ಗೊರಕೆಯನ್ನು ಕಡಿಮೆ ಮಾಡಲು ಸಹಾಯ ಮಾಡುತ್ತದೆ. ಹೀಗಾಗಿ ಸೂಕ್ತ ತರಬೇತಿ ಪಡೆದ ಬಳಿಕ ತಿಂಗಳಿಗೊಮ್ಮೆಯಾದೂ ಜಲನೇತಿಯನ್ನು ಅಭ್ಯಾಸ ಮಾಡಿ. ಇದರಿಂದ ಗೊರಕೆ ಸಮಸ್ಯೆಯನ್ನು ನಿವಾರಿಸಬಹುದು.
ದಿಂಬಿನ ಬಳಕೆ
ಮೆತ್ತನೆಯ ದಿಂಬುಗಳನ್ನು ಕುತ್ತಿಗೆಗೆ ಇಟ್ಟುಕೊಂಡು ಮಲಗುವುದರಿಂದ ಗೊರಕೆ ಬರದಂತೆ ಮಾಡಬಹುದು. ಅದರ ಜೊತೆಗೆ ದಿಂಬಿನ ಮೇಲೆ ತಲೆಯಿಟ್ಟು ಎಡ ಮಗ್ಗುಲಿನಲ್ಲಿ ಮಲಗಬೇಕು.
ಇದರ ಜೊತೆಗೆ ಮುಖ್ಯವಾಗಿ ಆಲ್ಕೋಹಾಲ್ ಸೇವನೆ, ಧೂಮಪಾನದಂತಹ ಅಭ್ಯಾಸವಿದ್ದರೆ ತ್ಯಜಿಸುವುದರಿಂದ ಗೊರಕೆ ಸಮಸ್ಯೆ ನಿವಾರಿಸಬಹುದು.
ನಿದ್ದೆಗೆಡದೇ ಇರುವುದು
ಆದಷ್ಟು ಪ್ರತೀ ರಾತ್ರಿ ನಿದ್ದೆ ಮಾಡಿ. ನಿರಂತರವಾಗಿ ನಿದ್ದೆಗೆಟ್ಟು ಮಲಗುವುದರಿಂದಲೂ ಗೊರಕೆ ಕಾಣಿಸಿಕೊಳ್ಳುತ್ತದೆ. ಚೆನ್ನಾಗಿ ನಿದ್ದೆ ಬರಲು ರಾತ್ರಿ ಲಘುವಾಗಿ ಊಟ ಮಾಡುವುದು, ಕೇಸರಿ ಮಿಶ್ರಿತ ಹಾಲಿನ ಸೇವನೆ ಮಾಡುವುದನ್ನು ಅಭ್ಯಾಸ ಮಾಡಿಕೊಳ್ಳಿ.
ಇದರ ಜೊತೆಗೆ ಆದಷ್ಟು ಮೂಗಿನಲ್ಲಿ ಉಸಿರಾಡುವುದನ್ನು ಅಭ್ಯಾಸ ಮಾಡಿಕೊಳ್ಳಿ. ಕೆಲವರು ಅವರಿಗೇ ಅರಿವಿಲ್ಲದೆ ಬಾಯಲ್ಲಿ ಉಸಿರಾಡುತ್ತಾರೆ. ಹೀಗಾಗಿ ಮೂಗಿನಲ್ಲಿ ಉಸಿರಾಟ ಮಾಡುವುದನ್ನು ಅಭ್ಯಾಸ ಮಾಡಿಕೊಳ್ಳಿ ಎಂದು ಸಲಹೆ ನೀಡುತ್ತಾರೆ ಡಾ. ಶರದ್ ಕುಲಕರ್ಣಿ.
Dr. Sharad Kulkarni
BAMS, MS
Jeevottama Health - Ayurveda Clinic, Bengaluru
ಇದನ್ನೂ ಓದಿ: ಒಂದೇ ಸಮನೆ ಕಾಡುವ ಬಿಕ್ಕಳಿಕೆ ನಿಲ್ಲಿಸಲು ಈ ಮನೆಮದ್ದು ಬಳಸಿ ಎನ್ನುತ್ತಾರೆ ವೈದ್ಯರು